19
Ema Sodoma hakarak halo aat bainaka nain rua
1 Loro matan besik atu monu ona, anju nain rua nebee ohin vizita Abraão nee too iha sidade Sodoma. Momentu nee, Ló tuur hela iha portaun sidade nian. Ló haree sira nain rua nee, nia hamriik baa hasoru sira. Nia hakruuk too rai iha sira nia oin,
2 depois nia dehan, “Senhor sira, favor ida, baa lai iha hau ata nia uma para fase ain hodi deskansa kalan ida. Aban dadeer-saan mak kontinua fali senhor sira nia viajen.”
Sira hataan, “Ami toba iha kampu deit.”
3 Maibee Ló eziji beibeik, entaun sira baa hamutuk ho nia tama iha nia uma. Ló halo paun la tau fermentu hodi prepara hahaan diak nian ba sira. Depois sira haan.
4 Sira seidauk toba, mane sira husi sidade Sodoma tomak, joven-katuas mai hotu haleu Ló nia uma.
5 Sira hakilar ba Ló dehan, “Mane nain rua ohin tama iha o nia uma nee iha nebee? Lori sira sai mai para ami halo relasaun seksual ho sira.”
6 Depois Ló sai husi uma laran, taka tiha odamatan,
7 nia dehan ba sira, “Lae, maluk sira! Keta halo buat aat ida nee!
8 Rona mai. Hau iha oan feto nain rua, sira sei feto raan. Hau bele lori sira sai mai foo ba imi. Imi atu halo saida deit ba sira, konformi imi. Maibee la bele halo buat ida hasoru mane nain rua nee, tanba sira nee hau nia bainaka, entaun hau tenki proteje sira.”
9 Sira hataan, “Sees tiha!” Depois sira koalia ba malu dehan, “Ema nia aman nee mai iha ita nia leet nudar ema lao rai deit, agora atu sai fali juis ba ita!” Sira dehan tan, “Se o lakohi sees, ami sei halo o aat liu fali ema nain rua nee.” Sira dudu beibeik Ló hodi nadodon baa atu sobu odamatan.
10 Maibee bainaka nain rua nee lolo liman hodi dada Ló tama fali ba uma laran. Sira taka tiha odamatan,
11 depois sira halo mane sira iha liur kiik-boot matan delek hotu, too sira buka odamatan la hetan.
Ló ho nia familia sai husi Sodoma
12 Depois ema nain rua nee hatete ba Ló, “O iha tan maluk seluk iha sidade nee ka lae? Se iha mane foun, oan mane, oan feto, ka maluk seluk, entaun lori sira sai husi sidade nee,
13 tanba fatin nee ami atu halo rahun ona. NAI Maromak rona tiha ona ema barak reklama kona ba ema iha nee. Nunee Nia haruka ami mai atu halo rahun tiha.”
14 Entaun Ló baa foo hatene mane nain rua nebee atu kaben ho nia oan feto sira dehan, “Sai lalais husi nee, tanba NAI Maromak atu halo rahun ona sidade nee.” Maibee sira hanoin nia koalia halimar deit.
15 Aban dadeer-saan rai huun mutin, anju nain rua nee eziji Ló dehan, “Lalais! Lori o nia kaben ho o nia oan feto nain rua, halai sai ona. Se lae bainhira sidade nee hetan kastigu imi mos mate hotu.”
16 Maibee Ló sei demora. Nunee ema nain rua nee kaer Ló nia liman ho mos nia kaben ho nia oan feto nain rua nee nia liman hodi lori sira sai husi sidade ho diak, tanba NAI Maromak hakarak duni atu salva sira.
17 Ema nain rua nee foin lori sira sai husi sidade, nain ida haruka sira dehan, “Halai lalais hodi salva aan. La bele hateke ba kotuk, keta para iha rai tetuk. Halai ba iha foho, se lae imi mate.”
18 Maibee Ló hataan fali dehan, “Senhor, keta nunee!
19 Senhor hatudu ona laran luak mai hau ata. Hodi ita nia laran diak ita salva ona hau nia moris. Maibee hau halai too iha foho la bele. Sei iha dalan klaran, dezastre kona ona hau halo hau mate ona.
20 Senhor haree aldeia ida nebaa laduun dook, aldeia ida nee kiik deit. Husik hau halai ba nebaa. Senhor rasik haree aldeia nee kiikoan ida. Entaun hau bele moris.”
21 Nia hataan, “Diak, hau sei halo tuir o nia hakarak, hau la halo rahun aldeia nee.
22 Maibee halai lalais ona! Tanba imi too iha nebaa mak foin hau bele halo rahun sidade nee.” Komesa iha tempu nee, aldeia nee hanaran Zoar.
Nai Maromak sunu mutuk sidade Sodoma ho Gomora
23 Ló too iha aldeia Zoar, loro matan sae dadauk.
24 Derepenti deit NAI Maromak fakar ahi ho ahi klaak enxofre husi lalehan tuun ba sidade Sodoma ho Gomora.
25 Ho nunee NAI Maromak sunu mutuk hotu sidade rua nee ho rai tetuk nee tomak. Ema hotu mate, duut ho ai horis mos mate hotu.
26 Bainhira sira halai, Ló nia kaben hateke fali ba kotuk, derepenti deit nia sai tiha masin riin.
27 Aban dadeer-saan Abraão hadeer hodi baa fali iha fatin nebee mak foin lalais nia hamriik iha NAI Maromak nia oin.
28 Nia hateke tuun ba Sodoma ho Gomora ho rai tetuk tomak, nia haree ahi suar boot sae husi fat-fatin hanesan fali ahi suar sai husi ahi lakan boot.
29 Ho nunee, bainhira Maromak halo rahun sidade hotu iha rai tetuk nee, Nia hanoin Abraão. Nee mak Maromak hasai Ló husi dezastre nebee kona sidade sira nee.
Ló ho nia oan feto sira
30 Ló ho nia oan feto nain rua husik tiha aldeia Zoar hodi baa hela fali iha foho, tanba Ló tauk atu hela iha Zoar. Nunee sira hela iha fatuk kuak ida.
31 Iha loron ida, oan feto boot dehan ba nia alin, “Ita nia aman katuas ona. Iha nee la iha mane ida atu hola ita hanesan baibain ema hola malu iha mundu tomak.
32 Nunee mai ita foo tua ba apaa hemu lanu, depois ita toba ho apaa para ita bele hetan jerasaun husi ita nia aman.”
33 Kalan nee duni, sira foo tua ba sira nia aman hemu. Depois nia oan feto boot tama baa toba ho nia aman. Maibee tanba Ló lanu, entaun nia oan feto tama baa toba ho nia mos nia la hatene, nia oan sai fali mos nia la hatene ida.
34 Aban fali oan feto boot dehan ba nia alin, “Hori kalan hau toba ona ho apaa. Orsida kalan ita foo tan tua ba nia hemu, depois o tama baa toba ho nia, atu nunee ita bele hetan jerasaun husi ita nia aman.”
35 Entaun iha kalan nee, sira foo tan tua ba sira nia aman. Depois oan feto kiik tama baa toba ho nia aman. Tanba Ló lanu, entaun nia oan feto tama baa toba ho nia mos nia la hatene, nia oan sai fali mos nia la hatene ida.
36 Ho nunee Ló nia oan feto nain rua hetan oan husi sira nia aman rasik.
37 Oan feto boot tuur ahi oan mane ida, nia foo naran Moab. Ema Moab sira agora dadauk nee nia bei-ala mak nia.
38 Oan feto kiik mos tuur ahi oan mane ida, nia foo naran Ben-Ami. Nia mak sai ema Amon sira agora nee nia bei-ala.