20
Abraão ho liurai Abimelek
1 Abraão muda ba iha rai Negeb hodi hela iha Kades ho Sur nia klaran. Depois nia muda fali baa hela iha aldeia Gerar nudar ema lao rai.
2 Iha nebaa Abraão foo hatene ba ema dehan, “Sara nee hau nia feton.” Nunee Abimelek liurai Gerar nian haruka ema baa lori tiha Sara ba iha nia palasiu.
3 Iha kalan ida, Maromak hatudu Aan ba Abimelek liu husi mehi. Nia hatete, “O atu mate ona mak nee! Tanba feto nebee o lori mai nee, kaben nain ida.”
4 Maibee Abimelek seidauk moris hamutuk ho Sara. Nunee nia hataan, “Nai, hau la sala ida! Nusaa mak Ita Boot atu oho fali hau ho hau nia povu?!
5 Abraão rasik mak dehan, Sara nee nia feton. Sara mos dehan Abraão nee nia naan. Nunee hau haruka lori nia mai, hau nia laran moos no hau nia liman moos hela.”
6 Maromak hataan ba nia iha mehi laran dehan, “Loos duni, Hau hatene o halo ida nee ho laran moos. Tanba nee mak Hau kuidadu o para o la bele halo sala hasoru Hau. Nunee Hau la husik o atu hola nia.
7 Agora entrega fali ema nia feen nee ba nia laen, tanba nia laen nee Hau nia profeta. Nia sei halo orasaun ba o, nunee o sei moris. Maibee se o la foo fila nia feen, entaun o ho o nia ema sira sei mate hotu.”
8 Aban dadeer, Abimelek halibur nia funsionariu sira hotu hodi konta nia mehi nee. Sira hotu tauk teb-tebes.
9 Depois Abimelek bolu Abraão mai hodi dehan, “Ita boot halo saida mak nee? Hau halo sala saida ba ita boot mak ita lori hau ho hau nia reinu halo sala boot ida nee? Buat nebee ita boot halo mai hau nee la loos!”
10 Depois Abimelek husu ba Abraão, “Tanba saa mak ita boot halo hanesan nee?”
11 Abraão hataan, “Hau hanoin ema iha nee la hatene hamtauk Maromak. Nunee ema bele oho hau hodi hadau hau nia kaben.
12 Ami nain rua feen-laen. Maibee hau dehan nia hau nia feton nee loos duni, tanba ami nain rua aman ida, inan keta-ketak.
13 Nunee, bainhira Maromak haruka hau sai husi hau nia aman nia uma hodi baa iha ema nia rain, hau hatete ba hau nia kaben dehan, ‘Ita baa iha nebee-nebee deit, se o hadomi hau, entaun foo hatene ba ema katak ita nain rua feton ho naan. ’ ”
14 Depois Abimelek lori bibi ho karau, atan mane ho atan feto hodi foo ba Abraão. Nia mos entrega fali Abraão nia kaben Sara.
15 Abimelek hatete ba Abraão, “Hau nia rai nee nakloke ba ita. Ita hakarak hela iha nebee deit, konformi ita.”
16 Abimelek hatete ba Sara, “Hau foo ona osan mutin rihun ida ba o nia maun hodi hatudu ba ema hotu nebee hamutuk ho o katak hau la halo buat ida ba o. Sira hotu sei hatene katak o moos hela.”
17-18 Hotu tiha Abraão harohan ba Maromak. Maromak mos kura Abimelek, Abimelek nia feen ho mos Abimelek nia atan feto sira nebee hela iha nia uma, atu nunee sira bele hetan fali oan. Tanba iha tempu nebaa NAI Maromak halo feto sira nee hotu la bele kous, tanba Abimelek lori tiha Abraão nia feen Sara.