21
Sara nia oan Isac moris
1 NAI Maromak foo bensaun ba Sara, hanesan uluk Nia hatete tiha ona. Nia foo buat nebee Nia promete ona.
2 Nunee bainhira Abraão katuas liu ona, Sara isin rua, nia tuur ahi oan mane ida tuir lo-loos tempu nebee uluk Maromak foo hatene ba Abraão.
3 Sara ho Abraão nia oan nee, Abraão foo naran Isac.
4 Bainhira nia oan Isac halo loron walu ona, Abraão sunat nia tuir Maromak nia orden.
5 Momentu nia oan Isac nee moris, Abraão tinan atus ida ona.
6 Sara dehan, “Maromak halo hau hamnasa ona, see-see deit mak rona katak hau hetan oan, sira sei hamnasa kontenti hamutuk ho hau.”
7 Sara dehan tan, “Uluk la iha ema ida atu hatete ba Abraão katak ‘Sara sei foo susu ba labarik.’ Maibee agora nia katuas liu ona, ami hetan ona oan mane ida.”
Abraão haruka Hagar ho Ismael sai
8 Isac boot baa dadauk. Too loron atu haketak nia, Abraão halo festa boot.
9 Maibee Sara haree Abraão nia feen kiik Hagar feto Ejitu nee nia oan hamnasa hatuun fali Isac.
10 Nunee Sara hatete ba Abraão, “Duni sai tiha atan feto nee ho nia oan. Tanba atan nia oan la iha direitu atu simu ita boot nia riku-soin. So hau nia oan Isac deit mak iha direitu.”
11 Rona nunee Abraão laran susar teb-tebes, tanba Ismael mos nia oan hotu.
12 Maibee Maromak hatete ba Abraão, “Keta laran susar ba labarik nee ho o nia atan feto nee. Halo tuir deit buat nebee Sara husu, tanba liu husi Isac mak o sei hetan jerasaun nebee Hau promete ona.
13 Maibee atan nee nia oan mos o nia oan. Nunee Hau sei halo nia jerasaun mos sai nasaun ida.”
14 Dadeer-saan deit Abraão hadeer foti hahaan ho bee tau iha kantil nebee halo husi animal kulit hodi foo ba Hagar. Nia tula ba Hagar nia kabaas, depois haruka nia ho labarik nee baa tiha. Nunee Hagar ho nia oan sai ona, sira lao lemo-lemo iha rai fuik Berseba nian.
15 Bainhira bee nebee nia lori hotu ona, Hagar husik hela labarik nee iha ai huun kiik oan ida nia okos
16 hodi baa tuur dook uitoan husi labarik nee. Nia dehan ba nia aan, “Hau lakohi haree hau nia oan mate.” Nunee nia tuur hodi tanis halerik.
17 Maromak rona labarik nee tanis, Maromak nia anju bolu ba Hagar husi lalehan dehan, “Hagar, nusaa mak o nia laran susar nunee? Keta tauk, tanba Maromak rona ona labarik nee tanis iha nebaa.
18 Hamriik ona. Baa foti sae labarik nee hodi hamaus nia, tanba Hau sei halo nia jerasaun sai nasaun boot ida.”
19 Depois Maromak halo Hagar nia matan moos, nunee nia haree hetan bee matan ida. Nia baa kuru bee hodi foo ba labarik nee hemu.
20 Ismael boot ba dadauk, Maromak hamutuk ho nia. Nia hela iha rai fuik maran Paran, no nia sai hana door diak ida.
21 Bainhira nia hela iha rai fuik maran nee, nia inan foo kaben nia ho feto ida husi rai Ejitu.
Abraão ho liurai Abimelek halo akordu
22 Iha tempu nebaa Abimelek ho nia komandante funu nian naran Fikól, sira nain rua baa vizita Abraão. Abimelek dehan, “Ita boot halo saida deit, Maromak sempre hamutuk ho ita boot.
23 Nee duni hau husu atu ita boot jura iha Maromak nia oin katak, ita boot sei la bosok hau ho hau nia oan ho bei-oan sira. Durante nee hau halo diak ba ita boot, nunee mos ita boot tenki halo diak mai hau ho mos ba rai nebee ita boot hela ba nudar ema lao rai.”
24 Abraão hataan, “Hau jura.”
25 Hotu tiha Abraão kesar ba Abimelek kona ba bee posu ida nebee Abimelek nia atan sira hadau tiha ona husi nia.
26 Abimelek hataan, “Hau la hatene see mak halo ida nee. Ita boot la foo hatene antes, hau foin mak rona.”
27 Nunee Abraão lori bibi malae ho karau hodi foo ba Abimelek. Sira nain rua halo akordu hamutuk.
28 Depois Abraão tau ketak tan bibi malae inan hitu nebee sei kiik.
29 Abimelek husu ba Abraão, “Tansaa mak ita boot haketak bibi oan hitu nee?”
30 Abraão hataan, “Simu bibi oan hitu nee husi hau nia liman hodi hatudu katak ita boot rekonhese hau mak kee bee posu nee.”
31 Husi tempu nebaa ema bolu fatin nee Berseba, tanba sira nain rua halo juramentu iha nebaa.
32 Bainhira sira halo ona akordu iha Berseba, Abimelek ho nia komandante funu Fikól fila fali ba ema Filistin sira nia rain.
33 Hotu tiha Abraão kuda ai tamargeira ida iha Berseba. Iha nebaa nia temi NAI Maromak Rohan-laek nia naran hodi adora Nia.
34 Depois Abraão hela kleur iha ema Filistin sira nia rain nudar ema lao rai.