22
Nai Maromak koko Abraão, depois hametin Nia promesa
(Mateus 3:17, 17:5; Marcos 1:11, 9:7; Lucas 3:22, 9:35; 2 Pedro 1:17)
1 Hotu tiha Maromak koko Abraão. Maromak dehan, “Abraão!”
Nia hataan, “Hau mak nee.”
2 Maromak dehan, “Lori o nia oan, o nia oan mane mesak Isac, ida nebee o hadomi nee ba iha rai Moriá. Too iha nebaa foo nia nudar sakrifisiu tunu mutuk mai Hau iha foho ida nebee hau sei hatudu ba o.”
3 Aban dadeer-saan Abraão hadeer sedu. Nia tesi ai natoon atu bele tunu sakrifisiu nian, no tau sela ba nia kuda buru. Depois nia lori joven nain rua nebee servisu ba nia, ho mos nia oan Isac, sira sai atu baa fatin nebee Maromak foo hatene tiha ona.
4 Too loron tolu Abraão hateke sae, haree hetan fatin nee husi dook.
5 Nia hatete ba joven nain rua nee dehan, “Imi hela lai iha nee ho kuda buru, hau ho labarik sei baa iha nebaa hodi adora Maromak, depois mak ami mai fali.”
6 Depois Abraão foti ai sunu sakrifisiu nian, tula ba nia oan Isac nia kabaas, nia rasik lori ahi ho tudik. Sira nain rua kontinua lao hamutuk.
7 Isac hatete ba nia aman, “Apaa!”
Abraão hataan, “Oan.”
Isac husu, “Ita atu tunu sakrifisiu, ahi ho ai iha ona. Maibee bibi oan ba sakrifisiu nee iha nebee?”
8 Abraão hataan, “Oan, Maromak rasik mak sei foo bibi oan para tunu halo sakrifisiu.”
Sira nain rua lao hamutuk nafatin.
9 Bainhira sira too ona iha fatin nebee Maromak hatete nee, Abraão hada fatuk halo altar. Nia tau ai sunu ba iha altar nee nia leten. Depois nia futu tiha nia oan Isac hodi latan nia iha ai nee nia leten.
10 Hotu tiha nia lolo liman foti tudik atu oho nia oan.
11 Derepenti deit NAI nia anju bolu husi lalehan dehan, “Abraão, Abraão!”
Nia hataan, “Hau mak nee.”
12 Anju dehan, “O keta tau liman ba labarik nee. La bele halo buat ida ba nia. Agora Hau hatene ona katak o hamtauk Maromak, tanba o prontu foo o nia oan mane mesak ba Maromak.”
13 Abraão foti matan, derepenti nia haree bibi malae aman ida, nia dikur kait hela iha ai huun kiik ida nia sanak. Nia baa foti bibi nee tunu halo sakrifisiu foo ba Maromak hodi troka fali nia oan.
14 Nunee Abraão hanaran fatin nee “NAI sei foo.” Nee mak too agora ema dehan, “Iha NAI nia foho leten, Nia sei foo saida mak ema presiza.”
15 Dala ida tan NAI nia anju bolu Abraão husi lalehan
16 hodi dehan, “NAI Maromak hatete nunee: ‘Tanba o prontu foo o nia oan mane mesak mai Hau, entaun Hau jura hodi Hau nia naran rasik katak,
17 Hau sei foo bensaun barak ba o. Hau sei halo o nia jerasaun aumenta barak hanesan fitun iha lalehan ka hanesan rai henek iha tasi ibun. O nia jerasaun sei hadau sira nia inimigu sira nia sidade.
18 Liu husi o nia jerasaun, nasaun hotu-hotu iha mundu sei hetan bensaun, tanba o tuir ona Hau nia orden.’ ”
19 Hotu tiha Abraão ho Isac fila fali ba joven nain rua nebee ohin lao ho nia. Sira fila hamutuk ba Berseba, depois Abraão hela nafatin iha nebaa.
Naor nia jerasaun
20 Iha loron ida ema foo hatene Abraão dehan, “Ita boot nia alin Naor ho nia feen Milka hetan ona oan mane.
21 Oan mane boot naran Us. Nia alin naran Bus. Tuir mai Kemuél (nia mak Aram nia aman).
22 Iha mos Késed, Hazo, Pildas, Jidlaf ho Betuél.”
23 (Betuél nee sai Rebeca nia aman.) Sira nain walu nee Milka ho Abraão nia alin Naor nia oan.
24 Naor hetan tan oan husi nia feen kiik naran Reumá. Reumá nia oan sira mak Teba, Gaham, Tahas ho Maaka.