23
Sara mate
1 Sara moris too tinan 127.
2 Nia mate iha aldeia Kiriat-Arba (nee mak Hebron) iha rai Kanaán. Tanba Sara mate nee, Abraão tanis halerik.
3 Depois Abraão husik hela nia feen nia mate isin hodi baa koalia ho ema Ete sira. Nia dehan,
4 “Hau ema lao rai iha imi nia leet. Favor ida foo lisensa mai hau atu hetan rai pedasuk ida para bele hakoi mate iha nee.”
5 Ema Ete sira hataan,
6 “Senhor, rona mai. Senhor hanesan nai ulun boot ida iha ami nia leet. Hili deit hakoi fatin nebee mak diak liu. La iha ema ida mak lakohi foo fatin ida para senhor hakoi mate.”
7 Abraão hamriik hodi hakruuk ba rai nain ema Ete sira nee.
8 Nia dehan ba sira, “Se ita boot sira foo lisensa atu hau hakoi mate iha nee, entaun rona mai. Favor koalia ho Zoar nia oan mane Efron hodi hau nia naran.
9 Husu atu nia faan fatuk kuak Makpela mai hau. Fatuk kuak nee ninian, iha nia toos sorin. Hau hakarak atu nia faan mai hau iha imi nia oin ho folin kompletu, atu rai nee sai hau nian nudar rate fatin.”
10 Momentu nebaa, Efron ema Ete nee tuur hela ho nia maluk ema Ete sira iha portaun sidade nian. Entaun nia hataan ba Abraão para ema hotu nebee halibur malu iha nebaa nee rona.
11 Nia dehan, “Keta nunee nai! Rona mai. Iha hau nia maluk sira nia oin hau foo rai ho fatuk kuak nee ba ita boot para bele hakoi ita boot nia kaben.”
12 Abraão hakruuk tan iha ema rai nain sira nia oin.
13 Nia hatete ba Efron iha sira hotu nia prezensa, “Favor rona mai. Hau sei selu kotu rai nee. Simu ba atu nunee ami nia ema mate, bele hakoi iha nebaa.”
14 Efron hataan,
15 “Nai, rona mai. Rai nee nia folin osan mutin atus haat. Maibee ita nain rua atu kontratu osan uitoan nee hodi halo saida? Ita boot baa hakoi ita boot nia kaben iha nebaa deit ona.”
16 Abraão mos konkorda ho folin nebee Efron hatoo. Nunee nia tetu osan mutin tuir folin nebee mak Efron ohin temi iha ema Ete sira nia oin nee. Folin nee mak osan mutin atus haat, tuir osan nebee kontratu nain sira baibain uza iha tempu nebaa.
17 Nunee Abraão hola Efron nia rai iha Makpela, iha Manre parte lorosae nian. Toos ho fatuk kuak nee ho ai horis hotu-hotu iha toos laran,
18 sai Abraão nian. Ema Ete sira hotu nebee halibur malu iha portaun sidade nee mak sai sasin.
19 Hotu tiha Abraão baa hakoi nia kaben Sara iha fatuk kuak Makpela besik Manre (nee mak Hebron) iha rai Kanaán.
20 Ho nunee ema Ete sira faan toos ho fatuk kuak nee ba Abraão para sai fatin hodi hakoi mate.