24
Isac kaben ho Rebeca
1 Iha tempu nebaa Abraão katuas liu ona. NAI Maromak sempre foo bensaun oi-oin deit ba nia.
2 Abraão iha atan ida nebee toma konta nia riku-soin hotu, atan nee boot liu nia atan sira seluk. Iha loron ida, Abraão hatete ba katuas nee, “Halo juramentu
3 hodi NAI Maromak nia naran, Nia mak halo lalehan ho rai. Jura katak, o sei la buka feto raan husi ema Kanaán sira iha nee para sai hau nia oan nia kaben.
4 Maibee o sei baa iha hau nia rain, iha hau nia maluk sira hodi lori feto raan ida mai para kaben ho hau nia oan Isac.”
5 Atan nee husu, “Se karik menina nee lakohi tuir hau mai iha nee, entaun hau tenki lori senhor nia oan ba senhor nia rain ka oinsaa?”
6 Abraão hataan, “Lae, keta lori hau nia oan ba iha nebaa.
7 NAI Maromak ukun lalehan, Nia mak lori hau sai husi hau nia aman nia uma, husi hau nia rain. Nia jura hodi hatete mai hau dehan, ‘Hau sei foo rai nee ba o nia jerasaun.’ Nia sei haruka Nia anju baa uluk loke dalan ba o, atu o hetan feto raan ida iha nebaa para sai hau nia oan nia kaben.
8 Maibee se menina nee lakohi mai hamutuk ho o, entaun o livre husi o nia juramentu mai hau. Maibee bele halo nusaa mos, o la bele lori hau nia oan ba iha nebaa.”
9 Entaun atan nee jura ba nia patraun Abraão katak, nia sei kumpri Abraão nia hakarak hotu.
10 Depois atan nee hili nia patraun nia kuda kamelu sanulu, nia haloot prezenti diak nian oi-oin husi nia patraun hodi tula ba kuda kamelu sira nee. Nia sai dadauk ba Naor nia sidade iha rai Mezopotámia.
11 Bainhira nia too iha sidade, nia haruka kuda kamelu sira deskansa besik iha bee posu ida iha sidade ninin. Lokraik ona, tempu baibain feto sira sai baa kuru bee.
12 Katuas nee halo orasaun dehan, “NAI, hau nia patraun Abraão nia Maromak, hatudu Ita Boot nia domin rohan-laek ba hau nia patraun Abraão. Tulun atu ohin loron hau bele hetan susesu.
13 Hau hamriik hela besik bee posu nee menina sira husi sidade mai dadauk atu kuru bee iha nee.
14 Hau husu nunee: Orsida hau hatete ba menina ida dehan, ‘Ajuda hatuun o nia sanan para hau hemu uitoan lai.’ Se nia hataan, ‘Senhor hemu ba. Senhor nia kuda kamelu sira nee mos hau sei foo hemu hotu.’ Nee hatudu katak menina nee mak Ita Boot hili ba Ita Boot nia atan Isac. Hanesan nee hau sei hatene katak Ita Boot hatudu ona Ita Boot nia domin rohan-laek ba hau nia patraun.”
15 Katuas nee sei halo hela orasaun, Rebeca too mai, nia tula nia sanan rai iha nia kabaas. Rebeca nia aman Betuél. Betuél nee Abraão nia alin Naor ho nia feen Milka nia oan.
16 Menina nee oin bonita teb-tebes, no nia sei virjen hela, seidauk hola mane. Nia tuun ba bee posu hodi kuru bee tau ba nia sanan rai, depois sae fila fali.
17 Entaun Abraão nia atan halai baa hasoru nia hodi husu, “Ajuda foo bee uitoan husi anoi nia sanan rai para hau hemu lai.”
18 Menina nee hataan, “Hemu ba nai.” Nia hatuun lalais nia sanan hodi foo ba katuas nee hemu.
19 Bainhira katuas nee hemu hotu, menina nee dehan, “Hau sei kuru bee foo ba ita boot nia kuda kamelu sira hemu too la hamrook ona.”
20 Depois nia fakar lalais bee husi sanan nee ba iha animal nia hemu fatin. Nia halai ba-mai kuru bee iha posu nee too foo hemu ba kuda kamelu sira hotu.
21 Katuas nee nonook hodi haree tu-tuir atu hatene, NAI Maromak halo nia viajen nee hetan duni susesu ka lae.
22 Bainhira kuda kamelu sira hemu hotu ona, katuas nee foti brinkus osan mean atu tau ba menina nia inus, ho kelu osan mean rua nebee folin boot.
23 Depois nia husu, “Anoi nia aman naran saida? Dehan took mai, anoi nia aman nia uma iha fatin atu orsida kalan ami bele deskansa ka lae?”
24 Menina nee hataan, “Hau nia aman naran Betuél, Milka ho Naor nia oan.”
25 Nia hatutan, “Ami iha fatin ba senhor bele deskansa kalan, iha mos ai haan barak ba animal sira nee.”
26 Rona nunee, katuas nee hakruuk hodi adora NAI Maromak.
27 Nia dehan, “Hahii NAI, hau nia patraun Abraão nia Maromak, tanba Nia sempre hatudu Nia domin rohan-laek ho laran luak ba hau nia patraun. NAI lori hau too mai kedas iha hau nia patraun nia maluk nia uma.”
28 Menina nee halai ba uma hodi konta ba nia inan nia uma laran kona ba saida mak akontese.
29-30 Rebeca iha maun ida naran Labão. Bainhira Labão haree brinkus iha nia alin nia inus ho kelu iha nia liman, no rona Rebeca konta buat nebee katuas nee hatete ba nia, Labão sai kedas ba liur hodi baa lalais hasoru katuas nee. Katuas nee sei hamriik hela ho nia kuda kamelu besik bee posu.
31 Labão dehan, “Ita boot ema ida nebee simu bensaun husi NAI Maromak! Tanba saa mak ita boot sei hamriik iha liur nee? Mai ita baa ona. Hau prepara ona fatin ba ita boot ho mos ba ita boot nia kuda kamelu.”
32 Nunee Abraão nia atan tuir Labão ba uma. Too iha nebaa Labão hatuun naha husi kuda kamelu sira, depois nia foo haan kuda kamelu sira nee. Nia mos lori bee ba katuas nee ho nia ema sira fase ain.
33 Hotu tiha ema lori hahaan ba katuas nee. Maibee nia hatete, “Molok atu haan, hau hatoo lai liafuan ruma.”
Labão hataan, “Bele koalia.”
34 Entaun katuas nee dehan, “Hau Abraão nia atan.
35 NAI Maromak foo ona bensaun barak teb-tebes ba hau nia patraun, too nia sai ema riku boot. Maromak foo bibi, bibi malae ho karau barak, osan mean ho osan mutin, atan mane ho atan feto, kuda kamelu ho kuda buru.
36 Hau nia patraun nia feen Sara ferik ona mak tuur ahi oan mane ida. Hau nia patraun foo ona nia riku-soin hotu-hotu ba nia oan nee.
37 Patraun haruka hau jura. Nia dehan, ‘O la bele buka feto raan husi ema Kanaán sira iha nee para sai hau nia oan nia kaben.
38 Maibee o baa iha hau nia maluk sira, hau nia aman nia familia hodi buka feto raan ida iha nebaa lori mai para kaben ho hau nia oan.’
39 Depois hau husu ba patraun, ‘Oinsaa se menina nee lakohi tuir hau?’
40 Nia hataan, ‘Durante nee hau sempre moris tuir NAI Maromak nia hakarak. Nia sei haruka Nia anju baa uluk loke dalan ba o, atu o bele hetan feto raan ida husi hau nia maluk sira, husi hau nia aman nia familia para sai hau nia oan nia kaben.
41 Maibee se karik o baa iha hau nia maluk sira mak sira lakohi husik menina nee mai iha nee, entaun o livre husi o nia juramentu mai hau.’
42 Ohin hau too iha bee posu, hau harohan nunee: ‘NAI, hau nia patraun Abraão nia Maromak, se Ita Boot hakarak, entaun loke dalan para hau nia viajen nee bele hetan susesu.
43 Hau hamriik hela besik posu nee. Orsida menina ida mai kuru bee iha nee, hau sei husu, “Ajuda foo bee uitoan husi anoi nia sanan rai para hau hemu lai.”
44 Se nia hataan, “Senhor hemu ba. Senhor nia kuda kamelu sira nee mos hau sei foo hemu hotu.” Nee hatudu katak menina nee mak NAI hili ba hau nia patraun nia oan.’
45 Hau sei halo hela orasaun ho nonook deit, Rebeca too mai, nia tula nia sanan rai iha nia kabaas. Nia tuun ba posu hodi kuru bee. Bainhira nia sae fali, hau dehan ba nia, ‘Ajuda foo bee uitoan hau hemu lai.’
46 Nia hatuun lalais nia sanan hodi dehan, ‘Senhor hemu ba. Hau sei foo hemu mos senhor nia kuda kamelu sira.’ Nunee hau hemu, nia mos foo hemu hau nia kuda kamelu sira.
47 Hotu tiha hau husu, ‘Anoi nia aman naran saida?’
Nia hataan, ‘Hau nia aman naran Betuél, Naor ho Milka nia oan.’ Rona nunee hau tau brinkus ba nia inus, no tau kelu rua ba nia liman.
48 Depois hau hakruuk hodi adora NAI Maromak. Hau hahii NAI, hau nia patraun Abraão nia Maromak, tanba Nia lori hau mai hasoru kedas hau nia patraun nia alin nia bei-oan, atu menina nee bele kaben ho hau nia patraun nia oan.
49 Agora, se senhor sira atu hatudu domin ho laran luak ba hau nia patraun, foo hatene hau. Se lae mos, dehan deit mai, para hau bele hatene atu halo saida.”
50 Katuas nee koalia hotu ona, Labão ho Betuél hataan, “Ida nee mai husi NAI Maromak, entaun ami la bele koalia buat ida.
51 Rebeca mak nee. Bele lori nia baa, para nia kaben ho ita boot nia patraun nia oan, tuir buat nebee mak NAI Maromak desidi ona.”
52 Rona nunee, Abraão nia atan hakruuk too rai hodi agradese ba NAI Maromak.
53 Depois nia hasai buat furak oi-oin nebee halo husi osan mean ho osan mutin, ho hena di-diak foo ba Rebeca. Nia mos foo prezenti mesak karun deit ba Rebeca nia maun ho nia inan.
54 Hotu tiha katuas nee ho ema sira nebee hamutuk ho nia, sira haan-hemu, depois sira toba iha nebaa.
Aban dadeer-saan bainhira sira hadeer, katuas nee dehan, “Hau husu lisensa atu fila fali ona ba hau nia patraun.”
55 Maibee Rebeca nia maun ho nia inan hataan, “Husik menina hela lai ho ami loron sanulu hanesan nee, depois mak nia baa.”
56 Maibee katuas nee hataan, “Keta halo hau demora. NAI Maromak loke ona dalan para hau nia viajen nee hetan susesu. Nee duni husik hau sai ona hodi fila fali ba hau nia patraun.”
57 Sira hataan, “Mai ita bolu menina hodi husu took nia hanoin kona ba ida nee.”
58 Nunee sira bolu Rebeca hodi husu, “O hakarak baa ho katuas nee ka lae?”
Rebeca hataan, “Hau hakarak baa.”
59 Entaun sira foo lisensa ba Rebeca ho nia atan feto nebee hein nia dezde kiik atu baa ho Abraão nia atan ho ema nebee akompanha nia.
60 Sira foo bensaun ba Rebeca dehan,
“Alin, ami harohan atu o nia jerasaun sai barak teb-tebes, too tokon ba tokon.
Ami harohan atu o nia jerasaun hadau sira nia inimigu sira nia sidade.”
61 Depois Rebeca ho nia atan feto sira haloot sira nia sasaan, sira sae kuda kamelu hodi tuir kedas Abraão nia atan. Nunee Abraão nia atan fila fali lori ho Rebeca.
62 Iha tempu nebaa Isac fila ona husi bee posu Beer-Laai-Roi hodi hela fali iha rai Negeb.
63 Iha lokraik ida, loro matan besik atu monu ona, nia sai baa lao hodi halo meditasaun, nia foti oin, haree kuda kamelu lao mai.
64 Rebeca mos foti oin, haree Isac. Entaun nia tuun lalais husi nia kuda kamelu
65 hodi husu ba Abraão nia atan, “Mane ida lao mai nee see?”
Katuas nee hataan, “Nia nee hau nia patraun.” Entaun Rebeca foti veo hodi taka nia oin.
66 Katuas nee konta ba Isac kona ba buat hotu-hotu nebee akontese.
67 Depois Isac lori Rebeca tama ba iha nia inan Sara nia tenda laran, no nia hola Rebeca sai nia kaben. Nia hadomi teb-tebes Rebeca, nunee nia la tristi tan ona kona ba nia inan nia mate.