25
Abraão kaben fali
1 Abraão hola fali feto seluk naran Ketura.
2 Ketura ho Abraão hetan oan nain neen. Sira nia naran mak Zinran, Joksán, Medán, Midián, Isbak ho Suá.
3 Joksán nia oan Sabá ho Dedán. Dedán nia jerasaun mak ema Asúr, ema Letus ho ema Leum.
4 Midián nia oan Efá, Efer, Enoke, Abida ho Elda. Sira nee hotu Ketura nia jerasaun.
5 Abraão foo nia riku-soin tomak ba Isac.
6 Bainhira Abraão sei moris, nia foo prezenti ba nia feen kiik sira nia oan sira, depois haruka sira baa hela dook husi nia oan Isac, iha parte lorosae.
Abraão mate
7 Abraão moris too tinan 175.
8 Nia vida naruk, too katuas loos ona mak foin nia iis kotu, nia baa hamutuk ho nia bei-ala sira.
9-10 Nia oan Isac ho Ismael hakoi nia iha fatuk kuak Makpela, besik Manre. Rai nee uluk Abraão hola husi Zoar nia oan Efron, ema Ete. Abraão nia feen Sara mos hakoi iha nebaa.
11 Abraão mate tiha, Maromak foo bensaun ba nia oan Isac. Iha tempu nebaa, Isac hela besik bee posu Beer-Laai-Roi.
Ismael nia jerasaun
12 Nee Abraão nia oan Ismael nia jerasaun. Ismael nia inan mak Hagar, Sara nia atan ema Ejitu.
13 Ismael nia oan mane sira nia naran tu-tuir malu husi boot too kiik mak nee: Nebaiot mak oan primeiru. Tuir mai Kedar, Adbeel, Mibsaun,
14 Misma, Dumá, Masá,
15 Hadad, Temá, Jetur, Nafis ho Kedemá.
16 Sira nee Ismael nia oan. Sira nia jerasaun sai suku sanulu resin rua, suku ida-idak ho nia rain rasik. Rai ida-idak hanaran tuir sira nia bei-ala nia naran.
17 Ismael moris too tinan 137, depois nia hakotu iis hodi baa hamutuk ho nia bei-ala sira.
18 Nia jerasaun hela iha Havila ho Sur nia leet, besik rai Ejitu, iha dalan atu ba Asúr. Sira hela haketak aan husi Abraão nia jerasaun sira seluk.
Esaú ho Jacó moris
19 Abraão nia oan Isac nia istoria hanesan tuir mai nee.
20 Bainhira Isac kaben ho Rebeca, Isac tinan haat-nulu. Rebeca nia aman Betuél, no nia maun Labão. Sira nee ema Aram husi rai Padan-Aram.
21 Isac harohan ba NAI Maromak tanba Rebeca la kous. NAI Maromak simu nia orasaun, nunee Rebeca isin rua, oan kaduak.
22 Maibee labarik sira nee dudu malu beibeik iha nia isin. Rebeca hanoin, “Nusaa mak hanesan nee?” Entaun nia baa husu NAI Maromak.
23 NAI Maromak hatete ba nia,
“Oan nain rua iha o nia isin nee sei sai nasaun rua nia bei-ala;
o nia jerasaun nee sei sai povu rua nebee kontra malu.
Nasaun ida sei forti liu ida seluk;
maun sei serbi fali nia alin.”
24 Bainhira too ona nia loron, Rebeca tuur ahi oan mane kaduak.
25 Oan boot nia isin kor mean, nia isin fulun hotu. Nee mak sira tau naran Esaú.
26 Depois nia alin moris mai, kaer hela Esaú nia ain tuban. Nee mak sira tau nia naran Jacó. Bainhira sira nain rua moris, Isac tinan neen-nulu ona.
Esaú faan nia direitu nudar oan mane boot
27 Labarik nain rua nee boot ba dadauk. Esaú sai kasador diak ida, no gosta hela iha rai fuik. Maibee Jacó ema nebee kalma, nia gosta hela iha uma.
28 Isac hadomi liu Esaú, tanba nia gosta haan naan kasa. Maibee Rebeca hadomi liu Jacó.
29 Iha loron ida, Jacó daan hela koto mean, Esaú foin fila husi kasa mai, nia hamlaha loos.
30 Nia dehan ba Jacó, “Foo hahaan mean nee mai hau haan lai. Hau hamlaha loos!” (Nee mak ema bolu nia Edom.)
31 Jacó hataan, “Diak, naran katak foo lai maun nia direitu nudar oan mane boot mai hau.”
32 Esaú hataan, “O nian deit ba. Direitu oan mane boot nia folin saida mai hau? Hau atu mate ona nee!”
33 Maibee Jacó dehan, “Maun jura uluk lai!” Entaun Esaú jura hodi entrega nia direitu oan mane boot nian ba Jacó.
34 Hotu tiha Jacó foo paun ho koto ba nia. Esaú haan-hemu, depois nia hamriik baa ona. Ho nunee Esaú la foo folin ba nia direitu nudar oan mane boot.