26
NAI Maromak promete atu foo bensaun ba Isac
1 Iha tempu ida, rai hamlaha boot hanesan uluk akontese ona iha Abraão nia tempu. Nunee Isac baa iha rai Gerar hodi hasoru Abimelek, ema Filistin sira nia liurai.
2 Iha nebaa NAI Maromak hatudu Aan ba Isac hodi dehan, “La bele baa iha rai Ejitu, maibee hela iha rai nebee mak agora Hau atu foo hatene ba o.
3 Hela lai iha rai nee. Hau sei hamutuk ho o hodi foo bensaun ba o. Rai nee tomak Hau sei foo ba o ho o nia jerasaun sira. Hau sei kumpri juramentu nebee uluk Hau halo ba o nia aman Abraão.
4 Hau sei halo o nia jerasaun barak hanesan fitun iha lalehan, no Hau sei foo rai nee tomak ba sira. Liu husi o nia jerasaun, nasaun hotu-hotu iha mundu sei hetan bensaun.
5 Hau halo buat sira nee hotu tanba Abraão halo tuir Hau nia hakarak. Nia kumpri buat hotu nebee Hau haruka nia halo. Nia halo tuir Hau nia ukun fuan, Hau nia lei, ho Hau nia hanorin.”
6 Nunee Isac hela lai iha Gerar.
Isac bosok liurai Abimelek
7 Iha loron ida mane sira iha Gerar husu Isac kona ba nia feen. Isac hataan, “Nia nee hau nia feton.” Nia tauk atu dehan, “Nia hau nia feen,” tanba nia hanoin, “Ema iha nee bele oho hau hodi hadau Rebeca, tanba nia nee bonita loos.”
8 Isac hela kleur ona iha nebaa, iha loron ida Abimelek liurai Filistin nian hateke tuun husi janela, nia haree Isac hakuak nia feen Rebeca.
9 Entaun Abimelek haruka ema baa bolu Isac mai. Abimelek dehan ba Isac, “Nia nee o nia feen! Nusaa mak o dehan fali, o nia feton?”
Isac hataan, “Hau hanoin, keta halo be ema oho tiha hau hodi hadau nia.”
10 Abimelek dehan, “O halo saida ba ami nee? Se iha mane ruma toba ho o nia feen karik, ami hetan kastigu tanba o nia hahalok.”
11 Nunee Abimelek foo orden ba povu hotu-hotu dehan, “See mak book ema nee ka nia feen, hau sei kastigu mate nia.”
Ema Filistin istori malu ho Isac kona ba bee posu
12 Isac halo toos iha nebaa. Husi fini nebee nia kari, nia hetan fali rezultadu dala atus ida, tanba NAI Maromak foo bensaun ba nia.
13 Isac sai riku. Nia riku-soin aumenta barak ba beibeik, too nia sai riku boot.
14 Nia iha bibi ho karau barak, nia atan mos barak. Entaun ema Filistin sira laran moras ba nia.
15 Nunee sira taka tiha Isac nia bee posu hotu-hotu ho rai. Bee posu sira nee, uluk iha nia aman Abraão nia tempu, nia aman nia atan sira mak kee.
16 Too ikus Abimelek hatete ba Isac, “Muda sai tiha husi ami nia leet, tanba o iha ona kbiit boot liu ami.”
17 Nunee Isac sai husi fatin nee hodi baa hela iha rai tetuk Gerar nian.
18 Depois Isac kee fila fali bee posu sira nebee uluk kee iha nia aman Abraão nia tempu, tanba bainhira Abraão mate ema Filistin sira taka tiha ho rai. Bee posu hirak nee nia foo naran tuir naran nebee uluk nia aman Abraão foo tiha ona.
19 Isac nia atan sira kee bee posu ida iha rai tetuk Gerar nee, kona loos bee matan ida.
20 Maibee bibi atan sira husi Gerar nian haksesuk malu ho Isac nia bibi atan sira dehan, “Bee nee ami nian.” Nunee Isac hanaran bee posu nee Esek, tanba sira istori malu ho nia.
21 Depois Isac nia atan sira kee tan bee posu ida. Maibee bibi atan Gerar haksesuk malu tan ho sira tanba posu nee. Nee mak Isac hanaran bee posu nee Sitna.
22 Nia muda tiha husi nebaa, kee fali bee posu ida seluk. Iha nee la iha ida mak haksesuk malu kona ba bee posu nee, entaun nia hanaran Rehobot. Nia hatete, “NAI Maromak foo ona fatin luan ba ita, iha fatin nee ita bele buras.”
23 Husi fatin nee, Isac muda fali ba Berseba.
24 Iha kalan nee, NAI Maromak hatudu Aan ba nia hodi dehan, “Hau nee o nia aman Abraão nia Maromak. Keta tauk, tanba Hau hamutuk ho o. Hau sei foo bensaun ba o, no sei halo o nia jerasaun sai barak tanba Hau nia promesa ba Hau nia atan Abraão.”
25 Iha nebaa Isac harii altar ida. Nia temi NAI Maromak nia naran hodi adora Nia. Isac dada tenda hodi hela iha fatin nee, no nia atan sira kee bee posu ida.
Isac ho liurai Abimelek halo akordu
26 Iha tempu nee, Abimelek mai husi Gerar hamutuk ho nia belun boot naran Ahuzat ho mos nia komandante funu Fikól atu hasoru Isac.
27 Isac husu ba sira, “Uluk imi odi hau too haruka hau sai husi imi nia rain. Agora imi mai hasoru tan hau atu halo saida?”
28 Sira hataan, “Ami haree mo-moos ona katak NAI Maromak hamutuk ho senhor. Tanba nee ami hanoin, diak liu ita halo akordu hamutuk hodi jura dehan,
29 senhor sei la halo aat mai ami, hanesan ami mos uluk la book senhor. Ami simu senhor ho diak depois haruka senhor sai ho hakmatek, no agora senhor hetan ona bensaun husi NAI Maromak.”
30 Isac halo festa ba sira, no sira hotu haan-hemu hamutuk.
31 Iha aban dadeer-saan fali, sira halo juramentu ba malu. Hotu tiha Isac fahe malu ho sira, depois sira baa ho hakmatek.
32 Iha loron nee duni, Isac nia atan sira mai foo hatene ba nia kona ba bee posu nebee sira foin kee nee hodi dehan, “Ami hetan ona bee!”
33 Entaun Isac foo naran ba posu nee Seba. Too ohin loron ema bolu aldeia nee Berseba.
Esaú kaben ho feto husi suku seluk
34 Bainhira Esaú tinan haat-nulu, nia kaben ho feto nain rua husi suku Ete. Ida Beeri nia oan Judit, ida tan Elon nia oan Bazemat.
35 Feto nain rua nee halo Isac ho Rebeca laran susar.