3
NAI Maromak sei foo kastigu ba Nia povu nia inimigu
1 NAI Maromak dehan, “Bainhira buat sira nee akontese,
Hau sei hadia fali povu Judá ho Jerusalém sira nia moris.
2 Hau sei halibur nasaun hotu-hotu hamutuk
hodi lori sira tuun ba iha rai klean Josafat nian.
Iha nebaa Hau sei foo justisa ba sira
kona ba saida mak sira halo tiha ona ba Hau nia povu rasik, ema Israel.
Tanba sira halo namkari Hau nia povu ba iha nasaun sel-seluk,
no fahe Hau nia rai halo keta-ketak.
3 Sira dada rifa kona ba Hau nia povu;
sira faan mane oan sira para bele hetan feto luroon;
sira faan feto oan sira para bele hetan tua hodi hemu.
4 Agora povu sidade Tiru ho Sidon, ho rejiaun hotu-hotu rai Filístia nian, imi iha problema saida ho Hau? Imi kontra Hau atu halo saida? Imi atu selu fali buat aat ruma nebee Hau halo ona ba imi ka? Se nunee, saida mak imi halo, lalais deit Hau sei tidin fali ba iha imi nia ulun rasik.
5 Tanba imi foti tiha ona Hau nia osan mutin ho osan mean, imi lori tiha ona Hau nia sasaan mesak di-diak deit ba iha imi nia maromak sira nia uma lulik.
6 Imi mos faan tiha ema Judá ho ema Jerusalém sira ba ema Gregu, atu nunee imi bele hasai sira dook husi sira nia rain moris fatin.
7 Haree deit, Hau sei fanu sira para sai husi fatin nebee imi faan sira ba. Depois saida mak imi halo ona ba sira, Hau sei tidin fali ba iha imi nia ulun rasik.
8 Hau sei faan imi nia oan mane ho oan feto sira ba iha ema Judá, depois sira sei faan tutan imi nia oan sira ba ema Seba, nasaun ida nebee dook.” Ida nee NAI Maromak mak hatete.
9 Foo sai ba iha nasaun jentiu sira:
Prepara atu halo funu!
Haruka funu nain sira hamriik;
manda militar sira hakbesik mai hodi ataka.
10 Tuku tiha imi nia besi karau dikur sai fali surik;
tuku tiha imi nia katana sai fali diman.
Ema nebee fraku tenki dehan, “Hau nee makaas!”
11 Imi nasaun jentiu sira nebee hela besik Israel, mai lalais ba;
halibur hamutuk iha rai klean Josafat nian.
NAI, lori Ita Boot nia aswain sira tuun mai!
12 Nasaun jentiu sira tenki hamriik
hodi lao tuun ba iha rai klean Josafat nian,
tanba Hau, NAI Maromak sei tuur iha nebaa
hodi foo justisa ba nasaun jentiu sira hotu nebee hela besik Israel.
13 Sira nee hanesan trigu iha toos nebee tasak ona;
hodi katana lere ona ba!
Sira hanesan uvas fuan nebee nakonu ona iha tanki sama uvas nian;
tama hodi sama ba,
halo uvas nia been suli sai husi nia fatin,
tanba sira nia moris nakonu ho hahalok aat.
14 Ema lubuk boot, barak teb-tebes iha hela rai klean justisa nian,
tanba NAI nia loron besik dadauk iha rai klean justisa nee.
15 Loro matan ho fulan sei sai nakukun tiha;
fitun la foo naroman tan.
16 NAI Maromak foo sai ho lian makaas husi foho Siaun;
Nia lian tarutu iha Jerusalém,
halo lalehan ho rai nakdoko tiha.
Maibee NAI mak fatin seguru ba Nia povu;
Nia mak povu Israel nia abrigu.
17 “Nunee imi sei hatene katak Hau, NAI imi nia Maromak,
Hau hela iha Hau nia foho santu Siaun.
Jerusalém sei sai santu;
militar husi rai liur nunka atu hadau tan rai nee.
18 Iha tempu nee tua foun sei turu tuun husi foho bo-boot;
susu been suli tuun husi foho kiik sira.
Bee sei suli iha mota hotu-hotu iha rai Judá;
bee matan sei suli sai husi NAI nia uma
hodi habokon rai klean Xitim nian.
19 Maibee rai Ejitu sei sai mamuk;
Edom sei sai rai maran fuik,
tanba ema husi rai nee halo violensia hasoru povu Judá;
iha rai Judá nee sira halo ema nia raan fakar maski ema sira nee la sala.
20 Rai Judá, ema sei hela nafatin ba nafatin;
Jerusalém, ema sei hela husi jerasaun ba jerasaun.
21 Hau atu husik deit sira nebee fakar tiha ona ema sala-laek nia raan ka?
Lae! Hau sei kastigu sira.”
NAI Maromak hela iha foho Siaun.