2
NAI Maromak haruka gafanhotu estraga rai hanesan fali tropas
1 Huu bibi dikur iha foho Siaun;
halo alarme lian iha Hau nia foho santu.
Ema hotu iha rai nee nakdedar ba,
tanba NAI nia loron besik dadauk ona;
loron nee besik loos ona.
2 Loron nee loron nakukun boot nian;
kalohan metan mahar taka metin rai.
Tropas lubuk boot nebee forsa makaas nadodon mai,
hanesan nakukun falun dadauk foho hotu.
Buat hanesan nee nunka akontese iha tempu uluk,
no sei la akontese tan iha tempu oin mai.
3 Gafanhotu sira nee haan mohu rai hanesan ahi;
iha sira nia kotuk ahi lakan sae makaas.
Rai iha oin matak hanesan toos Eden,
maibee iha kotuk rai fuik maran,
buat ida mos la moris.
4 Tropas sira nee haree ba hanesan kuda;
sira halai mai hanesan kuda funu nian.
5 Sira halo lian barulhu hanesan kuda kareta funu nian;
sira haksoit liu foho tutun sira;
sira halo lian tarutu hanesan ahi lakan boot nebee haan duut maran;
sira hanesan militar bar-barak nebee prontu atu baa funu.
6 Povu nebee haree, tauk too nakdedar;
ida-idak nia oin sai kamutis tiha.
7 Tropas sira halai mai hanesan funu nain;
sira sae moru hanesan soldadu.
Sira hotu-hotu marxa tuir formatura,
la lao sees husi sira nia dalan.
8 Sira avansa la dudu malu;
sira marxa nafatin ida-idak tuir nia dalan.
Sira hasoru tropas sidade nia diman, sira baa oin nafatin,
la troka sira nia formatura.
9 Sira halai tama ba sidade laran;
sira halai tuir moru leten.
Sira sae ba uma laran;
sira tama liu husi janela hanesan ema naok-teen.
10 Rai nakdoko iha sira nia oin;
lalehan nakdedar.
Loro matan ho fulan sai nakukun tiha;
fitun sira la foo naroman tan.
11 NAI Maromak nia lian sai mai hanesan rai tarutu iha Nia militar sira nia oin;
Nia tropas barak teb-tebes, sura la bele.
Nia tropas sira nee makaas teb-tebes;
sira halo tuir Nia orden.
NAI nia loron nee boot teb-tebes;
loron nee halo ema tauk nakdedar, see mak bele aguenta?
NAI Maromak haruka Nia povu arepende
12 NAI Maromak hatete, “Agora tempu sei iha;
fila fali mai Hau ho laran tomak,
ho jejun, tanis halerik ho laran susar.
13 Lalika lees imi nia hena,
maibee lees imi nia fuan.
Fila fali ba NAI imi nia Maromak,
tanba Nia laran diak no laran luak,
Pasiensia Nain no nakonu ho domin rohan-laek;
Nia prontu dada fila fali dezastre nebee mak Nia atu foo.
14 See mak hatene, keta halo be Nia laran nakfilak,
Nia dada fali Nia kastigu
hodi husik hela bensaun ba imi;
karik NAI imi nia Maromak hatuun trigu ho tua
para imi bele oferese fali ba Nia.
15 Huu bibi dikur iha foho Siaun;
haruka ema hotu-hotu halo jejun iha Maromak nia oin;
halibur povu hamutuk iha Nia prezensa.
16 Bolu hamutuk povu tomak;
halo sira sai moos atu sira bele mai iha Hau nia prezensa.
Halibur katuas lia nain sira;
halibur labarik sira too kiik oan sira nebee sei susu hela.
Haruka noivu sai husi nia kuartu laran;
haruka noiva sai husi nia tenda kazamentu.
17 Nai lulik sira nebee serbi NAI Maromak iha Nia uma kreda,
tenki tanis iha odamatan ho altar nia klaran.
Sira tenki dehan, ‘NAI, hanoin Ita Boot nia povu;
keta husik ema hamoe Ita Boot nia riku-soin;
la bele husik nasaun sira soe lia ba ami.
Nusaa mak povu husi rai sel-seluk dehan ba malu,
“Ema sira nee nia Maromak iha nebee?” ’ ”
NAI Maromak promete atu hadia fali Nia povu nia moris
18 Depois NAI Maromak hanoin teb-tebes Nia rain;
Nia hatudu laran luak ba Nia povu.
19 NAI Maromak hataan nunee ba Nia povu:
“Hau sei hatuun trigu musan, tua foun ho mina azeite,
para imi haan-hemu too bosu.
Hau sei la husik tan nasaun seluk hamoe imi.
20 Tropas sira nebee mai husi parte norte, Hau sei hadook tiha husi imi;
Hau sei dudu sira tama ba iha rai maran dekor.
Sira nebee forma iha parte lorosae, sei mout iha Tasi Mate;
sira nebee forma husi parte loromonu, sei tama ba iha Tasi Mediteráneu.
Sira nia isin sei dodok dois.
NAI Maromak halo tiha ona buat boot!
21 Rai Judá, lalika tauk;
haksolok no haklalak ba!
Tanba NAI halo tiha ona buat boot.
22 Imi animal fuik sira, lalika tauk,
tanba duut iha rai fuik sai matak dadauk;
ai huun sira nia fuan iha fali ona;
ai figeira ho ai uvas foo fuan tebar nakonu.
23 Povu Siaun haksolok ba;
haklalak tanba NAI imi nia Maromak.
Nia sempre kaer metin Nia liafuan;
Nia hatuun tiha ona udan hanesan baibain;
udan monu rai tuir nia tempu, too udan ikus mos tuir nia tempu.
24 Fatin nebee baibain ema baku trigu musan sei nakonu fali;
tua foun ho mina azeite nia fatin mos sei nakonu too suli sai.
25 Buat nebee gafanhotu estraga tiha ona iha tinan barak nia laran,
Hau sei foo fali;
Hau sei selu fali saida deit mak gafanhotu grupu primeiru, gafanhotu boot sira, gafanhotu lotuk sira ho gafanhotu sel-seluk haan tiha ona.
Sira lubuk boot nee Hau nia tropas;
Hau mak manda ba iha imi nia klaran.
26 Agora imi sei hetan ai haan barak too bosu;
imi sei foti aas NAI imi nia Maromak nia naran.
Nia halo tiha ona buat furak ba imi;
Hau nia povu nunka atu moe tan.
27 Nunee imi sei hatene katak Hau iha hela ema Israel sira nia klaran;
Hau mak NAI imi nia Maromak,
la iha tan maromak seluk.
Hau nia povu nunka atu moe tan.
28 Hotu tiha,
Hau sei haruka Hau nia Espiritu tuun ba iha ema hotu-hotu.
Imi nia oan feto ho oan mane sira
sei foo tutan Hau nia lia menon.
Imi nia ferik-katuas sira sei mehi buat nebee mak Hau foo ba sira;
imi nia joven sira sei haree buat nebee mak Hau hatudu ba sira.
29 Hau sei haruka Hau nia Espiritu
tuun ba iha Hau nia atan mane ho atan feto sira iha tempu nee.
30 Hau sei halo sinal oi-oin iha lalehan nebee halo ema admira,
no halo sinal oi-oin iha mundu,
hanesan raan, ahi ho ahi suar sae makaas.
31 Loro matan sei sai nakukun;
fulan sei sai mean hanesan raan.
Hotu tiha mak foin NAI nia loron too.
Iha loron ida nee NAI Maromak sei hatudu sai Nia kbiit boot, halo ema tauk teb-tebes.
32 Maibee see mak husu tulun ba NAI
sei hetan salvasaun.
Tanba iha foho Siaun ho Jerusalém, ema balu sei konsege moris,
hanesan NAI Maromak dehan tiha ona.
Ema nebee NAI hili mak sei moris.”