Joel
1
Povu Israel halerik tanba gafanhotu haan mohu ai haan iha toos
1 NAI Maromak nia liafuan tuun ba Petuel nia oan Joel dehan nunee:
2 Imi katuas lia nain sira, rona mai;
ema hotu nebee moris iha rai nee, see tilun mai.
Buat hanesan nee akontese ona iha imi nia moris ka?
Buat hanesan nee mosu ona iha imi nia bei-ala sira nia tempu ka?
3 Konta buat sira nee ba imi nia oan sira;
sira tenki konta fali ba sira nia oan,
no sira nia oan konta tutan ba jerasaun tuir mai.
4 Saida mak gafanhotu grupu primeiru haan la hotu iha toos laran,
gafanhotu bo-boot mai haan tiha;
saida mak gafanhotu boot sira haan la hotu,
gafanhotu lotuk sira mai haan tiha;
saida mak gafanhotu lotuk sira haan la hotu,
gafanhotu sel-seluk mai haan moos tiha.
5 Imi lanu-teen sira, hadeer ona, tanis ona ba!
Hemu tua door sira, halerik ba!
Halerik husu tua foun,
tanba ema hadau ona husi imi nia ibun.
6 Nasaun ida mai ataka ona hau nia rain.
Sira nee forsa boot, sura la bele;
sira nia nehan hanesan liaun nia nehan;
sira nia nehan kroat hanesan liaun inan nian.
7 Nasaun nee estraga tiha ona hau nia toos uvas;
sira halo rahun tiha hau nia ai figeira.
Sira loke ai figeira nia kulit hodi soe tiha,
halo ai sanak bo-boot sai mutin ona.
8 Imi tanis lelir ba, hanesan feto virjen nebee hatais lutu
hodi tanis ba nia noivu nia mate isin.
9 Ema la lori tan oferta trigu ho tua
ba iha NAI Maromak nia uma.
Tanba nee nai lulik sira halerik;
ema nebee serbi NAI Maromak laran susar.
10 Toos rahun tiha ona;
rai maran dekor tiha;
trigu iha toos laran estraga tiha ona;
tua foun sai maran tiha;
mina azeite mos la iha tan.
11 Imi toos nain sira, halerik ba!
Ema nebee servisu iha toos uvas nian, tanis ba!
Tanba trigu iha toos mohu tiha ona;
rezultadu toos estraga tiha ona.
12 Uvas huun maran tiha ona;
ai figeira namlaik hotu;
rumaun, ai tamara, masaan huun,
ai huun iha toos laran, hotu-hotu maran;
povu nia ksolok mohu ona.
13 Imi nai lulik sira, hatais lutu hodi tanis ho laran susar ba;
imi nebee serbi iha altar oin, tanis halerik ba.
Imi nebee serbi hau nia Maromak,
hatais lutu hodi mai halerik kalan tomak.
Tanba iha imi nia Maromak nia uma
la iha tan oferta trigu ho oferta tua.
14 Haruka ema hotu-hotu halo jejun iha Maromak nia oin;
halibur povu hamutuk iha Nia prezensa.
Bolu hamutuk katuas lia nain sira
ho ema hotu nebee moris iha rai nee
baa iha NAI imi nia Maromak nia uma
hodi husu tulun ba NAI.
15 Ai! Susar ona,
tanba NAI nia loron besik ona;
iha loron nee mak Maromak Kbiit Nain hatuun dezastre.
16 Loos duni, ita nia ai haan hasai tiha ona husi ita nia oin;
ksolok ho kontenti lakon tiha ona husi ita nia Maromak nia uma.
17 Fini nebee kuda iha rai la tubun;
armazen sira abandona too naksobu tiha,
tanba rezultadu toos la iha.
18 Animal hakiak sira halerik hela;
karau sira lao tuun-sae,
tanba la iha ona duut ba sira;
bibi malae sira mos terus.
19 NAI Maromak, hau halerik husu tulun ba Ita Boot,
tanba ahi haan hotu ona duut iha rai fuik;
ahi lakan haan mohu tiha ona ai huun hotu-hotu iha fat-fatin.
20 Animal fuik sira mos halerik ba Ita Boot,
tanba bee mota maran hotu ona,
no ahi haan hotu ona duut iha rai fuik.