Lia matenek husi liurai Lemuel nia inan
31
1 Ida nee mak lia matenek todan nebee liurai Lemuel nia inan hanorin ba nia.
2 Hau nia oan, hau mak tuur ahi o, uluk kedas hau promete atu entrega o ba NAI Maromak;
hau atu koalia saida ba o?
3 La bele gasta enerjia hodi hola feto barak;
keta lakon tempu ba feto sira nebee mak estraga liurai.
4 Lemuel, tua la merese ba liurai;
liurai laos atu hemu tua;
ukun nain sira la bele kaan atu hemu tua forti.
5 Se sira hemu too lanu, sira sei haluha buat nebee lei haruka
hodi viola fali ema kbiit-laek nia direitu.
6 Tua nee ba ema nebee besik atu mate
ka ba ema nebee terus ho laran susar.
7 Husik sira hemu hodi haluha tiha sira nia kiak,
no la hanoin tan sira nia terus.
8 Loke o nia ibun hodi defende ema nebee la iha kbiit atu koalia;
defende ema sira nebee kiak rabat rai.
9 Loke o nia ibun, tesi lia ho lo-loos
hodi proteje ema kiak ho ema kbiit-laek sira nia direitu.
Feen nebee diak
10 Feen nebee hatudu laran osan mean, see mak bele hetan?
Feen hanesan nee valor boot liu fali fatuk murak diak nian.
11 Nia laen laran metin ba nia;
buat diak ida la falta ba nia laen.
12 Iha nia moris tomak, nia nunka halo aat ba nia laen;
nia halo buat mesak diak deit.
13 Nia hili bibi fulun ho kabas atu halo hena;
nia badinas servisu ho nia liman rasik.
14 Nia sosa ai haan nebee mai husi fatin dook;
nia hanesan roo nebee tula sasaan mai husi rai liur.
15 Dadeer-saan nakukun, nia hadeer ona
hodi prepara hahaan ba nia familia uma laran,
no fahe hahaan ba nia atan feto sira.
16 Nia fihir rai, depois nia sosa;
nia uza nia osan rasik hodi kuda uvas.
17 Nia kesi metin nia kanotak atu servisu makaas;
nia liman forti hodi halao nia knaar.
18 Nia hatene katak nia hetan lukru boot husi nia kosar been;
nia ahi oan la mate iha tempu kalan.
19 Nia liman kaer roka nebee tau tiha ona kabas rahun;
nia liman fuan dulas kabas.
20 Nia foo liman ba ema kiak sira;
nia lolo liman hodi tulun ema kbiit-laek sira.
21 Iha tempu rai malirin, nia la tauk kona ba nia familia uma laran,
tanba sira hotu hatais hena mahar diak nian.
22 Nia suku hena hodi taka ba nia kama;
nia hatais ropa furak ho folin karun nian.
23 Bainhira nia laen tuur hamutuk ho katuas lia nain sira seluk iha portaun sidade nian,
ema konhese kedas.
24 Nia suku ropa husi hena diak nian hodi faan,
no faan sintu ba ema kontratu nain sira.
25 Nia iha kbiit ho naran diak;
nia la tauk kona ba loron aban nian.
26 Nia koalia ho matenek;
nia hanorin ema ho laran luak.
27 Nia kontrola saida deit mak halao iha uma laran ho diak,
no nunka atu baruk.
28 Nia oan sira hamriik hodi tane aas nia;
nia laen mos gaba nia dehan,
29 “Iha feto barak mak halo buat diak tebes,
maibee o diak liu sira hotu.”
30 Oin bonita lohi deit, oin furak sei lakon lalais deit,
maibee feen nebee hamtauk NAI Maromak, ema tenki gaba duni.
31 Foo nia kolen tuir buat nebee nia halo tiha ona;
tanba nia hahalok diak nee mak ema lubuk boot gaba nia iha portaun sidade nian.