Lia matenek husi Agur
30
1 Lia matenek todan husi Jaqué nia oan Agur ba Itiel ho Ukal. Nia dehan nunee:
2 “Hau nee beik liu ema hotu-hotu;
hau la iha neon.
3 Hau nunka aprende atu sai matenek;
hau la iha konhesimentu kona ba Ida nebee santu.
4 See mak sae tiha ona ba iha lalehan, depois tuun fali mai?
See mak raut hamutuk ona anin iha nia liman laran?
See mak falun bee ho hena?
See mak hatuur mundu nia rohan?
Nia naran saida? Nia oan naran saida?
Imi hatene karik, hatete took mai hau.
5 Maromak nia liafuan hotu-hotu loos;
Nia defende ema nebee buka mahon iha Nia.
6 Liafuan nebee Nia foo sai, o keta aumenta fali,
se lae Nia siak o hodi hatudu katak o nee bosok-teen.
7 NAI, iha buat rua mak hau hakarak husu ba Ita Boot;
hataan buat rua nee durante hau sei moris:
8 Tulun hau atu hau la bele koalia lia bosok ka lohi ema;
keta husik hau sai kiak liu ka riku liu,
maibee foo ai haan loro-loron nian mai hau.
9 Se lae, hau hetan barak liu karik, hau bele nega fali Ita Boot
hodi dehan, “NAI nee see fali?”
Se hau sai kiak karik, hau bele naok,
nunee hatuun fali hau nia Maromak nia naran.
10 Keta hatete aat atan ida ba nia patraun,
se lae atan nee sei foo malisan ba o, too ikus o sei lori todan.
11 Iha ema balu foo fali malisan ba sira nia aman,
no la husu Maromak foo bensaun ba sira nia inan.
12 Iha ema balu konsidera nia aan moos hela,
afinal sira nia laran foer teb-tebes, nunka fase.
13 Iha ema balu foti aan liu;
sira nia matan haree ema la vale.
14 Iha ema balu nia nehan hanesan surik
ka hanesan tudik nebee kroat
hodi haan ema kbiit-laek sira iha mundu;
hodi haan hotu ema kiak sira husi ema kriatura nia klaran.
15 Ular susu raan iha oan feto rua;
sira hakilar, “Foo mai! Foo mai!”
Iha buat tolu mak nunka atu bosu,
iha buat haat mak nunka dehan, “Too ona!”
16 Rate,
feto nebee la bele hetan oan,
rai nebee presiza nafatin bee,
no ahi nebee nunka dehan, “Too ona.”
17 See mak fihir nia aman la vale buat ida,
no lakohi halo tuir nia inan,
manu metan mota nian sei fokit sai tiha nia matan musan;
manu kawaa sei haan tiha nia mate isin.
18 Iha buat tolu mak halo hau admira teb-tebes;
iha buat haat mak hau la kompriende:
19 Oinsaa manu makikit semo iha leten aas,
oinsaa samea dolar iha fatuk leten,
oinsaa roo halai iha tasi klaran,
no oinsaa mane ida tuir feto klosan ida.
20 Feen nebee halo sala ho mane seluk, nia hahalok nunee:
nia haan tiha, depois hamoos nia ibun
hodi dehan, “Hau la halo sala ida.”
21 Iha buat tolu mak halo rai la hakmatek;
iha buat haat mak halo rai la aguenta:
22 Atan nebee sai fali liurai,
ema beik-teen nebee iha ai haan barak,
23 feto nebee ema hakribi liu, maibee sai fali kaben nain,
no atan feto nebee troka fali nia patraun feto nia fatin.
24 Iha animal haat iha mundu mak kiik,
maibee matenek teb-tebes:
25 Nehek, maski forsa la iha,
sira halibur ai haan iha tempu bailoron.
26 Koelhu mos la iha kbiit,
maibee sira bele hela iha fatuk boot nia leet.
27 Gafanhotu la iha liurai,
maibee sira halo formatura hodi lao ba oin.
28 Teki ema bele kaer ho liman,
maibee nia mos bele hela iha liurai nia palasiu.
29 Iha animal tolu mak lao hatudu kbiit;
iha buat haat mak hakat ho fiar aan:
30 Liaun, nia mak forti liu animal sira seluk,
nia hasoru saida deit la hakiduk.
31 Manu aman nebee lao loke liras,
bibi aman,
no liurai nebee hamriik iha nia tropas nia oin.
32 Se karik o hatudu hahalok beik hodi gaba o nia aan rasik,
karik o halo ona planu aat,
entaun taka tiha o nia ibun.
33 Tanba ema doko beibeik susu been, nia rezultadu sai fali manteiga;
ema buti metin inus, raan sai mai,
nunee mos provoka ema hirus hamosu istori malu.