29
1 See mak ulun toos nafatin maski ema koriji fila-fila,
sei rahun derepenti, atu hadia fali la bele ona.
2 Bainhira ema moris loos ukun, povu haksolok,
maibee bainhira ema aat mak ukun, povu halerik hela deit.
3 See mak gosta matenek, nia halo haksolok nia aman nia laran,
maibee see mak ranxu feto luroon, nia gasta arbiru nia riku-soin too mohu.
4 Liu husi justisa liurai hametin nasaun,
maibee liurai nebee obriga povu selu taxa makaas loos, nia estraga fali nasaun.
5 Ema nebee mak kos-kose nia maluk,
tau hela lasu ba nia maluk ain.
6 Ema aat nia sala rasik sai lasu ba nia aan,
maibee ema moris loos sei haksolok ho hananu.
7 Ema nebee moris loos hatene tuir ema kiak nia direitu,
maibee ema aat la interese.
8 Ema kontra door halo sidade sai rungu-ranga,
maibee ema matenek halo malirin fali ema nia laran.
9 Bainhira ema matenek lori ema beik-teen ba iha tribunal,
ema beik-teen nee sei hamnasa fali hodi hatete aat nia, nunee la iha dame.
10 Ema nebee hamrook raan, nia odi ema nebee laran moos;
nia buka dalan atu hasai ema moris loos nia vida.
11 Ema beik-teen fakar sai hotu hirus nebee iha nia laran,
maibee ema matenek hatene domina aan.
12 Bainhira nai ulun see tilun fali ba lia bosok,
nia funsionariu sira sei sai aat hotu.
13 Iha buat ida mak halo ema kiak ho ema hanehan door hanesan:
NAI Maromak mak halo sira nain rua nia matan bele haree.
14 Liurai nebee foo justisa ba ema kiak ho lo-loos,
nia ukun sei dura nafatin.
15 Koriji labarik no baku ho rota mak nia sai matenek,
maibee labarik nebee mak husik hela deit, sei hamoe nia inan.
16 Bainhira ema aat aumenta barak, pekadu mos aumenta,
maibee too ikus ema moris loos sei haree sira monu.
17 Eduka o nia oan, nunee nia sei halo o hakmatek;
nia sei halo o nia laran haksolok.
18 Bainhira Maromak la foo sai Nia hakarak ba ema, povu sei moris rungu-ranga,
maibee ema nebee mak kaer metin ukun fuan, nia hetan ksolok.
19 Koriji atan ida ho liafuan deit la too;
maski nia kompriende, maibee nia sei la halo tuir.
20 O haree ema nebee mak koalia la hanoin antes ka?
Nia futuru aat liu fali ema beik-teen.
21 Se patraun halo tuir nia atan nia hakarak husi joven kedas,
too ikus atan nee halo nia patraun terus.
22 Ema nebee hirus-teen hamosu istori malu;
ema nebee laran nakali lalais, nia halo sala barak.
23 See mak foti aan, sei sai kiik,
maibee ema nebee mak haraik aan, sei hetan respeitu.
24 See mak hamaluk ho naok-teen, nia sai inimigu ba nia aan rasik;
nia jura ona atu foo sasin ho loos maibee lakohi hatete sai.
25 See mak tauk ema, nia tauk nee mak hanesan lasu ba nia,
maibee see mak laran metin ba NAI Maromak, nia moris seguru.
26 Ema barak hakaas aan atu hasoru malu ho ukun nain,
maibee justisa mai husi NAI Maromak.
27 Ema moris loos hakribi ema lohi door;
ema aat hakribi fali ema laran moos.