28
1 Ema aat halai maski la iha ema ida mak duni tuir nia,
maibee ema moris loos aten brani hanesan liaun.
2 Bainhira ema iha nasaun ida sai kontra door, sei iha ukun nain barak hadau malu poder;
bainhira nai ulun ida matenek hodi ukun, nasaun nee forti no hakmatek.
3 Ema kiak nebee mak halo terus fali ema kbiit-laek,
nia hanesan udan boot nebee estraga ai haan iha toos.
4 See mak lakohi halo tuir lei, nia gaba fali ema aat,
maibee see mak kaer metin lei, nia kontra ema aat.
5 Ema aat la kompriende justisa,
maibee ema nebee buka NAI Maromak kompriende di-diak.
6 Diak liu ema kiak nebee hahalok loos,
duke ema riku nebee moris tuir dalan kleuk.
7 Oan nebee halo tuir lei, nia nee matenek,
maibee see mak ranxu ema kaan-teen, halo moe nia aman.
8 Se ema ruma hariku nia aan ho osan funan nebee makaas liu,
too ikus riku-soin nee monu fali ba ema nebee hatudu laran diak ba ema kiak.
9 See mak taka tilun ba NAI Maromak nia ukun fuan,
nia atu halo orasaun mos, Maromak hakribi.
10 See mak lori ema moris loos tuir fali dalan aat, sei monu ba rai kuak nebee nia rasik kee,
maibee ema nebee laran moos sei hetan buat diak.
11 Ema riku bele konsidera nia aan matenek,
maibee ema kiak nebee kompriende klean, konhese hela nia.
12 Bainhira ema moris loos manaan poder, ema barak kontenti loos,
maibee bainhira ema aat komesa ukun, ema sei subar aan tiha.
13 See mak subar nia hahalok aat, nia moris sei la lao ba oin,
maibee see mak foo sai no husik tiha nia pekadu, Maromak sei hatudu laran luak ba nia.
14 See mak sempre hamtauk NAI Maromak, sei hetan ksolok,
maibee see mak fuan toos, sei monu ba susar laran.
15 Ema aat nebee ukun povu kbiit-laek,
nia hanesan liaun nebee hakilar ka animal ursu nebee ataka ema.
16 Ukun nain nebee la iha kapasidade, hanehan makaas povu,
maibee nai ulun nebee lakohi haan matak povu nia sasaan, hanaruk nia vida.
17 See mak hasai ema seluk nia vida,
nia sei halai hela deit durante nia moris tomak;
lalika tulun ema hanesan nee.
18 Ema nebee moris ho laran moos, nia dalan seguru,
maibee ema nebee mak lao kleuk tuun-sae, sei monu derepenti.
19 See mak servisu badinas iha nia toos, sei hetan ai haan barak,
maibee see mak halai tuir fali buat nebee la iha folin, sei sai kiak rabat rai.
20 Ema nebee ita bele fiar, simu bensaun barak,
maibee ema nebee hakarak sai riku lalais, sei la sees husi kastigu.
21 Atu nar-naran hasae ema ida hodi hatuun ema seluk, nee la diak;
maski nunee ema balu halo sala tan deit atu hetan paun pedasuk ida.
22 See mak karak-teen, nia kaan atu sai riku lalais,
maibee nia la hatene katak kiak hein hela nia.
23 See mak koriji ema seluk, too ikus ema sei gosta liu nia
duke gosta ema nebee mak gaba ho ibun tutun deit.
24 See mak hadau nia inan-aman nia riku-soin,
depois dehan, “Nee la sala ida,”
nia sai maluk ba ema kriminozu.
25 Ema nebee matan naklosu ba osan, hamosu istori malu,
maibee ema nebee laran metin ba NAI Maromak, nia sei moris diak.
26 See mak sadere ba nia hanoin rasik, nia beik-teen;
ema nebee moris tuir matenek sei moris seguru.
27 See mak tulun ema kiak, nia sei la falta buat ida,
maibee ema nebee mak taka matan ba ema kiak, sei hetan malisan oi-oin.
28 Bainhira ema aat manaan poder, ema subar aan tiha,
maibee bainhira sira mate tiha, ema moris loos aumenta barak.