27
1 Keta gaba aan kona ba loron aban,
tanba o la hatene saida mak sei akontese iha loron aban-bainrua.
2 Lalika gaba o nia aan rasik, husik ema seluk mak gaba o;
husik ema nebee o la konhese mak gaba, laos o nia ibun rasik.
3 Fatuk todan, rai henek mos todan,
maibee se beik-teen provoka ema, nee todan liu tan.
4 See mak laran nakali, nia la hanoin ema, nia hirus hanesan bee boot nebee estraga rai;
aat liu tan mak ema nebee laran moras ba nia maluk, la iha ema ida mak bele aguenta.
5 Diak liu koriji ema iha nia oin
duke hadomi nia sub-subar.
6 Kolega halo kanek ita mos, nia intensaun diak,
maibee inimigu rei ita fila-fila.
7 Ema nebee bosu, atu haan bani been nia enjoa tiha,
maibee ema nebee hamlaha, buat moruk mos nia senti midar.
8 Ema nebee lao husik tiha nia uma,
nia hanesan manu nebee semo husik hela nia knuuk.
9 Mina morin ho ai been morin halo ema nia laran haksolok;
ema nebee foo moral ho laran tomak ba nia kolega, halo nia kolega sai kontenti.
10 Keta haluha o nia kolega ka o nia aman nia kolega;
bainhira o hetan susar, lalika baa iha o nia maun-alin nia uma;
diak liu baa vizinhu nebee besik duke maun-alin nebee dook.
11 Oan, sai matenek ba, halo hau nia laran haksolok ba,
nunee hau bele hataan ema nebee hatuun hau.
12 Ema neon matenek haree situasaun perigu, nia lao sees tiha,
maibee ema matan tomak lao ba oin nafatin, too ikus hetan terus.
13 Se karik ema fuik deve osan iha o, depois ema seluk mak responsabiliza fali tusan nee, entaun o tenki foti pinoor husi ema nee;
se nia responsabiliza atu selu ema estranjeiru nia tusan ba o, rai di-diak sasaan nebee nia pinoor.
14 Se ema kumprimenta nia vizinhu ho lian makaas iha dadeer-saan sedu,
nia vizinhu senti liafuan nee aat fali.
15 Feen nebee mak gosta istori malu,
nia hanesan udan been nebee turu beibeik liu husi uma kakuluk kuak.
16 Hapara nia, nee hanesan hapara anin,
ka hanesan raut mina iha liman laran.
17 Besi kadi besi sai kroat liu;
nunee mos ema aprende husi nia maluk sai diak liu.
18 See mak hakiak ai figeira sei haan nia fuan;
see mak kuidadu nia patraun sei hetan respeitu.
19 Bee bele leno sai ema nia oin;
nunee mos ema nia laran sai lalenok ba nia aan rasik.
20 Mate ho matebian nia fatin, ru-rua nunka bosu;
nunee mos ema nia matan sempre kaan buat ruma.
21 Ema uza ahi hodi koko osan mean ho osan mutin,
nunee mos bainhira ita gaba ema, ita bele hatene tuir nia laran.
22 Maski o tau ema beik-teen iha lesu laran hodi fai hamutuk ho batar,
maibee nia hahalok beik nunka atu muda.
23-24 Riku-soin laos dura tinan ba tinan;
liurai nia ukun mos la dura husi jerasaun ba jerasaun.
Nunee hatene tuir o nia bibi;
kuidadu o nia animal sira ba.
25 Lere tiha duut iha foho atu duut nee bele buras fali;
duut nebee lere nee rai hamutuk para foo haan animal iha tempu malirin.
26 Nunee bibi malae oan bele iha fulun atu o halo ropa,
no o bele faan bibi balu hodi sosa rai.
27 O sei hetan bibi nia susu been barak hodi foo haan o nia familia,
too o nia atan feto sira mos hetan hotu.