26
1 Se ema beik-teen hetan naran diak,
nee hanesan neve monu fali iha rai manas, no hanesan udan boot iha tempu kolheta.
2 Malisan la kona ema nebee la sala,
hanesan manu fuik nebee semo baa semo mai, ain la kona rai.
3 Sikoti hodi baku kuda, freiu hodi tau ba kuda buru nia ibun;
rota hodi baku ema beik-teen nia kotuk.
4 Se ema beik-teen husu buat beik ba o, keta hataan ho beik,
se lae o mos beik hanesan nia.
5 Se ema beik-teen husu buat beik ba o, hataan tuir nia beik,
se lae nia konsidera aan matenek.
6 See mak haruka fali ema beik-teen lori lia menon,
nia hanesan ema nebee tesi nia ain rasik ka hemu veneno.
7 Se ema beik-teen mak foo sai fali lia matenek ruma,
nia liafuan hanesan ema nia ain nebee mamar tiha, lao la bele.
8 See mak tane aas ema beik-teen,
nia hanesan ema nebee tau fatuk ba iha fiska depois kesi metin fali.
9 Se ema beik-teen mak repete fali lia matenek ruma nebee nia rona,
nee hanesan lanu-teen kaer ai sanak tarak hodi baku ba-mai.
10 Ema nebee foo servisu ba ema beik-teen ka ba see-see deit mak liu dadauk,
nia hanesan ema hana door nebee hakanek ema arbiru.
11 Bainhira asu muta, nia rasik sei lambe fila fali;
nunee mos ema beik-teen repete fali nia hahalok beik.
12 O haree ema nebee estilus matenek ka?
Nia futuru aat liu fali ema beik-teen nian.
13 Ema baruk-teen dehan, “Liaun iha hela dalan nebaa;
liaun iha rai luan nebaa!”
14 Hanesan odamatan nia dobralisa nebee dulas aan ba-mai,
nunee mos ema baruk-teen duir aan ba-mai iha nia toba fatin.
15 Ema baruk-teen hatama liman ba iha bikan laran,
maibee nia baruk atu foti hahaan hodi tau ba nia ibun.
16 Ema baruk-teen konsidera nia aan matenek
liu fali ema nain hitu nebee foo resposta ho neon.
17 See mak mete fali ema seluk nebee istori malu,
nia hanesan ema nebee dada asu nia tilun iha dalan.
18-19 Ema nebee lohi nia maluk
depois dehan, “Hau koalia halimar deit,”
nia hanesan ema bulak nebee hana rama oan lakan,
rama oan nebee hamate ema.
20 Bainhira ai sunu hotu ona, ahi la lakan tan;
bainhira ema lori lia door la iha ona, istori malu para ona.
21 See mak gosta istori malu, nia sunu ema atu haksesuk malu,
hanesan ema nebee tau ahi anar ba ahi klaak, ka tau ai ba ahi halo lakan boot.
22 See mak konta ema nia vida, nia liafuan hanesan fali hahaan midar;
liafuan nebee nia foo sai tama too ema nia fuan laran.
23 Ema laran aat nebee koalia ho ibun midar,
nia hanesan sanan rai nebee pinta halo furak.
24 Ema nebee rai odiu, finji koalia ho ibun midar,
maibee nia laran bosok-teen.
25 Maski nia koalia ho mamar, keta fiar nia,
tanba nia laran nakonu ho hahalok aat oin hitu.
26 Maski nia lohi tuun-sae hodi subar nia odiu nee,
maibee nia hahalok aat sei hatudu sai iha ema lubuk boot nia oin.
27 See mak kee rai kuak sei monu rasik ba iha laran;
see mak duir fatuk, fatuk nee sei fila hanehan nia.
28 Ema bosok-teen odi ema nebee mak nia hakanek;
see mak kos-kose ema sei hamosu dezastre.