Lia matenek balu tan husi liurai Salomão
25
1 Iha tan lia matenek husi Salomão. Liurai Judá ida naran Ezequias nia funsionariu mak hakerek tuir.
2 Ema hahii Maromak tanba buat nebee Maromak la hatudu sai;
ema gaba liurai tanba buat nebee liurai deskobre.
3 Liurai sira nia laran, ema ida la bele hatene;
sira nia hanoin aas hanesan lalehan no klean hanesan tasi.
4 Hasai tiha foer husi osan mutin
mak badaen bele halo buat nebee furak.
5 Hasai tiha ema aat husi liurai nia oin
mak liurai nia ukun bele dura tanba nia ukun ho justisa.
6 La bele foti aan iha liurai nia oin;
lalika baa hamriik iha nai ulun sira nia klaran.
7 Diak liu liurai dehan ba o, “Sae mai iha nee,”
duke nia hatuun o iha ema boot nia oin.
Se o nia matan haree buat ruma,
8 la bele ansi baa hatoo keixa iha tribunal.
Se lae ema bele hamoe o,
depois o atu halo saida tan?
9 Bainhira o istori malu ho o nia vizinhu,
keta foo sai nia segredu.
10 Se lae ema nebee rona bele hamoe fali o,
nunee o nia naran sai aat nafatin ba nafatin.
11 Liafuan nebee hatoo tuir nia tempu
hanesan osan mutin nebee enfeita ho osan mean.
12 Se ema see tilun bainhira ema matenek koriji nia,
nee hanesan nia simu brinkus osan mean ka kadeli osan mean diak nian.
13 See mak foo tutan patraun nia lia menon ho lo-loos,
nia hanesan bee malirin iha tempu manas
hodi halo kontenti patraun nia laran.
14 Ema nebee gaba aan hodi promete atu foo prezenti, maibee la foo,
nia hanesan kalohan no anin nebee la hatuun udan.
15 Ema nebee pasiensia bele muda nai ulun nia hanoin;
liafuan mamar bele halo ema ulun toos sai mamar tiha.
16 Se o hetan bani been, hemu natoon;
keta hemu too bosu liu, depois muta sai fali.
17 Keta baa beibeik iha o nia vizinhu nia uma;
keta halo be nia baruk too la gosta o.
18 Ema nebee foo sasin falsu kona ba nia maluk,
nia hanesan ai dona, surik ka rama oan nebee mak kroat.
19 Konfia ema lohi door iha susar laran,
nee hanesan nata hahaan ho nehan nebee dodok ka lao ho ain nebee naksalak.
20 See mak hananu kantiku ksolok nian ba ema nebee laran susar,
nia hanesan hasai ema nia faru manas iha tempu malirin,
no hanesan fui tua siin ba kanek.
21 Se karik o nia inimigu hamlaha, foo hahaan ba nia para nia haan,
se karik nia hamrook, foo bee ba nia hemu.
22 Se o halo nunee, nia sei moe,
no NAI Maromak sei selu buat nebee mak o halo.
23 Anin nebee huu husi parte norte halo udan tuun;
nunee mos koalia konta ema nia vida halo ema oin buis.
24 Diak liu hela iha uma kakuluk nia lidun,
duke hela uma ida ho feen nebee gosta istori malu.
25 Novidade diak husi rai dook,
hanesan bee malirin ba ema nebee hamrook.
26 Ema moris loos nebee rende iha ema aat sira nia oin,
hanesan bee matan merak ka hanesan bee inan nebee foer.
27 Hemu bani been barak, la diak;
nunee mos buka naran, la diak.
28 Ema nebee la hatene domina aan,
nia hanesan sidade nebee la iha ona moru haleu.