24
19
1 Keta laran moras ba ema aat,
lalika buka atu ranxu sira.
2 Tanba sira nia kakutak planu hela atu halo violensia;
sira nia ibun koalia oinsaa atu halo susar ema.
20
3 Hodi matenek ema harii uma;
hodi kapasidade nia halo uma metin;
4 hodi konhesimentu nia enxe uma
ho sasaan mesak furak ho folin karun.
21
5 Ema matenek iha poder boot;
ema nebee iha konhesimentu, aumenta nia forsa.
6 Tanba bainhira ema matenek hatudu dalan, o bele halo funu;
ho matenek nain barak nia ideia, o sei manaan.
22
7 Lia matenek aas liu ba ema beik-teen;
bainhira ema tesi lia iha portaun sidade nian, ema beik-teen taka ibun deit.
23
8 See mak hanoin aat hela deit,
ema sei hanaran problema door.
9 Planu saida deit mak ema beik-teen halo, nee pekadu;
see mak sai kontra door, ema sei hakribi nia.
24
10 Se o foti liman deit iha tempu susar,
o nee forsa kiik liu.
25
11 Se ema lori vitima ida atu ba oho, salva tiha ba;
bainhira vitima nee lao bulelu ba iha fatin nebee ema atu oho nia, defende nia ba.
12 Se o dehan fali, “Kona ba ida nee, ami la hatene buat ida,”
Maromak ida nebee koko ema nia laran, la haree fali ka?
Ida nebee kuidadu o nia moris, la hatene ka?
Nia sei selu fali ema ida-idak tuir saida mak sira halo.
26
13 Oan, haan bani been nee diak ba o;
bani been husi nia knuuk nee midar iha o nia ibun.
14 Nunee mos matenek nee midar ba o nia moris;
se o hetan matenek, o nia futuru sei sai diak;
buat nebee o hein sei akontese ba o.
27
15 Keta subar hanesan ema kriminozu hodi hafuhu fali ema moris loos nia uma;
keta estraga nia hela fatin.
16 Tanba ema nebee moris loos bele monu too dala hitu mos, sei hamriik fila fali,
maibee ema aat monu ba susar laran, hakdasak kedas.
28
17 La bele kontenti bainhira o nia inimigu monu ba terus laran;
se nia monu hakdasak, o nia laran keta haksolok.
18 Tanba NAI Maromak haree o nia hahalok nee la diak,
nunee Nia la fakar tan Nia hirus ba ema nee.
29
19 Keta preokupa ho ema aat sira;
keta laran moras ba ema nebee hahalok aat.
20 Tanba ema aat la iha futuru diak;
sira nia ahi oan sei mate.
30
21 Oan, hamtauk NAI Maromak, hamtauk mos liurai;
keta lao hamutuk ho kontra door sira.
22 Tanba derepenti NAI Maromak ho liurai hamonu sira ba susar laran;
dezastre nebee mosu, see mak bele hatene tuir?
Lia matenek tan
23 Tuir mai iha tan lia matenek husi matenek nain.
Se juis nebee tesi lia haliis ba parte ida, nee la loos.
24 Se nia hatete fali ba ema nebee halo sala dehan, “O la sala ida,”
entaun povu sei foo malisan ba nia, nasaun seluk sei hatete aat nia.
25 Maibee se nia kastigu ema nebee halo sala,
nia sei moris diak no hetan bensaun oi-oin.
26 See mak hataan ema ho lo-loos,
nia hatudu nia aan nudar kolega diak ida.
27 Halo hotu tiha o nia servisu iha liur,
prepara o nia toos,
depois mak foin harii o nia uma.
28 Keta foo testemunha nar-naran hasoru o nia vizinhu;
o nia ibun keta foo sai lia falsu.
29 Keta dehan, “Saida mak nia halo mai hau, hau sei halo fali ba nia;
hau sei selu fali saida mak nia halo ona mai hau.”
30 Hau lao liu husi ema baruk-teen nia toos;
hau lao liu husi ema kakutak mamuk nia toos uvas.
31 Hau haree ba, duut tarak mak buras iha toos laran;
duut aat mak moris nakonu tiha iha nia rai laran;
nia lutu fatuk mos monu tiha ona.
32 Hau hanoin di-diak kona ba buat nebee hau haree nee;
buat nebee hau haree nee, hau aprende hanesan lisaun ida.
33 Ema baruk teen dehan, “Hau toba uitoan lai, toba halimar lai,
hakuak liman hodi deskansa lai.”
34 Nunee kiak sei mosu mai derepenti hanesan naok-teen;
mukit sei mai hanesan ema nebee kaer kroat.