23
6
1 Bainhira o tuur hodi haan hamutuk ho nai ulun ruma,
foo atensaun di-diak ba saida mak iha o nia oin.
2 Se karik o gosta haan barak,
tau tudik ba iha o nia kakorok.
3 La bele kaan hahaan furak nebee uma nain nee prepara;
keta halo be nia tau hahaan nee atu lasu o.
7
4 Lalika gasta o nia forsa tomak atu sai riku;
sai matenek ba, keta duni tuir riku-soin.
5 Tanba o hateke lalais deit, riku-soin la iha tiha ona;
derepenti iha liras hanesan manu makikit hodi semo aas tiha.
8
6 Lalika haan ema karak-teen nia ai haan;
keta kaan hahaan furak nebee nia prepara,
7 tanba ema hanesan nee sempre sura tu-tuir sasaan nia folin;
nia ibun dehan, “Mai haan-hemu ba!” Maibee nia laran lakohi foo.
8 Hahaan uitoan nebee o tolan tiha ona, o sei muta sai fali;
ohin o gaba nia mos saugati deit.
9
9 Keta koalia ba ema beik-teen,
tanba nia sei la simu matenek nebee o foo sai ba nia.
10
10 Fatuk nebee uluk kedas marka baliza rai nian, o la bele muda fali;
keta hadau oan kiak sira nia rai.
11 Tanba sira nia Defensor iha kbiit boot;
Nia sei foti sira nia kazu hodi kontra fali o.
11
12 Foo atensaun ba hau nia hanorin;
see tilun ba lia matenek nebee hau foo.
12
13 La bele tauk atu eduka o nia oan;
kastigu nia ho rota sei la hamate nia.
14 Kastigu o nia oan ho rota,
nunee o bele salva nia husi matebian sira nia fatin.
13
15 Oan, se o matenek,
hau mos kontenti;
16 bainhira o nia ibun koalia lia loos,
hau nia laran sei haksolok teb-tebes.
14
17 Keta laran moras ba ema aat,
maibee hakaas aan hamtauk NAI Maromak.
18 Nunee o nia futuru sei sai diak;
buat nebee o hein sei akontese ba o.
15
19 Oan, rona mai, sai matenek ba;
hanoin di-diak oinsaa atu moris tuir dalan loos.
20 La bele ranxu ema nebee lanu-teen
ka ema nebee kaan-teen ba naan.
21 Tanba lanu-teen ho kaan-teen sei sai kiak;
sira hatais ropa mesak naklees tanba sira matan dukur hela deit.
16
22 Rona o nia aman, nia mak foo moris ba o;
bainhira o nia inan ferik ona, o tenki respeita nafatin nia.
23 Hakaas aan atu aprende lia loos, keta troka fali lia loos ho riku-soin;
sai matenek ba, aprende ba, sai ema nebee kompriende klean ba.
24 Aman ida laran haksolok teb-tebes bainhira nia oan moris loos;
nia kontenti teb-tebes ho oan nebee matenek.
25 Nunee halo kontenti o nia inan-aman ba;
halo haksolok inan nebee kous o.
17
26 Oan, loke o nia laran mai hau;
hateke beibeik ba hau nia lalaok moris.
27 Tanba feto luroon hanesan rai kuak nebee naruk;
feto nebee ulun bulak hanesan bee posu kloot ida.
28 Nia hanesan naok-teen nebee hafuhu hela ema atu asalta;
nia halo mane barak la kumpri sira nia promesa ba sira nia feen.
18
29 See mak terus? See mak laran susar?
See mak istori malu? See mak halerik?
See mak hetan kanek saugati?
See mak matan mean?
30 Ema nebee hemu tua too kalan boot;
ema nebee gosta koko tua kahur ho buat oi-oin.
31 Keta matan lakan ba tua kor mean kapaas
nebee nabilan iha kalis laran
no suli tuun mamar loos iha kakorok.
32 Too ikus tua nee tata o hanesan samea,
no moruk hanesan samodok nia veneno.
33 Depois o nia matan sei haree buat nebee oin seluk liu,
no o nia laran foo sai liafuan arbiru.
34 O sai hanesan ema nebee bulelu iha tasi klaran;
o sai hanesan ema nebee latan aan iha roo nia riin leten.
35 O sei dehan, “Ema baku hau, maibee la moras ida;
ema tuku hau fila-fila, maibee hau la senti buat ida.
Bainhira loos mak hau bele hadeer fali
hodi hetan tan tua?”