22
1 Naran diak nia folin boot liu riku-soin;
hetan respeitu diak liu duke hetan osan mean ho osan mutin.
2 Iha buat ida mak halo ema riku ho ema kiak hanesan:
NAI Maromak mak kria sira nee hotu.
3 Ema neon matenek haree situasaun perigu, nia lao sees tiha,
maibee ema matan tomak lao ba oin nafatin, too ikus hetan terus.
4 Haraik aan no hamtauk NAI Maromak
halo ema sai riku, hetan naran diak no vida naruk.
5 Dalan nebee ema aat lao tuir, iha ai tarak ho lasu,
maibee see mak kuidadu nia vida, nia lao sees tiha husi dalan nee.
6 Hanorin labarik sira atu tuir dalan nebee loos,
nunee bainhira sira ferik-katuas ona, sira sei la husik dalan nee.
7 Ema riku ukun ema kiak;
see mak deve ema nia osan, nia sai atan ba osan nain.
8 Ema nebee kuda hahalok aat, nia kuu dezastre;
nia atu fakar sai nia hirus ba ema, la bele ona.
9 Ema laran diak sei simu bensaun,
tanba nia fahe nia hahaan ba ema kiak sira.
10 Duni sai tiha kontra door mak istori malu mos la iha ona;
haksesuk malu no hatete aat malu sei la iha tan.
11 Ema nebee gosta moris ho laran moos, no koalia ho mamar,
nia sei sai liurai nia belun diak.
12 NAI Maromak proteje lia loos,
maibee Nia hamonu tiha ema traidor nia liafuan.
13 Ema baruk-teen dehan, “Liaun iha hela liur nebaa;
se hau sai karik, hau sei mate iha dalan.”
14 Feto ulun bulak nia ibun hanesan rai kuak klean;
mane nebee NAI Maromak atu kastigu, sei monu tama ba laran.
15 Hahalok beik belit iha labarik sira nia laran;
bainhira uza rota hodi hanorin mak bele halakon hahalok nee husi sira.
16 Ema nebee haan matak ema kiak hodi hariku fali nia aan,
no ema nebee foo prezenti ba ema riku, too ikus sei sai kiak hotu.
Lia matenek tolu-nulu
17 See tilun hodi rona matenek nain sira nia liafuan;
foo atensaun ba buat nebee hau hanorin.
18 Tanba bainhira o rai liafuan nee iha o nia laran,
no o nia ibun prontu foo tutan, o sei hetan ksolok.
19 Agora hau foo sai matenek nee ba o, ba o duni,
atu o bele laran metin ba NAI Maromak.
20 Hau hakerek lia matenek tolu-nulu ba o;
lia matenek nee hatudu dalan ba o, no halo o hatene klean.
21 Liafuan sira nee sei halo o hatene buat nebee loos ho tebes,
atu nunee o bele hataan ho lo-loos ba ema nebee haruka o mai.
1
22 Keta hanehan ema kiak tanba deit nia kiak;
bainhira tesi ema kbiit-laek nia lia, keta tau todan ba nia.
23 Tanba NAI Maromak sei defende ema kbiit-laek;
see mak hasai sira nia direitu, NAI sei hasai ema nee nia vida.
2
24 Keta halo belun ho ema nebee mak nervozu aat;
keta ranxu ema nebee hirus door.
25 Se lae o bele aprende hahalok aat husi nia;
too ikus o tama ba lasu laran, o sai fali la diak.
3
26 Se karik ema seluk deve osan, keta responsabiliza nia tusan nee;
lalika promete atu selu sasaan nebee ema seluk deve.
27 Se o la konsege selu fali tusan nee,
ema sei mai foti o nia sasaan too hiit hotu o nia toba fatin.
4
28 Fatuk nebee o nia bei-ala sira hatuur
hodi marka baliza rai, o la bele muda fali.
5
29 Haree took ema nebee matenek halao nia servisu;
Nia sei serbi liurai, laos ema kiik.