21
1 Liurai nia neon iha NAI Maromak nia liman laran;
nia hanoin hanesan bee nebee suli tuir NAI nia dalan.
2 Tuir ema nia hanoin, saida mak nia halo loos hotu,
maibee NAI Maromak mak koko ema nia laran.
3 NAI Maromak gosta liu ema halo buat nebee loos ho justu,
duke hasae sakrifisiu ba Nia.
4 Hahalok foti aan no halo aan sai hanesan fali matadalan ba ema aat;
hahalok nee pekadu.
5 Ema nebee iha planu diak no servisu badinas sei hetan moris diak,
maibee ema nebee ansi atu riku lalais, sei sai kiak.
6 Riku-soin nebee mak ema hetan liu husi dalan lohi
hanesan ahi suar nebee lakon derepenti, no hanesan lasu nebee hamate nia.
7 Violensia nebee ema aat halo, too ikus sei dada nia ba rai kuak,
tanba nia lakohi halo buat nebee loos.
8 Ema aat nia dalan kleuk ba-mai,
maibee ema laran moos nia hahalok sempre loos.
9 Diak liu hela iha uma kakuluk nia lidun
duke hela uma ida ho feen nebee gosta istori malu.
10 Ema aat nia laran hamlaha-hamrook ba violensia,
too nia maluk mos nia la hanoin tan.
11 Bainhira kastigu ema kontra door, ema nebee la iha esperiensia moris haree hodi aprende;
Bainhira hanorin ema nebee iha ona matenek, nia sei aprende liu tan.
12 Maromak Justisa Nain haree tu-tuir ema aat nia uma kain;
Nia sei hamonu ema aat ba iha dezastre laran.
13 See mak taka tilun ba ema kbiit-laek nia halerik,
too tempu ida nia rasik husu ajuda, sei la hetan.
14 Prezenti nebee ita foo ba ema ho nonook, sei hamaus ema nia laran;
prezenti nebee foo ho subar halo malirin tiha nia laran nakali.
15 Bainhira justisa lao tuir nia dalan, ema nebee moris loos kontenti,
maibee ema nebee gosta halo buat aat sei tauk teb-tebes.
16 See mak lao sees husi ema matenek nia dalan,
sei baa hamutuk ho matebian sira.
17 See mak hakarak moris goza deit, too ikus sei sai kiak;
ema nebee kaan atu hemu tua no tau mina morin, nunka sai riku.
18 Terus nebee ema moris loos atu hetan, too ikus monu fali ba ema aat;
susar nebee ema diak atu hetan, kona fali ema traidor.
19 Diak liu hela iha rai fuik maran,
duke hela hamutuk ho feen nebee gosta istori malu no hirus door.
20 Iha ema matenek nia uma iha riku-soin boot no ai haan diak nian,
maibee ema beik-teen gasta hotu buat nebee nia iha.
21 See mak hakaas aan halo buat nebee loos no hadomi ema seluk,
nia sei hetan vida naruk, moris diak no respeitu.
22 Ema matenek bele asalta aswain sira nia sidade
hodi harahun tiha fatin seguransa nebee sira konfia.
23 Ema nebee kuidadu nia ibun ho nia liafuan,
nia proteje aan husi susar.
24 See mak foti aan no gaba aan, ema bolu nia “kontra door”;
nia halo aan la hotu-hotu.
25 Ema baruk-teen nia hakarak mak oho fali nia,
tanba nia liman lakohi halo servisu.
26 Ema baruk-teen sempre kaan buat oi-oin deit,
maibee ema nebee moris loos foo sasaan ba ema ho laran luak.
27 Bainhira ema aat hasae sakrifisiu ba NAI Maromak, NAI hakribi,
saa taan ema foo ho hanoin nebee aat.
28 Ema nebee foo sasin falsu, nia sei mate,
maibee ema nebee rona ho atensaun, bainhira nia foo sasin, ema seluk sei simu.
29 Ema aat hatudu oin mahar,
maibee ema nebee laran moos tetu ho kuidadu saida mak nia atu halo.
30 La iha matenek, la iha neon,
la iha planu ida mak bele kontra NAI Maromak too manaan.
31 Soldadu sira bele prepara kuda atu halo funu,
maibee atu manaan ka lae, NAI Maromak mak desidi.