20
1 Tua provoka ema sai kontra door, serveja provoka ema halo rungu-ranga;
see mak hemu too lanu, nia la iha neon.
2 Bainhira liurai laran nakali, nia hanesan liaun nebee hakilar makaas;
see mak provoka liurai nia hirus, sei lakon nia vida.
3 See mak hadook aan husi konflitu, sei hetan naran diak,
maibee ema beik-teen gosta istori malu.
4 Ema baruk-teen lakohi fila rai tuir nia tempu;
too tempu kolheta nia baa haree toos, la hetan buat ida.
5 Ema nia hanoin hanesan bee posu nebee klean,
maibee ema nebee kompriende bele kuru.
6 Ema barak deklara aan katak sira hatene hadomi ho laran tomak,
maibee ema nebee mak firmi nafatin, iha ka lae?
7 Ema nebee moris loos sempre halo buat nebee diak;
nia oan sira mos hetan ksolok.
8 Bainhira ukun nain tuur hodi foo justisa,
nia taes evidensia ida-idak hodi soe tiha buat nebee la diak.
9 See mak bele deklara dehan, “Hau nia laran moos hela”?
See mak bele dehan, “Hau moos hela, la iha sala ida”?
10 Dasin nebee tetu la loos ka sasukat nebee falsu,
NAI Maromak hakribi buat rua nee hotu.
11 Ema bele konhese labarik sira husi sira nia lalaok;
sira nia hahalok hatudu sira moris loos no laran moos ka lae.
12 Iha tilun hodi rona, iha matan hodi haree;
buat rua nee NAI Maromak mak kria hotu.
13 Keta toba dukur hela deit, se lae o bele sai kiak;
hadeer ba, atu o bele iha ai haan barak too resin.
14 Ema nebee atu sosa dehan, “Sasaan nee la diak, la diak liu!”
Depois nia baa gaba aan dehan nia hetan sasaan diak ho folin baratu.
15 Ema bele iha osan mean ho morteen barak,
maibee liafuan matenek folin boot, hanesan fatuk murak karun nian.
16 Se karik ema fuik deve osan iha o, depois ema seluk mak responsabiliza fali tusan nee, entaun o tenki foti pinoor husi ema nee;
se nia responsabiliza atu selu ema estranjeiru nia tusan ba o, rai di-diak sasaan nebee nia pinoor.
17 Ai haan nebee ema naok, haan ba gostu,
maibee too ikus nia senti hanesan fatuk britas iha nia ibun laran.
18 Rona uluk ema matenek nia hanoin mak o nia planu sai realidade;
molok atu baa halo funu, husu uluk matenek nain nia opiniaun.
19 See mak konta ema nia vida, nia loke ema nia segredu,
nunee keta ranxu ema nebee ibun boot.
20 See mak hatete aat nia inan-aman,
nia ahi oan sei mate iha tempu nakukun.
21 See mak foti nia inan-aman nia riku-soin la tuir nia tempu,
too ikus riku-soin nee laos sai bensaun ba nia.
22 Keta dehan, “Hau sei halo aat fali ema nebee mak halo aat hau;”
diak liu hein NAI Maromak, Nia sei tulun o.
23 NAI Maromak hakribi dasin nebee tetu la loos;
sasukat nebee falsu Nia la gosta.
24 NAI Maromak mak desidi dalan nebee ema lao tuir,
nunee oinsaa mak ita bele hatene buat nebee sei akontese iha ita nia moris?
25 Se o promete atu foo buat ruma ba NAI Maromak maibee la tetu di-diak antes,
entaun o monta lasu ba o nia aan.
26 Liurai nebee matenek haketak ema aat
hodi foo kastigu todan ba sira.
27 Ita ema nia espiritu hanesan ahi oan nebee NAI Maromak foo ba ita
hodi leno sai buat nebee iha ita nia laran.
28 Domin ho lia loos mak proteje liurai;
se liurai hatene hadomi, nia ukun sei dura.
29 Ema gaba joven sira tanba sira forti;
ema respeita ferik-katuas sira tanba sira fuuk mutin.
30 Liu husi baku makaas mak bele muda ema nia hahalok aat;
kastigu hanesan nee mak bele hamoos ema nia laran.