19
1 Diak liu sai ema kiak nebee moris loos
duke sai ema beik-teen nebee lohi door.
2 Se ema hakarak teb-tebes halo buat ruma maibee la hatene halo, nee la diak;
see mak ansi atu lalais, sei lao sala dalan.
3 Ema balu estraga sira nia moris liu husi sira nia hahalok beik,
depois sira nia laran hirus fali NAI Maromak.
4 Ema riku hetan kolega barak,
maibee ema kiak nia kolega husik tiha nia mes-mesak.
5 Ema nebee mak foo sasin falsu, nia sei hetan kastigu;
see mak habelar lia bosok, nia sei lori todan.
6 Ema barak koko atu manaan ema boot nia laran;
ema nebee gosta foo prezenti hetan belun barak.
7 Ema kiak nia maun-alin la gosta nia;
saa tan nia belun, sira hadook aan tiha husi nia.
Nia lao tuir hela sira hodi husu tulun,
maibee la hetan ema ida atu ajuda nia.
8 See mak hetan matenek hodi kompriende, nia hadomi nia aan rasik;
see mak kaer metin buat nebee nia aprende, nia moris diak.
9 Ema nebee foo sasin falsu, sei la sees husi kastigu;
see mak habelar lia bosok, sei lakon mohu.
10 Ema beik-teen la merese atu moris hanesan ema riku;
aat liu tan mak atan ida ukun fali nai ulun sira.
11 See mak iha neon diak, nia iha pasiensia;
ema gaba nia tanba nia hatene foo perdaun.
12 Bainhira liurai laran nakali, nia hanesan liaun nebee hakilar makaas;
bainhira nia haree diak ema, nia hanesan mahobeen iha duut leten.
13 Oan nebee kakutak mamuk lori dezastre ba nia aman;
feen nebee gosta istori malu, hanesan bee nebee turu tuun la para.
14 Ema bele hetan uma ho riku-soin husi nia inan-aman,
maibee feen nebee neon matenek, NAI Maromak mak foo.
15 Ema nebee baruk-teen toba haluha rai;
ema nebee lakohi book aan, sei hamlaha.
16 See mak halo tuir ukun fuan, kuidadu nia vida,
maibee see mak lakohi foo folin ba nia lalaok moris, nia sei mate.
17 See mak hatudu laran luak ba ema kiik, NAI Maromak konsidera hanesan tusan ida;
NAI sei selu fali nia hahalok diak nee.
18 Koriji o nia oan bainhira o sei bele;
se o lakohi eduka nia, nee hanesan o hakarak lori nia ba mate.
19 Ema nebee nervozu aat, nia tenki hetan kastigu;
se o salva nia, o presiza salva beibeik.
20 Rona ho atensaun bainhira ema hanorin ka koriji o,
nunee too ikus o sai ema matenek ida.
21 Ema nia ulun nakonu ho planu oi-oin,
maibee NAI Maromak mak desidi saida mak sei akontese.
22 Buat nebee ema hakarak mak domin ho laran tomak;
diak liu moris kiak duke bosok tuun-sae.
23 Ema nebee hamtauk NAI Maromak, sei hetan vida naruk;
nia sempre hetan ksolok, susar la besik nia.
24 Ema baruk-teen hatama liman ba iha bikan laran,
maibee nia atu foti hahaan tau ba nia ibun, nia baruk.
25 Se o baku ema kontra door, ema nebee la iha esperiensia moris bele aprende oinsaa atu moris;
se o koriji ema nebee kompriende klean ona, nia sei hatene liu tan.
26 Ema nebee hadau nia aman nia uma hodi duni sai nia inan;
ema nee halo moe aan no hafoer nia familia nia naran.
27 Oan, se o lakohi atu rona tan bainhira ema eduka o,
o sei fila kotuk ba buat nebee o aprende tiha ona.
28 Ema nebee foo sasin falsu, nia hatuun fali justisa;
ema aat kaan hahalok aat hanesan fali hahaan midar.
29 Ema kontra door merese hetan kastigu;
ema beik-teen merese atu ema baku.