18
1 See mak lakohi liga ema seluk, nia hanoin deit nia aan;
nia kontra ideia diak saida deit mak foo ba nia.
2 Ema beik-teen lakohi atu kompriende buat ida;
nia so hakarak foo sai nia ideia rasik.
3 See mak halo sala, ema sei haree nia la vale;
sira sei hamoe nia no tarata aat nia.
4 Liafuan nebee sai husi ema matenek nia ibun hanesan bee nebee klean;
matenek nia huun hanesan bee matan nebee mak suli sai.
5 Atu defende fali ema aat
hodi hamate justisa ba ema nebee moris loos, hahalok nee la diak.
6 Ema beik-teen nia ibun hamosu istori malu;
nia liafuan provoka ema atu baku nia.
7 Ema beik-teen nia liafuan halo terus nia aan rasik;
nia ibun sai lasu ba nia aan.
8 See mak konta ema nia vida, nia liafuan hanesan fali hahaan midar;
liafuan nebee nia foo sai, tama too fuan laran.
9 Ema nebee baruk servisu,
nia hanesan ho ema estraga door.
10 NAI Maromak hanesan postu seguransa nebee metin;
ema nebee moris loos halai ba iha nebaa hodi hetan salvasaun.
11 Ema riku sira nia sasaan hanesan moru forti nebee haleu sidade;
sira hanoin sira nia riku-soin hanesan fali moru aas hodi proteje sira.
12 Ema nebee foti aan, too ikus sei monu rahun;
ema tenki haraik aan mak foin hetan respeitu.
13 See mak seidauk rona ema nia liafuan maibee hataan kedas,
nia hatudu nia beik no hamoe nia aan rasik.
14 Ema nebee espiritu forti sei aguenta iha moras laran,
maibee see ema lakon vontade moris, nia atu aguenta oinsaa?
15 Ema nebee iha neon matenek aprende beibeik;
ema nebee kompriende klean, see tilun ba lia matenek.
16 Prezenti nebee ema haruka uluk ba ema boot
loke odamatan ba nia atu tama iha ema boot nee nia prezensa.
17 See mak koalia uluk iha tribunal, ema hanoin nia mak loos,
too ema seluk mai hodi investiga nia.
18 Ema balu rezolve problema liu husi dada rifa;
ho nunee bele hapara ema boot sira istori malu.
19 See mak hakanek nia maluk nia fuan, nia atu hakbesik fali susar liu duke tama iha moru aas laran;
istori malu haketak ema hanesan portaun boot nebee xavi metin.
20 Liafuan matenek nebee ema foo sai lori buat diak ba nia;
nia liafuan too ikus foo rezultadu nebee halo nia kontenti.
21 Ema nia liafuan bele halo ema mate ka moris;
see mak gosta koalia, nia liafuan sei fila fali ba nia.
22 Se mane hola feto nebee diak, nia sorti boot;
nia simu prezenti furak ida husi NAI Maromak.
23 Ema kiak husu tulun ho haraik aan,
maibee ema riku hataan ho siak.
24 Iha ema balu lori terus ba nia kolega,
maibee belun nebee diak foo laran liu duke maun-alin.