17
1 Diak liu haan paun maran fuan ida maibee haan ho hakmatek,
duke uma laran tomak festa hela deit maibee istori malu la hotu-hotu.
2 Se patraun nia oan halo moe rai, entaun atan nebee matenek sei manda fali nia;
bainhira patraun mate, atan nee mak hetan riku-soin hamutuk ho patraun nia oan sira seluk.
3 Ema uza ahi hodi koko osan mean ho osan mutin,
maibee ita ema nia laran, NAI Maromak mak koko.
4 Ema aat see tilun ba ema nebee ibun aat;
ema bosok-teen gosta rona liafuan nebee hatuun ema.
5 See mak hatete aat ema kiak sira, hatuun sira nia Kriador;
see mak hamnasa fali ema nebee hetan dezastre, nia la sees husi kastigu.
6 Ferik-katuas sira nia ksolok mak bei-oan sira;
oan sira nia ksolok mak sira nia inan-aman.
7 Ema beik-teen la merese koalia liafuan nebee aas;
saa tan ukun nain atu koalia lia bosok nee, la merese liu.
8 Iha ema balu hanoin foo osan husi kotu-kotuk bele halo milagre ba nia;
hodi osan nee, nia halo saida deit, lao diak hotu.
9 See mak foo perdaun ba nia maluk, nia hametin domin,
maibee see mak konta fila-fila nia maluk nia sala, sei lakon belun diak ida.
10 See mak kompriende klean, ema koriji nia dala ida deit iha folin ba nia,
maibee see mak kakutak mamuk, ema baku dala atus ida mos nia la aprende buat ida.
11 Ema aat gosta liu hamriik hasoru ukun nain sira;
too ikus ukun nain sira sei haruka ema foo kastigu todan ba nia.
12 Diak liu hasoru animal siak nebee nia oan lakon,
duke hasoru ema beik-teen ida nebee halo buat beik.
13 See mak halo aat ba ema nebee haree diak nia,
buat aat sei la sees husi nia uma.
14 Provoka istori malu, hanesan halo kuak kanu,
nunee se hanoin la hanesan, lalika lori ba lia.
15 Foo livre ba ema nebee halo sala ho hamonu fali kastigu ba ema nebee moris loos,
hahalok rua nee NAI Maromak hakribi hotu.
16 Ema beik-teen gasta nia osan atu buka matenek, nia folin saida?
Nia la iha kapasidade atu aprende.
17 Kolega sempre hatudu domin;
iha susar laran maun-alin sira sempre iha ba ita.
18 See mak promete atu responsabiliza nia maluk nia tusan,
nia kakutak mamuk.
19 Ema nebee gosta istori malu, gosta halo sala;
ema nebee gaba aan, konvida dezastre ba nia aan rasik.
20 Ema nebee laran aat sei la hetan moris diak;
ema nebee ibun bosok-teen sei monu ba susar laran.
21 Oan nebee beik-teen halo nia inan-aman laran dodok;
ema beik-teen nia inan-aman la iha ksolok.
22 Laran kontenti, hanesan aimoruk diak nian;
fuan nebee rahun, halo ema nia ruin sai maran tiha.
23 Ema aat simu prezenti husi kotu-kotuk
atu halakon fali justisa.
24 Ema nebee kompriende klean, nia hanoin deit buat matenek,
maibee ema beik-teen nia hanoin halai rungu-ranga.
25 Oan nebee beik-teen halo nia aman laran moras,
no halo nia inan kous laran susar.
26 Atu haruka ema nebee la sala para selu fali multa,
hahalok nee la diak;
baku ema nebee laran diak, nee la loos.
27 Ema nebee matenek kuidadu nia liafuan;
ema nebee kompriende klean, nia ulun malirin.
28 Ema beik-teen, bainhira nia nonook, ema seluk hanoin nia ema matenek ida;
bainhira nia taka nia ibun, ema hanoin nia kompriende klean.