16
1 Ema iha hanoin oinsaa atu hataan,
maibee resposta nebee sai husi nia ibun mai husi NAI Maromak.
2 Tuir ema nia hanoin, saida mak nia halo loos hotu,
maibee NAI Maromak mak koko nia laran.
3 Saida deit mak o atu halo, entrega ba NAI Maromak,
nunee o nia planu sei lao ho diak.
4 NAI Maromak halo buat hotu-hotu tuir Nia planu rasik,
too Nia mos prepara dezastre atu bele kastigu ema aat sira.
5 NAI Maromak hakribi see-see deit mak foti aan.
Hanoin di-diak, ema sira nee sei la sees husi kastigu.
6 See mak iha domin, no kaer metin nia liafuan, nia sei hetan perdaun ba nia sala;
see mak hamtauk NAI Maromak hadook aan husi buat aat.
7 Ema nebee moris halo haksolok NAI Maromak,
nia sei moris iha dame nia laran too nia inimigu mos diak malu ho nia.
8 Diak liu iha sasaan uitoan maibee moris loos,
duke sai riku matak deit.
9 Ema bele halo planu kona ba nia dalan moris,
maibee NAI Maromak mak desidi nia atu hakat ba loos nebee.
10 Bainhira liurai koalia, nee hanesan NAI Maromak mak koalia,
nunee nia tesi lia sempre loos.
11 Dasin nebee tetu sasaan ho lo-loos mai husi NAI Maromak;
Nia haruka ema faan sasaan tenki uza sasukat nebee loos.
12 Liurai hakribi hahalok aat,
tanba justisa mak halo nia ukun bele dura.
13 Ema nebee foo sai lia loos halo liurai kontenti;
see mak koalia buat nebee loos, liurai respeita.
14 Bainhira liurai hirus, nee hatudu katak ema ruma tenki mate,
maibee ema matenek hatene halo malirin fali liurai nia laran.
15 Bainhira liurai hatudu oin midar ba ema ruma, ema nee nia moris sei sai diak;
bainhira liurai haree diak ema, nee hanesan kalohan nebee lori udan been tuun tuir nia tempu.
16 Aprende sai matenek iha valor liu dook duke osan mean;
kompriende klean diak liu duke osan mutin.
17 Ema laran moos nia lalaok dook husi buat aat;
see mak lao kuidadu aan, salva nia vida.
18 Ema nebee foti aan, nia moris sei sai aat;
ema nebee halo aan sei monu.
19 Diak liu haraik aan no moris kiak,
duke goza sasaan nebee ema foti aan sira hadau.
20 See mak rona bainhira ema hanorin, nia sei moris diak;
see mak laran metin ba NAI Maromak, nia hetan ksolok.
21 Ema nebee matenek sei hetan naran diak tanba nia kompriende klean;
ema nebee koalia mamar, nia hanorin diak liu.
22 Ema neon diak nia matenek hanesan bee matan nebee foo moris ba nia;
ema beik-teen hetan kastigu tanba nia hahalok beik.
23 Ema matenek hanorin diak liu
tanba nia foo sai buat matenek husi nia laran.
24 Liafuan nebee mamar hanesan bani nia knuuk;
liafuan nee midar iha ema nia laran no kura ema nia isin lolon.
25 Ema balu senti dalan nebee nia liu nee loos hela,
afinal dalan nee lori nia ba mate.
26 Ema nebee hamlaha obriga aan atu servisu makaas,
tanba nia kabun mak haruka.
27 Ema nebee la iha valor moris, nia halo planu aat;
nia ibun hanesan fali ahi lakan nebee hakanek ema.
28 Ema lohi door hamosu istori malu;
ema lori lia door halo belun diak fahe malu.
29 Ema nebee gosta violensia hadau nia maluk nia laran
hodi lori nia lao tuir dalan nebee la diak.
30 Ema nebee atu halo aat, foo sinal halimar matan;
ema nebee atu halo buat aat, foo sinal dulas ibun.
31 See mak moris loos, nia hetan vida naruk;
nia fuuk mutin hanesan koroa nebee furak.
32 Ema nebee iha pasiensia, nia diak liu fali funu nain ida;
ema nebee hatene domina aan, nia diak liu aswain nebee hadau sidade.
33 Ema bele dada rifa,
maibee NAI Maromak mak desidi nia rezultadu.