15
1 Resposta nebee kalma halo ema nia laran malirin,
maibee liafuan nebee kroat provoka ema hirus.
2 Ema matenek koalia, halo ema seluk gosta aprende,
maibee ema beik-teen nia ibun fakar sai buat beik.
3 NAI Maromak nia matan iha fatin hotu-hotu;
Nia kontrola ema aat no ema diak.
4 Liafuan nebee halo kamaan ema nia laran hanesan ai huun moris nian,
maibee ibun bosok-teen hakanek ema nia fuan.
5 Ema beik-teen lakohi rona bainhira nia aman eduka nia,
maibee ema nebee prontu simu moral, hatudu katak nia iha matenek.
6 Iha ema moris loos nia uma iha riku-soin barak,
maibee ema aat nia kosar been lori terus ba nia aan.
7 Ema matenek fahe nia konhesimentu ba ema seluk,
maibee ema beik-teen la bele halo nunee.
8 NAI Maromak hakribi sakrifisiu nebee ema aat hasae ba Nia,
maibee ema laran moos nia orasaun halo NAI nia laran haksolok.
9 NAI Maromak hakribi ema aat nia hahalok,
maibee Nia hadomi ema nebee hakaas aan moris loos.
10 Ema nebee fila kotuk ba dalan loos, sei hetan kastigu todan;
see mak lakohi simu bainhira ema koriji, nia sei mate.
11 NAI Maromak haree borus saida mak iha rate laran ka iha matebian sira nia fatin;
saa tan ita ema nia laran, NAI hatene mo-moos.
12 Ema kontra door lakohi atu ema koriji nia;
nia lakohi husu ema matenek nia hanoin.
13 Ema nebee laran kontenti, nia oin nabilan,
maibee se nia laran terus, nia fuan mos kanek.
14 Ema nebee kompriende klean hakarak teb-tebes atu aprende tan;
ema nebee kakutak mamuk gosta buka tuir buat beik.
15 Ema kbiit-laek terus loron ba loron,
maibee ema nebee laran kontenti senti hanesan festa hela deit.
16 Diak liu iha sasaan uitoan maibee hamtauk NAI Maromak,
duke iha riku-soin barak maibee laran la hakmatek.
17 Diak liu haan modo tahan maibee hadomi malu,
duke haan naan karau diak nian maibee haree malu matan la moos.
18 Ema nebee hirus-teen hamosu istori malu,
maibee ema nebee iha pasiensia halo ema dame malu.
19 Ema baruk-teen nia dalan, ai tarak satan netik,
maibee ema nebee laran moos, nia dalan luan no tetuk.
20 Oan nebee matenek foo ksolok ba nia aman,
maibee ema nebee beik-teen la respeita nia inan.
21 Ema nebee la iha neon, kontenti halo buat beik,
maibee ema nebee iha matenek, nia lao iha dalan loos.
22 Atu hetan susesu, presiza matenek nain barak hodi foo hanoin;
se la iha ema ida atu foo ideia, planu la lao ba oin.
23 Bainhira ema foo resposta nebee kona lo-loos, nia kontenti;
liafuan iha folin boot bainhira foo sai tuir tempu nebee loos.
24 Ema matenek hakat sae tuir dalan moris nian,
atu nunee nia la tuun ba iha matebian sira nia fatin.
25 NAI Maromak sobu tiha ema foti aan nia uma,
maibee Nia defende feto faluk nia rai baliza.
26 NAI Maromak hakribi ema aat nia planu,
maibee Nia gosta liafuan nebee hatudu laran diak.
27 See mak manaan matak deit, nia lori susar ba nia uma kain,
maibee ema nebee lakohi halo korupsaun, nia sei moris.
28 Ema moris loos tetu lai foin foo resposta,
maibee ema aat nia ibun fakar sai buat aat.
29 NAI Maromak dook husi ema aat,
maibee Nia rona ema moris loos nia orasaun.
30 See mak hatudu oin kontenti, nia halo haksolok ema seluk nia laran;
see mak foo sai lia menon nebee diak, nia halo ema nia ruin sai forti.
31 See mak foo atensaun bainhira ema koriji nia atu nia moris bele sai diak,
nia sei hola parte iha ema matenek sira.
32 See mak lakohi simu bainhira ema eduka, nia la respeita nia aan rasik,
maibee see mak rona bainhira ema koriji, nia aumenta matenek.
33 See mak hamtauk NAI Maromak, nia aprende sai matenek;
ema tenki haraik aan mak foin hetan respeitu.