14
1 Feto nebee matenek harii nia uma kain,
maibee feto beik-teen sobu nia uma kain ho nia liman rasik.
2 See mak lao tuir dalan loos, nia hamtauk NAI Maromak,
maibee ema nebee lao iha dalan kleuk, hatete aat fali NAI.
3 Ema beik-teen nia ibun konvida rota ba iha nia kotuk,
maibee ema matenek nia ibun proteje nia aan.
4 Se la iha karau, karau nia haan fatin mamuk;
hodi karau nia forsa mak toos bele foo rezultadu barak.
5 Sasin nebee laran moos, la bosok,
maibee sasin nebee lohi door, fakar sai lia falsu.
6 Ema kontra door buka matenek la hetan,
maibee ema nebee kompriende klean ona, fasil ba nia atu aprende.
7 Hadook aan tiha husi ema beik-teen,
tanba o sei la aprende buat ida husi nia liafuan.
8 Ema nebee neon matenek hatene tetu nia dalan,
maibee ema beik-teen hanoin beik too lohi nia aan rasik.
9 Ema beik-teen halo sala, la interese atu kasu nia sala,
maibee ema laran moos hakaas aan atu moris iha dame nia laran.
10 Ema ida-idak mak hatene tuir nia laran susar;
ksolok nebee nia hetan, ema seluk la bele senti.
11 Ema aat nia uma sei rahun tiha,
maibee ema laran moos nia tenda sei aumenta boot.
12 Ema balu senti dalan nebee nia liu nee loos hela,
afinal dalan nee lori nia ba mate.
13 Ema bele hamnasa ho laran susar;
bele mos haksolok, maibee too ikus tristi fali.
14 Ema nebee lao sees husi dalan loos, sei simu kastigu tuir nia hahalok,
maibee ema diak sei simu nia kolen.
15 Ema nebee nar-naran tuir ema, nia fiar buat saida deit mak nia rona,
maibee ema nebee neon matenek kuidadu nia lalaok.
16 Ema matenek kuidadu hodi hadook aan husi hahalok aat,
maibee ema beik-teen hanoin badak no konfia aan demais.
17 See mak hirus lalais, hatudu nia beik;
see mak hanoin aat ema seluk, ema sei odi nia.
18 Ema nebee nar-naran tuir ema, nia sai beik-teen,
maibee ema neon matenek aprende buat barak halo nia naran boot.
19 Ema aat sei hakruuk iha ema diak nia oin;
ema nebee halo aat sei hakruuk iha ema moris loos nia portaun.
20 Ema kiak la iha belun, too nia vizinhu sira mos lakohi hamaluk nia,
maibee ema riku iha belun barak.
21 See mak hatete aat nia maluk, nia halo sala,
maibee see mak hatudu laran diak ba ema mukit, nia hetan ksolok.
22 See mak hanoin aat ema seluk, nia lao sala dalan,
maibee see mak halo planu nebee diak ba ema, ema mos sei hadomi nia no foo laran ba nia.
23 See mak servisu makaas, nia hetan rezultadu diak,
maibee see mak koalia deit sei sai kiak.
24 Matenek nain nia riku-soin hanesan koroa iha nia ulun;
ema nebee kakutak mamuk nia hahalok beik halo nia beik liu tan.
25 See mak foo sasin ho lo-loos, nia salva ema nia vida,
maibee see mak foo sasin falsu, nia lohi door.
26 Ema nebee hamtauk NAI Maromak, moris iha pas nia laran,
too nia oan sira mos hetan fatin seguru.
27 See mak hamtauk NAI Maromak, hetan bee matan moris,
nunee nia bele lao sees husi lasu mate nian.
28 Se liurai iha reinu barak, nia naran sai boot;
se ukun nain la iha povu, nia la vale ona.
29 Ema nebee pasiensia, nia kompriende klean,
maibee see mak hirus lalais, nia hatudu nia beik.
30 Ema nebee laran hakmatek, nia isin sai fresku,
maibee see mak laran moras ba ema seluk, nia ruin sai dodok.
31 See mak hanehan ema kiak sira, insulta sira nia Kriador,
maibee see mak hatudu laran luak ba ema kiik sira, foti aas Ida nebee kria sira.
32 Ema aat lakon mohu tiha tanba ninia hahalok aat,
maibee ema nebee moris loos hetan salvasaun tanba nia laran moos.
33 Ema nebee kompriende klean, matenek horik iha nia laran,
maibee iha ema beik-teen nia laran, matenek la iha liu.
34 Povu nebee moris loos halo boot nasaun nia naran,
maibee pekadu halo nasaun nia naran foer.
35 Liurai gosta teb-tebes atan nebee mak iha matenek,
maibee nia laran nakali ba atan nebee halo moe nia.