13
1 Oan nebee matenek sei rona nia aman nia hanorin,
maibee ema kontra door lakohi rona bainhira ema hasee makaas nia.
2 Ema nebee koalia liafuan diak, sei hetan buat diak,
maibee ema traidor kaan atu halo violensia.
3 See mak kuidadu nia ibun, proteje nia moris,
maibee see mak loke nia ibun luan, sei hetan terus.
4 Ema baruk-teen kaan buat oi-oin, maibee la hetan buat ida;
ema badinas hetan saida deit mak nia hakarak.
5 Ema nebee moris loos la gosta lia falsu,
maibee ema aat nia hahalok halo moe rai, no estraga nia naran.
6 Ema laran moos nia hahalok proteje nia;
ema aat nia pekadu hamonu nia.
7 Iha ema balu estilus riku maibee buat ida la iha;
iha ema balu finji kiak maibee iha riku-soin barak.
8 Ema riku bele selu nia vida bainhira ema ameasa nia,
maibee la iha ema ida atu ameasa ema kiak.
9 Ema nebee moris loos, nia dalan naroman nabilan,
maibee ema aat nia ahi oan sei mate.
10 See mak foti aan, nia hamosu istori malu,
maibee see mak respeita ema nia hanorin, nia iha matenek.
11 Ema nebee riku matak, too tempu ida nia riku-soin sei menus,
maibee see mak rai uitoan-uitoan sei aumenta nia riku-soin.
12 Se ema hein buat ruma maibee la mosu hela deit, nia laran susar,
maibee bainhira ninia hakarak akontese duni, nee hanesan ai huun nebee foo moris.
13 See mak la foo folin ba liafuan diak, nia sei simu todan,
maibee see mak respeita regra, sei hetan buat diak.
14 Ema matenek nia hanorin hanesan bee matan moris nian,
halo ema lao sees husi lasu mate nian.
15 Ema nebee iha neon diak sei hetan respeitu,
maibee ema nebee la halo tuir nia liafuan, sei hetan dezastre.
16 Ema neon matenek tetu lai foin halo buat ruma,
maibee ema beik halekar hahalok beik-teen.
17 Ema nebee lori lia menon maibee bobar fali, nia sei hetan susar boot,
maibee ema nebee lori lia menon ho lo-loos, nia halo ema moris hakmatek.
18 See mak lakohi simu bainhira ema hanorin nia, too ikus sai kiak no hetan moe,
maibee see mak rona bainhira ema koriji, nia sei hetan respeitu.
19 Bainhira ema nia hakarak sai realidade, nia laran kontenti,
maibee ema beik-teen hakribi atu fila kotuk ba hahalok aat.
20 See mak ranxu ema matenek, nia sai matenek;
see mak halo belun ho ema beik-teen, nia sei terus.
21 Ema aat sempre hetan susar,
maibee ema moris loos sempre hetan buat diak.
22 Ema diak rai hela riku-soin ba nia bei-oan sira,
maibee ema aat nia riku-soin, too ikus ema moris loos mak hetan fali.
23 Ai haan bele nakonu iha ema kiak nia toos,
maibee tanba deit justisa lao la loos, hahaan nee lakon mohu.
24 Ema nebee lakohi hanorin nia oan ho rota, nia la iha domin ba nia oan;
see mak hadomi nia oan, sei eduka nia.
25 Ema nebee moris loos haan too kabun bosu,
maibee ema aat nia kabun hamlaha hela deit.