12
1 See mak gosta atu ema koriji, nia gosta aprende,
maibee see mak lakohi atu ema hasee, nia beik-teen.
2 NAI Maromak kontenti ho ema nebee diak,
maibee Nia hamonu kastigu ba ema nebee gosta halo manobra.
3 Ema nebee hahalok aat, nia moris sei la metin,
maibee ema nebee moris loos, nia abut metin nafatin.
4 Feen nebee hahalok diak, hanesan koroa nebee tau ba nia laen nia ulun,
maibee feen nebee hamoe nia laen, halo nia laen nia ruin sai dodok tiha.
5 Ema moris loos halo planu nebee justu ba ema seluk,
maibee ema aat foo hanoin ba ema seluk ho liafuan mesak bosok.
6 Bainhira ema aat koalia, nee hanesan nia hafuhu ema seluk atu fakar nia raan;
maibee ema moris loos nia liafuan salva ema seluk.
7 Ema aat sei monu too la iha tiha ona,
maibee ema nebee moris loos, nia uma kain sei hamriik metin.
8 See mak iha neon matenek, ema seluk sei gaba nia,
maibee see mak hanoin kleuk, ema sei hatuun nia.
9 Diak liu sai ema kiik maibee iha ema ida halo netik servisu ba nia,
duke estilus ema boot, maibee hahaan la iha.
10 Ema nebee moris loos tau matan di-diak ba nia animal sira,
maibee ema aat atu hatudu laran diak too iha nebee mos, nia nafatin halo aat.
11 Ema nebee mak servisu badinas iha nia toos, sei hetan ai haan barak,
maibee see mak gasta tempu ba buat nebee la iha folin, nia la iha neon.
12 Ema aat kaan atu hetan riku-soin tuir dalan aat nian,
maibee ema nebee moris loos hanesan ai huun nebee abut metin hodi foo fuan.
13 Ema aat nia ibun halo nia monu tama ba lasu,
maibee ema moris loos bele sai husi susar laran.
14 Se ema nia ibun koalia liafuan diak, nia sei hetan buat diak;
bainhira nia liman halo buat diak, nia sei simu nia kolen.
15 Ema beik-teen hanoin katak saida deit mak nia halo nee loos,
maibee ema matenek see tilun bainhira ema seluk foo hanoin.
16 Bainhira ema beik-teen hirus, nia hatudu sai kedas,
maibee ema neon matenek, bainhira ema hatete aat nia mos, nia la hola ba lia.
17 Ema nebee kaer metin lia loos, nia foo sasin ho lo-loos,
maibee ema bosok-teen foo sasin falsu.
18 See mak koalia la sukat ibun, nia liafuan hanesan surik nebee hakanek ema,
maibee ema matenek nia ibun bele kura ema nia kanek.
19 Liafuan nebee loos sei dura nafatin ba nafatin,
maibee lia bosok la kleur lakon tiha.
20 Ema nebee iha planu aat, nia laran nakonu ho bosok,
maibee see mak halo ema dame malu, nia laran haksolok.
21 Ema nebee moris loos, dezastre sei la kona nia,
maibee ema aat sempre hetan susar.
22 NAI Maromak hakribi ema nebee ibun bosok-teen,
maibee Nia haksolok ho ema nebee moris tuir lia loos.
23 Ema nebee neon matenek la nar-naran foo sai buat nebee nia hatene,
maibee ema beik-teen halekar buat beik.
24 Ema nebee servisu ho badinas sei sai ukun nain,
maibee ema nebee baruk-teen too ikus tenki sai atan ba ema seluk.
25 Preokupa demais halo ema nia laran todan,
maibee liafuan nebee diak halo nia laran kamaan.
26 Ema nebee moris loos sai matadalan ba nia maluk,
maibee ema aat nia hahalok lori nia lao sala dalan.
27 Ema baruk-teen kasa tiha animal, nia baruk atu tunu,
maibee ema nebee badinas sei hetan riku-soin folin boot.
28 See mak lao tuir dalan loos, nia hetan moris;
dalan nee sei la lori nia ba mate.