11
1 NAI Maromak hakribi dasin nebee falsu,
maibee dasin nebee tetu ho loos halo haksolok Nia laran.
2 See mak foti aan, nia sei hetan moe,
maibee see mak haraik aan, nia iha matenek.
3 Ema diak hatene halo buat nebee loos tanba nia laran moos,
maibee ema traidor sei monu tanba nia lohi door.
4 Iha loron nebee NAI Maromak fakar sai Nia hirus, ema nia riku-soin la bele halo buat ida ba nia,
maibee hahalok nebee loos hasai ema husi mate.
5 Ema nebee livre husi sala lao iha rai tetuk tanba nia moris loos,
maibee ema aat monu tanba nia hahalok aat.
6 Ema laran moos sei hetan salvasaun tanba nia moris loos,
maibee ema traidor monu ba lasu laran tanba nia hakarak aat.
7 Bainhira ema aat mate, nia mehi mos lakon;
buat hotu nebee nia hakarak atu hetan husi nia kbiit rasik sei saugati deit.
8 NAI Maromak salva ema moris loos husi terus laran;
ema aat mak sei hetan fali terus nee.
9 Ema nebee la interese NAI Maromak, uza nia ibun hodi estraga nia maluk,
maibee ema moris loos hatene salva aan.
10 Bainhira ema laran moos hetan moris diak, ema iha sidade laran kontenti;
bainhira ema aat mate, ema iha sidade laran haklalak haksolok.
11 Ema laran moos sai bensaun ba sira nia sidade, halo sidade nee naran boot,
maibee ema aat nia ibun halo sidade naksobu tiha.
12 See mak hatuun nia maluk, ema nee kakutak mamuk,
maibee ema nebee matenek, nia nonook deit.
13 See mak gosta konta ema vida, nia foo sai ema nia segredu,
maibee ema nebee ita bele konfia, nia hatene rai segredu.
14 Bainhira la iha lideransa matenek, nasaun sei monu;
bainhira iha ema matenek barak hodi hatudu dalan, nasaun hamriik metin.
15 Se ema ruma responsabiliza atu selu ema seluk nia tusan, ema nee sei terus,
maibee se nia lakohi promete nunee, nia sei moris seguru.
16 Feto nebee laran diak hetan respeitu;
mane nebee gosta violensia hetan deit riku-soin.
17 See mak hatudu laran luak ba ema, nia halo diak ba nia aan rasik,
maibee see mak gosta halo aat ba ema, nia halo susar nia aan rasik.
18 Ema aat hakaas aan hetan riku-soin, too ikus la iha folin,
maibee see mak kuda hahalok loos, sei hetan rezultadu nebee folin boot.
19 Ema nebee toman halo buat diak, nia hetan moris,
maibee see mak hatoman aan halo buat aat, nia sei mate.
20 NAI Maromak hakribi ema nebee laran aat,
maibee Nia kontenti haree ema nebee hahalok loos.
21 Tebes, ema aat sei la sees husi kastigu,
maibee ema moris loos sei lao livre.
22 Feto nebee bonita maibee la iha neon,
nia hanesan brinkus osan mean nebee tau iha fahi nia inus.
23 Ema moris loos nia mehi sempre lori nia ba diak;
ema aat nia esperansa lori nia ba kastigu.
24 Iha ema balu fahe sira nia sasaan ho laran luak, too ikus sira nia riku-soin aumenta tan;
iha ema balu karak-teen, too ikus sai fali kiak.
25 See mak hatudu laran diak hodi foo tulun ba ema seluk, nia sei hetan moris diak;
see mak hametin ema seluk nia laran, ema mos sei hametin nia laran.
26 See mak rai ai haan atu faan karun iha tempu susar, ema sei hatete aat nia,
maibee see mak faan ai haan ho folin natoon, ema sei gaba nia.
27 See mak badinas halo buat diak, nia sei hetan naran diak,
maibee see mak duni tuir buat aat, sei hetan buat aat.
28 See mak tau fiar ba nia riku-soin, nia sei monu,
maibee see mak moris loos sei buras hanesan ai tahan nebee matak.
29 See mak lori susar ba nia uma kain, too ikus la hetan buat ida;
ema beik-teen sei sai atan ba ema matenek.
30 Ema moris loos nia hahalok hanesan ai huun nebee mak foo moris;
see mak iha matenek, nia bele manaan ema nia laran.
31 Ema nebee moris loos hetan sira nia kolen iha mundu nee;
ema aat ho ema nebee gosta halo sala mos hetan buat nebee sira merese simu.