10
Liurai Salomão nia hanorin
1 Lia matenek husi Salomão:
Oan nebee matenek lori ksolok ba nia aman,
maibee oan nebee beik-teen halo nia inan laran dodok.
2 Riku-soin nebee ema manaan matak deit la iha folin,
maibee hahalok nebee loos hasai ema husi mate.
3 NAI Maromak la husik ema nebee moris loos atu hamlaha,
maibee buat nebee ema aat sira kaan, Nia la foo.
4 Ema baruk-teen nia liman halo nia sai kiak,
maibee ema badinas nia liman halo nia sai riku.
5 Oan nebee matenek halibur ai haan husi toos tuir nia tempu,
maibee oan nebee toba hela deit iha tempu kolheta, nia halo moe deit.
6 Ema nebee moris loos, bensaun haleu nia ulun,
maibee ema aat koalia midar hodi taka nia hahalok violensia.
7 See mak moris loos, ema gosta temi nafatin sira nia naran,
maibee ema aat nia naran sei sai dodok too lakon tiha.
8 Ema nebee iha matenek sempre respeita regra,
maibee ema nebee koalia beik, nia sei monu.
9 Ema nebee moris loos, nia dalan seguru,
maibee see mak lao iha dalan kleuk, ema sei hatene tuir.
10 See mak halimar matan hamosu problema;
see mak koalia beik, nia sei monu.
11 Ema moris loos, nia ibun hanesan bee matan moris nian,
maibee ema aat koalia midar hodi taka nia hahalok violensia.
12 See mak rai odi, nia hamosu istori malu,
maibee see mak hadomi ema seluk, nia hatene foo perdaun.
13 Ema nebee kompriende klean koalia liafuan matenek nian,
maibee see mak la iha neon, ema sei baku nia kotuk ho rota.
14 Ema matenek rai konhesimentu iha nia laran,
maibee ema beik-teen nia liafuan hamosu dezastre.
15 Ema riku nia sasaan hanesan moru forti nebee haleu nia,
maibee ema kiak la iha buat ida atu bele salva nia.
16 Ema nebee hahalok loos, nia kosar been lori nia ba moris,
maibee ema aat nia hahalok halo nia hetan kastigu.
17 See mak rona bainhira ema hanorin, nia lao tuir dalan moris nian,
maibee see mak lakohi simu bainhira ema koriji, nia lao sala dalan.
18 See mak rai odi iha laran, nia koalia bosok;
see mak hatete aat ema iha fat-fatin, nia beik-teen.
19 Ema nebee koalia barak, sempre hamosu pekadu,
maibee see mak kuidadu ibun, nia nee matenek.
20 Ema moris loos nia ibun hanesan osan mutin diak nian,
maibee ema aat nia hanoin iha folin uitoan deit.
21 Ema moris loos nia liafuan ajuda ema barak,
maibee ema beik-teen mate tanba neon la iha.
22 NAI Maromak nia bensaun mak halo ema hetan riku-soin;
servisu too haluha aan la bele halo ema sai riku.
23 Ema beik-teen gosta halo buat aat,
maibee ema nebee iha ona konhesimentu gosta buka matenek.
24 Buat nebee ema aat tauk, too ikus sei akontese duni ba nia;
saida mak ema moris loos hakarak, too ikus nia sei hetan.
25 Anin boot mosu mai, huu lakon tiha ema aat,
maibee ema moris loos hamriik metin nafatin.
26 Ema nebee baruk-teen halo nia patraun senti hanesan tua siin kona nia nehan
ka ahi suar tama nia matan laran.
27 Ema nebee hamtauk NAI Maromak, nia vida aumenta naruk,
maibee ema aat nia vida habadak tiha.
28 Ema moris loos nia esperansa sei lori ksolok ba nia,
maibee buat nebee ema aat espera sei la sai realidade.
29 NAI Maromak mak abrigu ba ema nebee moris loos,
maibee Nia halo mohu tiha ema nebee hahalok aat.
30 Ema moris loos sei hela metin iha rai nee,
maibee ema aat sei fokit sai tiha.
31 Ema moris loos nia ibun foo sai liafuan matenek,
maibee ema aat nia ibun sei taka tiha.
32 Ema moris loos hatene koalia buat nebee diak,
maibee ema aat nia ibun koalia liafuan mesak bosok deit.