9
Matenek ho beik konvida ema atu moris tuir sira
1 Matenek hanesan senhora ida nebee bahat tiha fatuk riin hitu
hodi harii nia uma.
2 Nia koa animal nebee nia oho;
nia kahur tua, nia tau meza.
3 Nia haruka nia atan feto sira baa bolu ho lian makaas
iha laletek sidade nian hodi dehan,
4 “Imi nebee matan tomak, tama mai.”
Ba ema nebee la iha neon, nia hameno nunee:
5 “Hau prepara ona hahaan, mai haan ba;
hau kahur ona tua, mai hemu ba.
6 Soe tiha imi nia hahalok beik mak imi sei moris;
lao tuir dalan matenek nian ba.”
7 Se o koriji ema kontra door, nia sei hatete aat fali o;
se o siak ema aat, nia sei hakanek o.
8 Keta siak ema kontra door, se lae nia odi o;
se o siak ema matenek, nia sei hadomi o.
9 Foo moral ba ema matenek mak nia sai matenek liu tan;
hanorin ema nebee moris loos mak nia sei aprende liu tan.
10 Matenek nia huun mak hamtauk NAI Maromak;
see mak konhese Ida nebee Santu, ema nee kompriende klean.
11 Se o iha matenek, o nia vida sai naruk;
o nia tinan moris sei aumenta.
12 Se o matenek, o nia matenek nee sei lori buat diak ba o;
se o ema kontra door, o rasik lori todan.
13 Beik-teen hanesan feto nebee mak ibun boot;
nia kakutak mamuk, la hatene buat ida.
14 Nia tuur iha kadeira iha nia uma oin,
iha laletek sidade nian
15 hodi hasee ema nebee liu husi fatin nee;
nia konvida ema nebee mak lao tuir dalan nee hodi dehan,
16 “Imi nebee matan tomak, tama mai.”
Ba ema nebee la iha neon, nia hameno nunee:
17 “Bee nebee o naok, midar;
hahaan nebee mak o haan subar, gostu loos.”
18 Maibee sira la hatene katak see mak tama feto nee nia uma, sira sei mate;
nia bainaka sira iha hela rai kuak laran.