8
Matenek kompara ho senhora ida nebee foo lia murak
1 Matenek nee hanesan senhora ida nebee konvida ema atu mai rona nia;
nia kompriende klean, nia bolu ema ho lian makaas atu hakbesik ba nia.
2 Nia hamriik iha laletek besik dalan ninin,
iha kruzamentu.
3 Nia hamriik besik portaun boot sidade nian;
nia koalia ho lian makaas besik odamatan sidade nian dehan,
4 “Povu sira, hau koalia ba imi;
hau hasae hau nia lian ba ema hotu-hotu.
5 Imi nebee la iha esperiensia moris, aprende oinsaa atu foti desizaun;
imi beik-teen sira, sai matenek ba.
6 Rona mai, tanba hau sei koalia liafuan nebee iha folin;
buat nebee mak hau hatete sai nee loos.
7 Saida mak hau foo sai nee tebes,
tanba hau hakribi atu koalia buat aat.
8 Saida deit mak hau hatete loos hotu;
hau nia ibun nunka foo sai lia bosok ka lohi.
9 Ba ema nebee kompriende klean, liafuan sira nee klaru hotu;
ba ema nebee iha konhesimentu, liafuan sira nee loos hotu.
10 Diak liu hili hau nia hanorin duke hili osan mutin;
diak liu hetan konhesimentu duke hetan osan mean diak nian.
11 Tanba matenek nee valor boot liu fali murak mean;
buat diak hotu-hotu nebee mak o hakarak, la iha ida mak bele kompara ho matenek.
12 Hau nee matenek, hau hatene tetu situasaun;
hau iha konhesimentu luan no hatene foti desizaun.
13 Hamtauk NAI Maromak katak hakribi buat aat;
hau hakribi hahalok nebee foti aan, gaba aan,
hahalok nebee aat ho ibun nebee lohi door.
14 Hau bele loke ema nia hanoin atu sira halao knaar ho diak;
hau iha kbiit no kompriende klean.
15 Liu husi hau, liurai sira bele ukun ho diak,
no ukun nain sira halo lei ho lo-loos.
16 Liu husi hau, nai ulun sira ho see-see deit mak ukun iha mundu
bele ukun ho lo-loos.
17 Hau hadomi ema nebee hadomi hau;
see mak buka hau sei hetan hau.
18 Riku-soin ho naran boot mai husi hau;
hau bele halo ema sai riku no moris diak nafatin ba nafatin.
19 Buat nebee hau foo, folin boot liu fali osan mean karun nian;
rezultadu nebee hau foo, valor boot liu fali osan mutin diak nian.
20 Hau lao tuir dalan moris loos nian;
hau hakat tuir dalan justisa nian.
21 Hau sei foo riku-soin ba ema nebee hadomi hau;
hau sei hakonu sira nia uma ho sasaan nebee folin boot.
22 Molok NAI Maromak kria buat hotu-hotu,
Nia kria uluk hau.
23 Hori uluk liu, lalehan ho rai seidauk iha,
Nia forma hau nanis kedas.
24 Bainhira tasi seidauk iha, hau moris tiha ona;
bainhira bee matan seidauk suli sai, hau iha uluk ona.
25 Molok NAI Maromak hatuur foho bo-boot sira,
molok Nia forma foho kiik sira, hau moris tiha ona.
26 Antes Nia kria rai maran ka rai fuik;
rai rahun uitoan mos seidauk iha, hau iha tiha ona.
27 Bainhira Nia hatuur lalehan, hau iha nebaa;
bainhira Nia marka lalehan ho tasi nia baliza, hau iha nebaa.
28 Bainhira Nia monta kalohan iha leten,
no halo bee matan iha tasi okos;
29 bainhira Nia tau baliza tasi nian
atu nunee bee la bele suli liu baliza nebee Nia marka;
bainhira Nia harii mundu nia alsesu,
30 iha momentu nebaa hau nee badaen diak ida iha Nia sorin.
Loro-loron hau halo haksolok Nia laran;
hau sempre kontenti iha Nia oin.
31 Hau kontenti ho mundu nebee Nia kria nee;
hau haksolok teb-tebes haree ema kriatura.
32 Agora, oan sira, see tilun mai.
See mak lao tuir nafatin hau nia dalan, sira hetan ksolok.
33 Rona hau nia hanorin atu imi sai matenek;
keta taka imi nia tilun.
34 Ema nebee rona hau;
ema nebee loro-loron firmi nafatin iha hau nia portaun boot
hodi hein hau iha odamatan,
nia hetan ksolok.
35 Tanba ema nebee buka hau too hetan, nia hetan moris,
no NAI Maromak kontenti ho nia.
36 Maibee see mak la hetan hau, nia halo susar nia aan rasik;
see mak odi hau, nia hili ona dalan mate nian.”