7
Keta beik hodi tuir feto nebee nakar
1 Oan, kaer metin hau nia liafuan;
rai hau nia regra iha o nia laran.
2 Kaer metin hau nia regra, nunee mak o sei moris;
kuidadu hau nia hanorin hanesan o kuidadu o nia matan musan.
3 Kesi hau nia liafuan ba iha o nia liman fuan;
hakerek iha o nia laran.
4 Hatete ba matenek dehan, “O nee hau nia biin;”
konsidera konhesimentu nudar o nia belun diak.
5 Matenek ho konhesimentu nee sei proteje o husi feto aat;
husi feto ulun bulak nebee koalia liafuan mesak midar.
6 Iha loron ida hau hateke tuun husi hau nia uma;
hau hafuhu husi janela,
7 hau haree joven lubuk ida nebee la iha esperiensia moris.
Iha joven sira nee nia klaran,
hau hetan mane joven ida nebee kakutak la iha.
8 Nia lao dadauk tuir dalan ba iha kruzamentu,
depois hakat ba feto nia uma.
9 Loro matan tuun dadauk, rai nakaras ona,
kalan nakukun ona.
10 Derepenti feto ida lao mai hasoru nia;
feto nee hatais ropa hanesan feto luroon, nia iha hanoin aat.
11 Nia ema ida nebee ibun boot no kontra door;
nia bibi ain;
12 la oras nia iha dalan, la oras mosu iha fali fatin publiku;
iha kruzamentu nebee deit, nia hein hela atu lasu mane.
13 Bainhira nia haree joven nee, nia hakuak hodi rei;
nia fihir metin mane nee hodi dehan,
14 “Hau ohin oho animal halo oferta amizade hodi kumpri hau nia promesa;
naan iha uma sei barak hela.
15 Tanba nee mak hau sai mai atu hasoru o;
hau buka hela o, agora hau hetan ona.
16 Hau nahe tiha ona lensol husi rai Ejitu ba iha hau nia kama;
lensol nee hena diak nian ho kor oi-oin.
17 Hau nia toba fatin hau hamorin tiha ona
ho mina morin diak nian, ai kameli ho ai kanela.
18 Mai ita baa mout iha domin nia laran too dadeer-saan;
mai ita hamutuk goza ita nia domin.
19 Tanba hau nia laen sai hela;
nia baa tiha ona iha rai dook.
20 Nia baa lori ho osan bornal ida nakonu;
fulan tomak mak foin nia fila.”
21 Feto nee hamaus joven mane nee ho liafuan oi-oin deit;
hodi nia ibun midar nia tenta joven nee atu lao sala dalan.
22 Derepenti joven nee tuir nia
hanesan karau nebee ema lori baa atu oho.
Joven nee hanesan rusa nebee hakat tuun ba lasu laran;
23 hein deit rama oan borus nia fuan.
Nia hanesan manu fuik nebee semo tama kedas ba iha gaiola laran;
nia la hatene katak nia iha hela perigu laran.
24 Tanba nee, oan sira, rona mai;
foo atensaun ba hau nia liafuan.
25 La bele husik o nia laran haliis ba iha feto hanesan nee;
keta lao tuir nia dalan.
26 Tanba nia halo ona ema barak mate;
ema barak teb-tebes lakon sira nia vida tanba nia.
27 Nia uma hanesan dalan ba rai kuak;
dalan nee tuun ba iha matebian sira nia fatin.