6
Hanorin oi-oin
1 Oan, se karik o nia maluk deve ema nia osan, depois o mak responsabiliza;
se karik o kaer liman ona ho nia hodi promete atu taka tusan nee,
2 bele dehan o nia ibun rasik mak sai lasu ba o;
o nia liafuan rasik kesi ona o.
3 Oan, se nunee, o tenki kore o nia aan,
tanba o monu tiha ona ba iha o nia maluk nia liman laran.
Baa haraik aan iha o nia maluk nee nia oin
hodi husu atu bele kansela tiha o nia promesa.
4 Keta husik o nia matan dukur;
keta husik o nia aan toba dukur.
5 Hasai tiha o nia aan husi lasu nee hanesan bibi rusa nebee halai sai husi lasu laran,
hanesan manu fuik nebee semo sai husi kasador nia liman laran.
6 Imi baruk-teen sira, baa haree took nehek
hodi aprende husi nia hahalok, atu imi sai matenek.
7 Maski nehek nee la iha nai ulun,
la iha xefi no la iha ukun nain,
8 maibee nia halibur hahaan ba nia aan iha tempu rai manas;
nia rai hamutuk ai haan iha tempu kolheta.
9 Imi baruk-teen sira, imi atu toba too bainhira?
Bainhira mak imi atu hadeer fali husi imi nia toba fatin?
10 Imi dehan, “Hau toba uitoan lai, toba halimar lai,
hakuak liman hodi deskansa lai.”
11 Nunee kiak sei mosu mai derepenti hanesan naok-teen hodi asalta imi,
mukit sei mai hanesan ema kaer kroat hodi hadau imi nia riku-soin hotu.
12 Ema aat, ema nebee la iha valor,
nia lao lemo-lemo hodi habelar lia bosok,
13 nia piska matan,
foo sinal ho nia ain,
hatudu liman fuan,
14 nia laran makerek hodi halo planu aat,
no gosta provoka ema.
15 Nee mak dezastre kona nia derepenti
hodi harahun tiha nia, atu salva fali la bele ona.
16 Iha buat neen mak NAI Maromak la simu liu;
iha hahalok hitu mak Nia hakribi:
17 matan nebee haree ema la vale,
ibun nebee lohi door,
liman nebee halo ema sala-laek nia raan fakar,
18 laran nebee planu buat aat,
ain nebee lalais deit hakat baa halo aat,
19 sasin falsu nebee hasai lia bosok tuun-sae,
ho ema nebee provoka maun-alin atu istori malu.
See mak halo sala ho ema nia feen, sei hetan kastigu
20 Oan, halo tuir o nia aman nia regra;
la bele fila kotuk ba o nia inan nia hanorin.
21 Rai metin sira nia liafuan iha o nia laran;
hahenu iha o nia kakorok.
22 Nunee bainhira o lao, liafuan sira nee sei sai matadalan ba o;
bainhira o toba, liafuan nee sei proteje o;
bainhira o hadeer, liafuan nee sei koalia ho o.
23 Tanba regra nee hanesan ahi oan;
hanorin nee hanesan naroman;
liafuan nee koriji o hodi foo disiplina ba o para bele tuir dalan moris nian.
24 Ho nunee o sei hadook aan husi ema seluk nia feen;
o sei la monu ba iha feto bulak nia liafuan midar.
25 O nia laran keta kaan nia bonita;
keta laran monu ba nia matan.
26 Tanba feto luroon, o bele selu ho paun fuan ida,
maibee ema nia feen, o sei selu ho o nia vida.
27 Se o tau ahi lakan iha o nia hiti leten,
ahi nee la haan tiha o nia hena ka?
28 Se o lao iha ahi klaak leten,
o nia ain la mutuk tiha ka?
29 Nunee mos ema nebee mak toba fali ho nia maluk nia feen;
see deit mak book ema nia feen sei la sees husi kastigu.
30 Ema naok-teen ida bainhira naok tanba hamlaha,
ema seluk sei la hatete aat nia.
31 Maski nunee, se ema kaer toman, nia tenki selu fali too dala hitu;
bele too nia sasaan uma laran tomak, tenki entrega hotu.
32 Saa tan ema nebee halo sala ho ema nia feen, nia neon la iha;
see mak halo hanesan nee, nia estraga nia aan rasik.
33 Ema sei baku nia no hamoe nia;
la iha buat ida mak bele hamoos nia moe nee.
34 Tanba laen ida bainhira laran moras, nia raan sei nakali;
nia sei odi teb-tebes, la iha perdaun.
35 O foo multa hodi halo nia laran malirin, nia sei la simu;
o selu ho saida deit hodi taka o nia sala, sei la bele halakon nia odiu nee.