5
Keta halo sala ho ema nia feen
1 Oan, foo atensaun ba matenek nebee hau hanorin ba o;
hau kompriende klean saida mak hau hanorin, see tilun mai.
2 Nunee o sempre iha matenek hodi foti desizaun;
o sei koalia sukat o nia ibun.
3 Tanba feto aat nia ibun midar hanesan bani been;
nia liafuan kos-kose ema liu fali mina azeite.
4 Maibee too ikus feto nee sai moruk hanesan veneno;
kroat hanesan surik oin-kotuk kroat hotu.
5 Nia ain tuun dadauk ba iha rai kuak;
nia lao hela ba iha matebian sira nia fatin.
6 Nia la interese ba dalan moris nian;
nia lao hela iha dalan kleuk, maibee nia la hatene.
7 Nee duni, oan sira, rona mai;
keta tau hau nia liafuan ba kotuk.
8 Hadook tiha imi nia aan husi feto hanesan nee;
keta baa besik iha nia odamatan.
9 Se lae o nia naran sai aat iha ema nia matan,
no o entrega o nia vida joven ba ema laran aat;
10 ema leet bele goza fali o nia riku-soin,
no o nia kosar been tama ba iha ema seluk nia uma.
11 Too ikus o sei halerik,
tanba o nia isin lolon tomak atu mohu ona.
12 Depois o sei dehan, “Nusaa mak uluk ema hasee makaas hau, hau fila kotuk fali?
Nusaa mak hau nia laran la simu bainhira ema koriji hau?
13 Uluk hau lakohi rona hau nia mestri sira;
hau lakohi see tilun ba ema nebee hanorin hau.
14 Agora susar boot atu kona ona hau
iha ema lubun boot nia klaran hau moe liu.”
15 Hemu bee husi o nia buli rasik;
hemu bee fresku husi o nia posu rasik.
16 O hakarak o nia bee matan suli sai fali ba iha estrada ka?
O hakarak o nia bee dalan suli sai ba iha rai luan ka?
17 Bee nee o nian mesak deit;
la bele fahe fali ba ema seluk.
18 O nia feen hanesan bee matan ba o, Maromak foo bensaun ba nia;
o kaben ho nia bainhira o sei joven, haksolok hamutuk ho nia ba.
19 Nia hanesan rusa inan ida nebee kapaas,
hanesan rusa nebee furak;
husik ninia bonita sempre halo o kontenti;
nia domin ba o halo o nia laran haksolok nafatin.
20 Oan, nusaa mak o atu kaan fali feto ulun bulak?
Nusaa mak o atu toba fali ho ema seluk nia feen?
21 Keta haluha, ema ida-idak nia hahalok nakloke iha NAI Maromak nia oin;
NAI nia matan haree hela ema hotu nia dalan.
22 Ema aat nia pekadu sai hanesan lasu ida ba nia aan;
ninia sala hanesan tali nebee kesi metin nia.
23 Nia hahalok beik-teen halo nia lao sala dalan;
nia sei mate tanba la hatene domina aan.