4
Matenek nee folin boot
1 Oan sira, rona imi nia aman nia hanorin;
foo atensaun di-diak para imi kompriende klean.
2 Tanba hau foo lisaun nebee diak ba imi,
nunee keta fila kotuk ba hau nia hanorin.
3 Uluk hau sei kiik, iha hau nia aman nia uma,
hau nia inan hadomi liu hau,
4 hau nia aman hanorin hau nunee:
“Rai di-diak hau nia liafuan iha o nia laran;
kaer metin hau nia regra mak o sei moris.
5 Sai matenek ba, buka atu kompriende klean;
keta haluha hau nia liafuan, no keta lao sees.
6 Keta fila kotuk ba matenek, nunee nia sei hamahon o;
hadomi nia mak nia sei tau matan ba o.
7 Matenek nee iha folin boot liu, nunee tenki hakaas aan atu kompriende;
o atu selu ho o nia riku-soin tomak mos, selu ba, para hetan matenek.
8 Estima matenek mak nia sei tane o aas;
hakuak matenek mak nia sei halo o nia naran morin.
9 Nia sei tau ai funan furak haleu o nia ulun;
nia sei tau koroa nabilan iha o nia ulun.”
10 Oan, rona mai, simu hau nia liafuan,
nunee o nia vida sei naruk.
11 Hau hanorin lalaok matenek nian ba o;
hau lori o tuir dalan nebee loos.
12 Bainhira o lao, buat ruma sei la taka o nia dalan;
bainhira o halai, o sei la sidi.
13 Kaer metin hau nia hanorin, keta husik;
rai di-diak, tanba hanorin nee sei foo moris ba o.
14 Keta hakat tuir ema aat sira nia ain fatin;
keta lao tuir ema aat nia dalan.
15 Hadook aan husi dalan nee, keta lao tuir;
sees tiha hodi lao ba oin.
16 Tanba sira toba la dukur bainhira sira seidauk halo buat aat;
sira nia matan dukur lakon bainhira sira seidauk halo ema sidi.
17 Sira nia ai haan mak hahalok aat;
sira nia tua mak violensia.
18 Ema moris loos nia dalan naroman hanesan loro matan nebee foin sae;
naroman nee nabilan ba beibeik too meudia boot.
19 Maibee ema aat nia dalan hanesan nakukun teb-tebes;
sira la hatene saida mak halo sira sidi.
20 Oan, foo atensaun ba hau nia liafuan;
see tilun ba buat nebee hau koalia.
21 Keta husik buat sira nee dook husi o nia matan;
rai nafatin iha o nia laran.
22 Tanba ema nebee kompriende ona liafuan nee sei hetan moris;
nia isin lolon tomak sei hetan saude diak.
23 Kuidadu o nia laran liu buat hotu-hotu,
tanba o nia laran mak diriji o nia moris.
24 Kuidadu o nia aan atu la bele koalia lia bosok;
kuidadu o nia ibun atu keta lohi ema.
25 Hateke beibeik ba oin;
halo o nia matan fihir ba oin nafatin.
26 Fihir di-diak dalan nebee o atu lao tuir,
nunee o sei lao ba oin ho diak.
27 Keta lao sees husi dalan loos hodi lao fali iha sor-sorin;
kuidadu o nia ain atu la bele lao tuir dalan nebee aat.