3
Matenek halo ita moris diak
1 Oan, keta haluha hau nia hanorin;
rai di-diak hau nia regra iha o nia laran.
2 Tanba buat sira nee mak sei halo o nia vida naruk,
no foo moris diak ba o.
3 Kaer metin domin ho lia loos;
hahenu buat sira nee iha o nia kakorok;
hakerek buat sira nee iha o nia laran.
4 Nunee Maromak sei kontenti ho o, ema mos sei gosta,
no o sei hetan naran diak.
5 Fiar ba NAI Maromak ho o nia laran tomak;
keta sadere ba o nia matenek rasik.
6 O halao buat saida deit, rekonhese Nia
mak Nia sei haloos o nia dalan.
7 La bele konsidera o nia aan rasik ema matenek;
hamtauk NAI no hadook aan husi hahalok aat.
8 Nunee o sei iha saude diak;
o nia ruin sira sei forti.
9 Oferese o nia riku-soin ba NAI hodi tane aas Nia naran;
foo rezultadu toos nian primeiru ba Nia.
10 Nunee o nia armazen sei nakonu too resin,
no o nia tua fatin sei nakonu ho tua foun too suli sai.
11 Oan, keta fila kotuk bainhira NAI koriji o;
keta laran susar bainhira Nia hasee o.
12 Tanba NAI koriji ema nebee mak Nia hadomi,
hanesan aman ida koriji nia oan doben.
13 Ema nebee sai matenek;
ema nebee kompriende klean, nia hetan bensaun.
14 Tanba matenek vale liu osan mutin,
no diak liu fali osan mean.
15 Matenek folin boot liu morteen;
saida deit mak o hakarak hetan, la iha ida mak bele kompara ho matenek.
16 Vida naruk iha hela matenek nia liman loos;
riku-soin no respeitu iha hela nia liman karuk.
17 Matenek nia dalan furak,
nakonu ho pas ho hakmatek.
18 Matenek nee hanesan ai huun nebee foo moris ba ema nebee kaer metin nia,
see mak kaer metin matenek, sira sei hetan bensaun.
19 Hodi matenek, NAI harii mundu nia alsesu;
ho konhesimentu mak Nia hatuur lalehan iha nia fatin.
20 Hodi matenek, Nia halo bee matan sira nakfera hodi suli ba iha rai,
no kalohan hatuun mahobeen.
21 Oan, kaer metin matenek, sempre uza kakutak hodi foti desizaun;
keta husik buat sira nee dook husi o.
22 Nunee matenek sei halo o moris naruk,
no sai nudar buat murak mean nebee hahenu iha o nia kakorok.
23 O sei lao ho seguru;
o nia ain sei la sidi.
24 Bainhira o latan aan iha o nia toba fatin, o sei la tauk buat ida;
bainhira o toba, o sei toba ho hakmatek.
25 Lalika tauk atu hetan dezastre derepenti;
lalika tauk ba dezastre nebee akontese ba ema aat sira.
26 Tanba NAI Maromak mak o nia sadere fatin;
Nia sei hasees tiha o nia ain husi lasu.
27 Se ema merese atu simu buat diak ruma husi o,
no o bele foo, foo deit ba.
28 Se o nia maluk husu buat ruma nebee o iha,
keta dehan, “Fila ba, aban mai fali mak hau foo.”
29 Keta hanoin aat ba o nia vizinhu,
tanba nia hela besik o no laran metin ba o.
30 Se ema la halo buat aat ba o,
keta duun matak nia.
31 Keta laran moras ba ema nebee gosta violensia;
keta halo tuir sira nia hahalok.
32 Tanba NAI hakribi ema nebee lao sees husi dalan loos,
maibee Nia sai belun diak ho ema nebee laran moos.
33 NAI nia malisan iha hela ema aat nia uma laran,
maibee ema moris loos nia uma, Nia foo bensaun.
34 NAI hatuun fali ema nebee gosta hatuun ema seluk,
maibee Nia hatudu laran diak ba ema nebee haraik aan.
35 Ema nebee matenek sei hetan respeitu,
maibee ema beik-teen sei hetan naran aat.