2
Matenek nee folin boot
1 Oan, se o simu hau nia liafuan
hodi rai hau nia regra iha o nia laran;
2 se o loke tilun ba lia matenek
hodi foo laran atu kompriende;
3 se o husu atu bele hetan matenek;
se o husu ho lian makaas atu bele kompriende klean;
4 se o buka matenek hanesan ema buka osan mutin;
se o buka tuir hanesan ema buka tuir riku-soin nebee subar hela,
5 entaun o sei hatene hamtauk NAI Maromak;
o sei aprende konhese di-diak Maromak.
6 Tanba NAI mak foo matenek;
liafuan nebee sai husi Nia ibun halo ita hatene no kompriende buat barak.
7 Nia rai hela matenek ba ema nebee moris loos;
Nia defende ema nebee lao tuir dalan loos.
8 Nia kuidadu ema moris loos nia dalan;
Nia proteje ema nebee foo laran ba Nia.
9 Nunee o sei kompriende lia loos, justisa ho hahalok loos;
o sei hatene dalan diak hotu-hotu.
10 Tanba matenek sei tama iha o nia neon;
konhesimentu sei halo o nia laran kontenti.
11 O sei seguru tanba o hatene foti desizaun;
o sei la monu tanba o kompriende klean.
12 Nunee o sei lao sees husi ema aat nia dalan,
husi ema lohi door.
13 Sira nee husik tiha dalan loos
hodi tuir fali dalan nakukun nian.
14 Sira gosta loos halo sala;
sira kontenti teb-tebes ho hahalok nebee aat;
15 sira nia lalaok kleuk;
sira nia hahalok lohi door.
16 Matenek sei halo o livre husi feto aat,
husi feto ulun bulak nebee koalia liafuan mesak midar.
17 Feto nee husik tiha mane nebee nia kaben bainhira sei joven;
nia la kumpri ona juramentu nebee nia halo iha Maromak nia oin.
18 See mak tama iha feto nee nia uma, lao tuir dalan mate nian;
nia dalan lori ema ba iha matebian sira nia fatin.
19 See-see deit mak baa iha feto nee nia uma, nunka atu fila fali;
sira sei la hetan tan dalan moris.
20 Nee duni o tenki lao tuir ema diak nia dalan;
lao tuir nafatin ema moris loos nia ain fatin.
21 Tanba ema moris loos mak sei moris iha rai nee;
ema nebee la iha sala, nia mak sei hela metin iha rai.
22 Maibee ema aat sei lakon mohu tiha husi rai nee;
traidor sira nia abut sei fokit sai tiha.