Provérbiu
1
Objetivu lia matenek iha livru nee
1 Lia matenek husi Salomão, liurai Israel, David nia oan:
2 Lia matenek nee atu forma ema hodi sai matenek;
atu ema bele kompriende hanorin nebee klean;
3 atu hanorin ema para bele moris iha matenek nia laran
hodi moris loos, kaer metin justisa no halo buat nebee loos;
4 atu foo treinu ba ema nebee la iha esperiensia moris para bele sai matenek;
atu halo joven sira bele aprende buat oi-oin no hatene oinsaa atu foti desizaun.
5 Ema nebee matenek ona, rona ba hodi aprende liu tan;
lia matenek nee mos sai matadalan ba ema nebee kompriende klean ona.
6 Liafuan nee atu tulun ema kompriende lia matenek ho komparasaun,
atu hatene tuir matenek nain nia liafuan hodi siik liafuan nebee sira falun.
7 Matenek nia huun mai husi hamtauk NAI Maromak,
maibee ema beik-teen hakribi fali matenek no lakohi simu bainhira ema eduka sira.
Keta halo belun ho ema aat
8 Oan, rona bainhira o nia aman eduka o;
la bele fila kotuk bainhira o nia inan hanorin o.
9 Ami nia liafuan nee hanesan ai funan furak nebee haleu o nia ulun;
hanesan korenti furak hodi hahenu iha o nia kakorok.
10 Oan, bainhira ema aat hakarak dada o ba buat aat,
lalika halo tuir.
11 Karik sira dehan, “Mai tuir ami;
ita baa hafuhu ema iha dalan atu fakar nia raan;
ita baa subar para oho arbiru ema nebee la sala.
12 Ita tolan sira moris, hanesan rate tolan ema;
sira isin diak hela, ita halo sira tuun ba iha rai kuak.
13 Ita sei hetan sasaan oi-oin nebee folin boot;
ita sei hakonu ita nia uma ho sasaan nebee ita hadau.
14 Mai tama hamutuk ho ami,
depois sasaan nebee mak ita hadau, ita sei fahe ba malu.”
15 Oan, keta lao tuir ema sira nee nia dalan;
la bele sama sira nia ain fatin.
16 Tanba sira nia ain hakat lalais hodi halo buat aat;
sira sempre prontu halo ema nia raan fakar.
17 Se karik manu fuik haree hela ita monta redi ba nia,
ita monta saugati deit.
18 Maibee ema sira nee hafuhu ema iha dalan atu fakar nia raan, afinal sira fakar sira nia raan rasik;
sira subar atu oho ema, afinal sira oho sira nia aan rasik.
19 See mak gosta manaan matak deit, sira nia destinu sei sai nunee;
riku-soin nebee sira hadau nee mak sei halakon sira nia vida.
Matenek kompara ho senhora ida nebee bolu ema
20 Matenek nee hanesan senhora ida nebee bolu ho lian makaas iha estrada boot;
nia hasae nia lian iha merkadu;
21 nia bolu atensaun iha fatin publiku;
iha portaun sidade nian, nia koalia nunee:
22 “Imi nebee nar-naran tuir ema, imi hakarak tuir arbiru deit too bainhira?
Imi goza door sira, imi kaan atu goza ema too bainhira?
Imi beik-teen sira, imi lakohi hatene buat ida too bainhira?
23 See tilun mai bainhira hau koriji imi,
depois hau sei foo sai ba imi buat nebee iha hau nia laran;
hau sei foo hatene hau nia hanoin ba imi.
24 Hau bolu tiha ona imi, maibee imi lakohi rona;
hau lolo hau nia liman hodi konvida imi, maibee la iha ema ida mak interese.
25 Hau foo hanoin hela deit, imi lakohi foo atensaun;
hau koriji imi, imi lakohi simu.
26-27 Entaun bainhira imi hetan susar boot,
hau mos sei hamnasa fali imi.
Bainhira dezastre halo imi nakdoko;
bainhira dezastre mai hanesan anin fuik hodi doko imi,
ka susar kona imi hanesan anin boot;
bainhira terus ho susar baa iha imi nia leten,
hau sei goza fali imi.
28 Depois ema sira nee sei bolu hau, maibee hau sei la hataan;
sira buka hau tuun-sae, maibee sira la hetan.
29 Sira lakohi aprende matenek,
no lakohi hamtauk NAI Maromak;
30 hau foo hanoin hela deit sira, sira lakohi simu;
hau koriji sira, sira lakohi rona.
31 Nunee sira nia hahalok rasik sei foo todan ba sira;
sira nia hanoin aat rasik sei lori terus ba sira.
32 See mak nar-naran tuir ema sei mate tanba sees aan husi hau;
ema beik-teen sira sei lakon mohu tanba sira la interese buat ida.
33 Maibee ema nebee mak rona hau, sei moris seguru;
sira sei hakmatek, no la tauk atu susar kona sira.”