4
Boaz kaben ho Rut
1 Boaz baa iha portaun sidade nian hodi tuur iha nebaa. Nia foin tuur, ema nebee uluk nia temi dehan Elimelek nia familia besik liu nee too mai. Entaun Boaz bolu nia, “Primu, mai tuur iha nee lai.” Ema nee mos baa tuur.
2 Depois Boaz konvida katuas lia nain sanulu husi sidade nee atu tuur hamutuk. Bainhira sira hotu tuur ona,
3 Boaz hatete ba Elimelek nia familia besik liu nee dehan, “Noemi fila fali ona husi rai Moab, agora nia atu faan ita nia maluk Elimelek nia rai.
4 Hau hakarak foo hatene ita boot kona ba ida nee. Diak liu ita boot sosa rai nee iha katuas lia nain sira ho povu sira nee nia oin, para rai nee nafatin Elimelek nia familia nian. Karik ita hakarak hola, entaun hola ba. Karik lakohi mos, koalia sai para hau hatene. Tanba ita boot mak iha direitu liu atu hola rai nee, tuir fali hau.”
Ema nee hataan, “Sin, hau sei hola.”
5 Boaz hataan fali, “Entaun diak. Maibee se karik ita boot sosa rai nee husi Noemi, entaun iha loron nee kedas ita boot tenki hola mos Elimelek nia oan mane matebian nia feen Rut, feto Moab nee. Tanba rai nee tenki nafatin matebian nia jerasaun nian.”
6 Rona nunee, ema nee hataan, “Se hanesan nee hau la bele hola, tanba sei hamenus hau nia riku-soin nebee mak hau bele rai hela ba hau nia oan sira. Ita boot mak hola deit ba, hau la bele.”
7 Tuir ema Israel nia kostumi iha tempu nebaa, bainhira sira halo kontratu ruma, ida nebee faan tenki hasai nia sandalias sorin hodi foo ba ida nebee mak sosa. Nee hatudu ba ema hotu katak kontratu nee loos ona.
8 Nunee bainhira ema nee koalia tiha ba Boaz dehan, “Ita boot mak sosa deit ba,” nia hasai nia sandalias sorin hodi entrega ba Boaz.
9 Depois Boaz foo sai ba katuas lia nain sira ho mos povu sira hotu dehan, “Ohin loron imi sai sasin katak, hau sosa hotu Elimelek, Kilion ho Malon sira nia rai husi Noemi nia liman.
10 Hau hola mos Rut, matebian Malon nia feen, ema Moab nee sai hau nia kaben, para rai nee nafatin pertense ba matebian nia jerasaun. Ho nunee nia naran la bele lakon husi nia familia ka husi sidade nee nia istoria. Ita boot sira mak sai sasin.”
11 Katuas lia nain sira ho povu hotu nebee iha portaun sidade nee dehan, “Ami mak sai sasin. Ami harohan atu NAI Maromak halo feto nebee tama iha senhor nia uma kain nee sai hanesan Rakél ho Lea, sira nain rua sai povu Israel nia bei-ala. Ami harohan atu senhor sai ema boot iha Efrata, ema naran boot iha Belém.
12 Ami hein katak, NAI foo menina nee kous oan barak ba senhor, nunee senhor nia jerasaun sai barak hanesan Tamar no Judá nia oan Perez nia jerasaun.”
Liurai David nia bei-ala sira
(Mateus 1:2-6)
13 Nunee Boaz hola Rut hodi sai nia kaben. Depois sira moris hamutuk. NAI Maromak haraik bensaun ba Rut bele kous. Nia tuur ahi oan mane ida.
14 Feto sira iha nebaa dehan ba Noemi, “Hahii ba NAI Maromak, tanba Nia tulun ona ita boot iha loron ida nee hodi foo labarik nee atu responsabiliza ba ita boot nia moris. Ami harohan atu labarik nee sai konhesidu iha povu Israel nia leet.
15 Nia sei hafoun ita boot nia moris, no sei tau matan ba ita boot bainhira ferik ona. Tanba nia inan mak ita boot nia feto foun, nia nee hadomi ita boot. Se karik ita boot iha oan mane nain hitu mos, ita boot nia feto foun nee mak haree ita boot diak liu fali oan mane nain hitu nee.”
16 Depois Noemi foti labarik nee hodi kous no tau matan ba nia.
17 Feto vizinhu sira dehan, “Noemi iha oan mane ida.” Sira foo naran Obed. Nia nee Jessé nia aman. Jessé mak David nia aman.
18 Tuir mai nee mak Perez nia jerasaun:
Perez nia oan Hesron.
19 Hesron nia oan Ram.
Ram nia oan Aminadab.
20 Aminadab nia oan Nahason.
Nahason nia oan Salmon.
21 Salmon nia oan Boaz.
Boaz nia oan Obed.
22 Obed nia oan Jessé.
Jessé nia oan David.