3
Rut husu Boaz nia tulun
1 Loron ida Rut nia banin feto Noemi dehan ba nia, “Oan, hau tenki esforsu aan para o bele iha uma kain ida, atu nunee o bele moris diak.
2 Durante nee o hamutuk ho menina sira nebee mak servisu ba Boaz. Nia nee ita nia familia. Orsida kalan nia baa iha baku trigu fatin hodi haketak trigu isin ho trigu kulit sira nee.
3 O hariis, kose mina morin, no hatais ropa diak nian. Depois baa iha fatin nee, maibee la bele halo nia hatene katak o iha nebaa too nia haan-hemu hotu.
4 Bainhira nia baa toba, o haree nia toba iha nebee, depois baa loke nia hena uitoan husi nia ain hodi toba iha nebaa. Nia sei foo hatene saida mak o atu halo.”
5 Rut hataan, “Buat hotu nebee mak amaa koalia nee, hau sei halo tuir.”
6 Nunee Rut baa iha baku trigu fatin nee, nia halo tuir buat hotu nebee mak nia banin haruka.
7 Boaz haan-hemu too kontenti ona, depois nia baa toba besik iha fatin bou trigu musan. Hotu tiha Rut baa nonook deit loke Boaz nia hena uitoan husi Boaz nia ain hodi toba iha nebaa.
8 Too kalan boot, Boaz hakfodak, toba fila aan, derepenti nia nota iha feto ida toba besik nia ain.
9 Entaun nia husu, “Nee see?”
Rut dehan, “Nee atan hau, Rut.” Nia soe lia tan dehan, “Uza senhor nia hena hodi hamahon netik atan hau ba. Tanba senhor mak familia besik liu, entaun senhor mak responsabiliza ba hau nia moris.”
10 Boaz hataan, “Oan, NAI Maromak foo bensaun ba o. Agora dadauk nee, o hatudu o nia laran luak liu fali uluk, tanba o la tuir malu ho joven mane ruma, atu ema kiak ka ema riku mos, o la tuir.
11 Entaun oan, keta tauk. Hau sei halo tuir buat hotu-hotu nebee mak o husu, tanba ema hotu iha sidade nee hatene katak, o nee ema diak ida.
12 Loos duni, hau nee o nia familia besik, maibee sei iha tan ema ida nebee mak familia besik liu.
13 Kalan nee o hela lai iha nee. Aban dadeer, se karik ema nee prontu atu responsabiliza ba o nia moris, entaun diak, husik nia mak responsabiliza. Maibee se karik nia lakohi, entaun hau jura hodi NAI Maromak Nia naran, hau rasik mak responsabiliza ba o. Agora toba lai iha nee too dadeer.”
14 Nunee Rut toba iha Boaz nia ain, maibee dadeer-saan nakukun, ema seidauk bele konhese malu, nia hadeer ona. Tanba Boaz dehan, “Ema ida la bele hatene katak, feto ida mai iha baku trigu fatin nee.”
15 Boaz haruka tan, “Hasai hena nebee taka o nia ulun nee hodi lolo mai.” Entaun Rut lolo nia hena nee ba, depois Boaz enxe trigu musan halo nakonu hodi tula ba nia ulun. Hotu tiha Boaz baa fali sidade.
16 Rut fila ba uma. Too iha nebaa, nia banin husu, “Oan, hori kalan lao oinsaa?”
Entaun Rut konta hotu buat nebee mak Boaz halo ba nia.
17 Nia dehan, “Trigu musan sasukat neen nee Boaz mak foo, tanba nia dehan, hau la bele fila mai amaa ho liman mamuk.”
18 Noemi hataan, “Oan, hein deit too o hatene saida mak sei mosu. Ema nee sei hakaas aan para rezolve asuntu nee ohin loron kedas.”