5
Kananuk iha laleꞌan
1 Hotu, haꞌu ktitu-karee kikar Nia mak nabesi aan iha habesi aan fatin nia. Nia kaer hakerek ida iha liman kwana. Hakerek nia, nakonu oin-kotuk. Hakerek nia moos lulun metin hodi hanit hitu.
2 Hotu haꞌu ktitu-karee makbukar laleꞌan makaꞌas ida. Nia nusu nodi lian makaꞌas naꞌak, “See mak noo beran atu bele loke nodi leno hakerek nia?”
3 Nusu nunia, mais la netan ema ida moos mak noo beran atu bele loke nodi leno hakerek nia isin. Iha laleꞌan no raiklaran, la noo ida kedan. Iha matebian fatin moos, la noo kedan.
4 Haꞌu ktitu-karee nunia, haꞌu moos tanis karoꞌan aan, tan la noo ema ida kois mak noo beran atu bele loke nodi leno hakerek nia isin.
5 Hotu, naꞌin ida nosi fukun rua nulu resin haat nia, dale no haꞌu naꞌak, “Hei, mau! Keta tanis. Mana lai! Noo Naꞌi Daud husar-binan makaꞌas ida mak ema temi naꞌak, ‘Busa fuik boot nosi husar-binan Yahuda’. Nia nabeꞌo mohu lia aat hotu-hotu. Nia mak noo beran loke hanit nia sia, nodi leno hakerek nia isin.”
6 Haꞌu krona hotu nunia, karee kola Bibi Malae Oan ida. Nia noꞌi nariik iha buat horis kasalak matan haat no fukun naꞌin rua nulu resin haat nia klaran. Bibi Malae Oan nia, nuꞌu ema noꞌo tiꞌan. Nia noo dikur hitu. Matan fuan, hitu. Matan fuan hitu nia, mak Maromak kmalar hitu mak Nia solok tiꞌan baa raiklaran tomak.
7 Hotu, haꞌu ktitu-karee Bibi Malae Oan nia baa nasoru Nia mak nabesi aan iha habesi aan fatin. Nia nola hakerek lulun nia nosi Niakaan liman kwana.
8 Baa oras nola, buat horis kasalak matan haat nia, no fukun naꞌin rua nulu resin haat nia, nakniꞌa nodi loꞌu-sudur baa Nia. Sia ida-idak kaer bareka no mako ida halo hosi mean. Mako nia nakonu noo ai morin mak ema tunu nalo baa dubun morin. Dubun morin nia, mak Naꞌi Maromak eman siakaan hamulak.
9 Hotu, sia hotu-hotu nananu kananuk foun ida naꞌak:
“Bibi Malae Oan mak fatan simu hakerek neꞌe.
Bibi Malae Oan mak noo beran loke hanit iha hakerek nia.
Tan Nia kona hoꞌo tiꞌan.
Hotu, Naꞌi Maromak nodi raan,
kasu ema raiklaran salan.
Hodi nunia, ema nosi hunun no klubun hotu-hotu
bele dadi Naꞌi Maromak eman.
Hodi nunia, ema mak dale nodi lia hotu-hotu iha rai hotu-hotu
bele dadi Naꞌi Maromak eman.
10 Bibi Malae Oan libur nola sia tiꞌan,
dadi baa Niakaan hutun-renun.
Bibi Malae Oan boi nola sia tiꞌan,
dadi Naꞌi Maromak eman serwisu.
Sia atu kaer ukun iha raiklaran.
Sia atu serwisu bodik Naꞌi Maromak iha raiklaran.”
11 Sia nananu hotu, haꞌu kfoti oin. Haꞌu krona kola lia maliak boot ida. Karee no buat horis kasalak matan haat nia, no fukun naꞌin rua nulu resin haat nia, no tenik, Maromak Niakaan makbukar laleꞌan lear, toꞌo maliun-maliun.
12 Sia hotu-hotu nananu nodi lian makaꞌas naꞌak,
“Ami foti-hahaas Bibi Malae Oan mak kona hoꞌo.
Nia mak fatan simu amikaan tonun!
Niakaan beran, boot kaliuk.
Niakaan sasoin, waꞌin kaliuk.
Niakaan kakutak, matenek kaliuk.
Niakaan babiit, makaꞌas kaliuk.
Ami foti-hahaas Niakaan naran.
Ami sera kneter baa Nia.
Ami tonu-haboot Nia.”
13 Sia nananu hotu, haꞌu krona kola tenik kananuk seluk ida. Makmoris hotu-hotu iha laleꞌan, iha kaloꞌan, iha raiklaran, no iha tasi laran, foti lian nodi nananu. Ema nosi matebian fatin moos, tuir nananu. Sia nananu bele-bele naꞌak,
“Ami tonu Naꞌi Maromak mak nabesi aan iha habesi aan fatin neꞌe.
Ami moos foti-hahaas Bibi Malae Oan neꞌe.
Ami sera kneter baa Sia.
Ami loꞌu-sudur baa Sia.
Tan Sia mak kaer ukun nima-nimak!
Siakaan beran moos la mohu kois!”
14 Hotu, buat horis kasalak matan haat nia, nataa bei-beik naꞌak, “Tebes, nunia! Nia, tebes tiꞌan!” Fukun nia sia moos nakniꞌa tenik nodi loꞌu-sudur baa Naꞌi Maromak no Bibi Malae Oan nia.