34
Qassikka Eelihu Haasayees
1 Qassikka Eelihu hagaadan yaagiis,
2 “Inttenoo, aadhdhida eranchchatoo, taani haasayiyo haasayaa siyite. Inttenoo, eranchchatoo, intte haittaa taakko yeggite.
3 Inxxarssai qumaa mal77uwaa eriyoogaadan, haittaikka yohuwaa shaakkidi erees.
4 Ane nuuni likkebaanne lo77obaa shaakkidi eroos.
5 “Iyyoobi, ‘Taani xillo; shin Xoossai ta suure pirddaa tana diggiis.
6 Taani likke gidaidda, worddanchchadan qoodettaas. Tanan mooroi bainnankka, i tana paxennaadan masunxxissiis’ yaagiis.
7 “Xoossaa bolli Iyyoobadan qilliicciya asi de7ii?
8 I iitabaa oottiyaageetuura zuppetees; nagaranchchatuurakka hemettees.
9 Waanidi giikko, i, ‘Asi Xoossaa ufaissana giidi oottiyoobi ainne maaddenna’ yaagees.
10 “Hegaa gishshau, inttenoo, akeekanchcha asatoo, taani yootiyoogaa ane siyite! Ubbaa Danddayiya Xoossai iitabaa mulekka oottenna.
11 Xoossai asassi a oosuwaadan immees; aawu ogiyaadan aawussi qanxxees.
12 Xoossai tumuppe iitabaa oottenna; Ubbaa Danddayiya Xoossai suure pirddaa geellayenna.
13 Sa7aa bollan Xoossaayyo maataa immidai oonee? Qassi biittaa ubbaa bolli a sunttidai oonee?
14 Xoossai ba Ayyaanaanne ba de7o shemppuwaa baakko zaaridi ekkiyaakko,
15 asho maayida ubbai issippe xayana; asi biittau duge simmana.
16 “Intte akeekanchcha gidikko, hagaa siyite; ta haasayiyoogaakka ezggite.
17 Suure pirddaa ixxiyaagee biittaa haaranau danddayii? Yaatin, neeni xillonne wolqqaama gidiya Xoossaa pirddai?
18 Xoossai kawota, ‘Intte shufurota’ yaagees; qassi biittaa haariyaageetakka, ‘Intte iita’ yaagees.
19 Halaqatu som77uwaa xeellidi maaddenna; duriyaakka manqquwaappe aattidi xeellenna. Aissi giikko, eti ubbaikka a oosota.
20 Eti hekka bilahe akeekennan haiqqana; asai ubbaikka kokkoridi xayana; wolqqaamatikka ai asa kusheenne bochchennan kichchana.
21 “Xoossai asaa hemetaa xeellees; a tanggo ubbaakka wochchees.
22 Iitaa oottiyaageeta Xoossaappe genttanau danddayiya sakkana xumi baawa.
23 Xoossai asaa bolli pirddanau, asai a sintti shiiqanaadan keero immenna.
24 Wolqqaamata ainne oichchennan mentterettees; yaatidi eta sohuwan haraata wottees.
25 I eta oosuwaa eriyo gishshau, eta issi qammi maataappe wottidi xaissees.
26 Eta iitatettaa gishshau, asi ubbi be7iyoosan i eta qaxxayees.
27 Qaxxayiyoogeekka eti a kaallennan ixxidi, a azazuwaakka aggido gishshaassa.
28 Eti hiyyeesata huqqunnidi, eta Xoossaakko waassanaadan oottidosona; oottin Xoossai hiyyeesatu waasuwaa siyiis.
29 Xoossai co77u giikko, a pirddanai oonee? I ba som77uwaa wora zaarikko, asa maaddiyaabi baawa.
30 Hegaadankka, Xoossaassi yayyenna asati haarennaadaaninne asaassikka gite gidennaadan, asai ubbai digganau danddayenna.
31 “Iyyoobaa, ne nagaraa Xoossaayyo paaxadii? Qassi zaarada nagara oottennaadan geppadii?
32 Ne mooruwaa neeyyo qonccissana mala, Xoossaa woossadii? Sinttanau iita ooso oottennan agganau maayadii?
33 “Neeni Xoossai oottiyoobaa ixxaidda, ne waagai neeni dosiyoogaadan hananau koyai? Simmi qofaa qachchanai nenappe attin, tana gidikke. Hegaa gishshau, neeni qoppiyoobaa taayyo yoota.
34 Akeekanchcha asati taani yootiyoogaa maayoosona; taani odiyoogaa siyiya aadhdhida eranchchatikka hagaadan yaagoosona;
35 ‘Iyyoobi eri paccin, hagaa haasayees; i haasayiyoobau birshshettikka baawa’ yaagoosona.
36 Iyyoobi iita asatudan zaaruwaa immido gishshau, wurssettaa gakkanau paacettidaa gideerenneeshsha!
37 Aissi giikko, i ba nagaraa bolli makkalaa gujjees; nu sinttan Xoossaa qilliiccees. Ba qaalaakka darissidi, Xoossaa bolli biddees” yaagiis.