35
Qassikka Eelihu Haasayees
1 Eelihu qassikka hagaadan yaagiis;
2 “Iyyoobaa, neeni, ‘Taani Xoossaa sinttan xillo’ giyoogee likkee?
3 Qassi, ‘Taani nagaraa oottikko, nena ai qohiyaanaa? Nagaraa oottennan aggikko, taani go7ettiyoobi aibee?’ yaagada neeni Xoossaa oichchadasa.
4 Taani neeyyoonne nenaara de7iya ne laggetuyyo zaaruwaa haasayana.
5 “Xoqqu gaada salota xeella; neeppe bollaara de7iya shaaratakka ane akeekada be7a.
6 Neeni nagaraa oottikko, hegee Xoossaa ainne qohenna. Ne mooroi darikkokka, neeni Xoossaa ainne oottakka.
7 Xillo gidikko, ayyo neeni ai immuutee? Woikko ne kushiyaappe i ai ekkanee?
8 Neeni nagaraa oottikko, ne mala asaa qohaasa; qassi xillikkokka, asaa go77aasa.
9 “Huqqunnai darobare asai waassees; wolqqaamatu kushiyaappe kessi ekkanau alluwaa xeegees.
10-11 SHin ooninne, ‘Xoossai, tana Medhdhidaagee, qamman mazamuriyaa immidaagee, sa7aa do7atuppe aattidi, nuna tamaarissiyaageenne saluwaa kafotuppe aadhdhida eranchcha nuna oottiyaagee awan de7ii?’ yaagenna.
12 Iita asati waassoosona; shin Xoossai eta otoruwaa gaasuwan, etau allenna.
13 Hada waasuwaa Xoossai tumuppe siyenna; Ubbaa Danddayiya Xoossai hegaa ezggenna.
14 “Iyyoobaa, neeni, ‘Taani Xoossaa be7anau danddayikke; ta mootoi a sinttan de7ees; taani a naagais’ yaagaasa. Yaatin, neeyyo i zaaruwaa immanau, ne gaasoi ai keena guuxxanddeeshsha!
15 Xoossai asaa qaxxayennabaanne nagaraakka shenehoo giidi aggiigiyaabaa gaada qoppai?
16 Hegaa gidikko, neeni ne doonaa coo mela dooyaasa; dooyadakka eri bainna haasayaa darissaasa” yaagiis.