73
1 Da líqueze ba be̱n Dios da chawe' chee̱ benne' Israel ca',
benne' ca' zaj naque̱' du lazre' lau Dios.
2 Neda' ba guzúa cheajcházia' lu dul-la.
Ba guzúa guna' tu da zrinnaj,
3 lawe' da guca' zre'e lazre' ne̱ chee̱ benne' gunní'a ca',
gate ble'eda' ca dxelepe ban benne' ca' zaj nabéaj xíchaje̱' Dios.
4 Benne' caní quebe zaj zue̱' ste̱be chee̱ xel-la' gute,
lawe' da zaj zúale̱'e̱ chawe'.
5 Quebe dxeledée̱' lu da ba xa' ca da dxeledé xúgute̱ benne' ca',
ne quebe dxelezaca zi'e̱ ca da dxaca chee̱ xezícadxa bénneache.
6 Chee̱ le̱ na' dxulucá'ana szren cuine̱'.
Tu dxelexúbezquezne̱' dxelune̱' da cale̱la.
7 Dxelánnie̱' lawe' da dxelagu cháwele̱'e̱.
Dxelezíle̱'e̱ ca naca da dxelezá lazre̱'.
8 Dxelún le̱' chee̱ Dios, ne dxelenné̱' cale̱la ca da zrinnaj
da xelune̱'.
Dute̱ xel-la' dxulucá'ana szren cuina dxuluchálaje̱' da zrente̱.
9 Dxelenné̱' chee̱ da ca' zaj zua xabáa,
ne dxuluchálaje̱' ca benne' zaj nape̱' dute̱ xe̱zr la xu.
10 Chee̱ le̱ na' xúgute̱ bénneache dxelune̱' le̱' tu zren,
ne dxelezi'e̱ ca da dxelenná benne' gunni'a ca'.
11 Dxelenná benne' ca' dxelune̱' da cale̱la:
“¿Ájazra gaca neze Dios?
¿Dxelé'equeze Bénnea' zue̱' na'ala?”
12 Benne' caní zaj naque̱' benne' zaj nabéaj xíchaje̱' Dios,
na' dxelepe bane̱' lu xe̱zr la xu, ne dxelaque̱' gunní'a.
13 Da líqueze, dácheze naca guca' du lazre',
ne quebe bi da cale̱la nuna'.
14 Gudéa' lu da ba xa' tu zra tu zra,
ne gudéa' xel-la' zi' xúgute̱ zra.
15 La nnia' neda': Guchálaja' ca dxuluchalaj benne' ca',
na' si xe̱'a bénneachedu ca' chiu', Dios.
16 Gate blaba lazra' chee̱ chéajni'ida' da nigá,
guca na sté̱bele̱'e̱ chia' neda'.
17 Gate guxu'a lu lataj lá'azxa chee̱ Dios,
na' guque be'eda' da gaca chee̱ benne' ca' gate cheajsé̱.
18 Da líqueze nunu' chee̱ benne' ca' cheajlecházie̱',
ne gunu' xelebía xí'queze̱'.
19 Chadite̱ gulebía xí'queze̱'.
Belexenite̱' lu xel-la' gulezrébele̱'e̱.
20 Zaj naque̱' ca tu da ble'edxu lu xe̱la da dxexenite na
gate dxexebandxu.
Ca'an gaca, Xran, gate chasu', guzú' chalá'ala ca da
gulaca benne' ca'.
21 Gate guca' zre'e lazre' chee̱ benne' ca',
guzúa lázrdawa' lu da ste̱be.
22 Lawe' da guca' xichaj zide', na' quebe guxéajni'ida'
guca' ca tu be̱ xixre' lau Lue'.
23 Tu guzúazqueza' nen Lue', na' guca'u na'a xabe̱la.
24 Bsi'u neda' chee̱ guna' da dxulé'enu' neda',
na' te nigá xezí' lu na'u neda' lu xabáa chiu'.
25 Quebe nu xetú zua chia' xabáa san tuzu' Lue',
ne quebe nu xetú dxezá lazra' lu xe̱zr la xu, san tuzu' Lue'.
26 Dxelexedú lazre' be̱la' dxen chia', ne lázrdawa'.
Dios naque̱' Benne' dxutipe̱' lazra',
ne naque̱' da ba neza chia' chadía chacanna.
27 Benne' ca' dxelexecuase̱' naga zu' xelexenítie̱'.
Guzría xi'u xúgute̱ benne' ca' xelexebeaj xíchaje̱' Lue'.
28 Ca naca chia' neda', dxaca chawe' chia' lawe' da gubiga'
lau Dios.
Tu dxebeza lázrezqueza' Xránadxu Dios,
chee̱ guchálajqueza' ca naca da zrente̱ da nune̱'.