74
Dios, ¿tu chí'izqueze nuzú' netu' chalá'ala?
¿Dxezra'u netu', nácantu' ca zrila' chiu' ca'?
Bsá lazre' bénneache chiu', benne' ca' guzi'u nédxudaute̱.
Benne' ca' bexa'u chee̱ gunu' xelaque̱' benne' cheé̱quezu',
benne' ca' zaj zre̱'e̱ lu xi'a Sión nigá, naga zúaquezu' Lue'.
Gudá xedajnná'u ca nabía xi' xe̱zre nigá,
ne ca naca da cale̱la da belún benne' ca'
dxeledábague̱' netu', lu lataj lá'azxa chiu'.
Dxelebezre xa'a benne' ca' dxeledábague̱' Lue'
laduj naga zaj nazraga bénneache chiu'.
Zaj nuzúe̱' nigá da dxululé'e na xu'untu' lu na' benne' ca'.
Buluzría xi'e̱ xe̱zre nigá,
ca dxun tu benne' dxine̱' ca naca xaga zaj ze̱ tu xi'a.
Na'a nen xa waga chee̱' ca', ne nen xaga chee̱' ca',
ba buluzría xi'e̱ ca naca lechítaje̱ chee̱ xudau' chiu'.
Ba buluzézxie̱' lataj lá'azxa chiu'.
Bulucá'ana dítaje̱' xu'u lizru'.
Buluchínnaje̱' na.
Lu lázrdawe̱' gulenné̱': “Guzría xí'tegadxu na tu chi'ize.”
Ba buluzézxie̱' xúgute̱ xu'u naga bezrágantu' chiu'
lu xe̱zr la xu chiu'.
Québedxa dxelé'entu' da la'axza ca' da dxululé'e na
da guchísantu' lu xe̱zr la xu chee̱ntu'.
Québedxa nu chilá' benne' guchálaje̱' waláz chiu',
ne quebe nu zua ládujla netu', benne' nézene̱' bátaqueze lantu'.
10 Dios, ¿Báta cueza na xulucháchale̱ benne' ca' netu',
benne' ca' dxulusaca zi'e̱ netu'?
¿Chadía chacanna welenné̱ benne' dxeledábague̱' lue'
schanni' chee̱ Lau'?
11 ¿Bizr chee̱ na' quebe dxebéaj lazru' benne' ca'?
¿Bizr chee̱ na' quebe dxuzría xi'u benne' ca' dxelune̱' da cale̱la?
12 Lue', Dios, nacu' Wenná Bea chia' nédxudaute̱.
Lué'queze dxuseláu' bénneache dute̱ xe̱zr la xu.
13 Xel-la' waca chiu' be̱nu' nísadau' chupa la'a.
Gula'u xichaj be̱ schanni' ca' lu nísadau'.
14 Bzúzruju' xichaj be̱ schanni' le̱ba' leviatán,
Na' be̱nu' gulagu be̱ xixre' le̱ba', bea ca' zaj zraba' lu xu bizre.
15 Be̱nu' gulaj nisa beaj, ne nisa xe̱gu ca'.
Bsebizru' xe̱gu zri'a ca'.
16 Chiu' Lue' naca te zra, ne cá'anqueze chiu' naca dxe̱la.
Lue' bzu' beu', ne gubizra naga dxeledé na.
17 Lue' bzu' tu chi'ize ca naca da zaj de̱ xe̱zr la xu nigá.
Lue' be̱nu' beu' la ca', ne beu' zaga ca'.
18 Bsa lazre' da nigá: Benne' ca' dxeledábague̱' lue'
ba zaj nun le̱' chiu' Lue', Xran.
Benne' xala ca' ba gulenné̱' schanni' chee̱ Lau'.
19 Quebe gusanu' lu na' benne' zaj naque̱' ca be̱ snia ca'
benne' ca' nazrí'iquezu',
ne quebe gal-la lazru' tu chi'ize bénneache chiu' zaj
zue̱' lu da ba xa'.
20 Gunná' ca naca xel-la' wezría da be̱nu',
lawe' da gátete̱ze naca chul-la lu xe̱zr la xu,
na' zaj zra' benne' ca' dxelune̱' da zrinnaj.
21 Quebe gu'u lataj xelegá'ana lu xel-la' stu' benne'
ca' zaj zue̱' lu da baxache'.
Benne' dxelezaca zi'e̱, ne benne' dxelexázrjene̱'
xelúe lá'ane̱' Lau'.
22 ¡Guzé̱, Dios!
¡Be̱n ca ba gunnáu'!
¡Bsa lazre' ca dxelún benne' xala ca', dxelún le̱' chiu'
te zra te zra!
23 Quebe gal-la lazru' ca da gulenná benne' ca'
dxeledábague̱' lue'.
Da schaga dxelún benne' ca' dxeledábague̱' Lue'
tu dxénzqueze na.