79
1 Dios, ba gulú'u benne' xe̱zr la xu zitu' ca' lu xe̱zr la xu
chee̱ bénneache chiu'.
Bulucá'ana dítaje̱' xudau' lá'azxa chiu'.
Buluzría xi'e̱ xe̱zre Jerusalén.
2 Bulucá'ane̱' be̱la' dxen chee̱ we̱n zrin chiu' ca' naga
gulagu be̱ zua xrila le̱'.
Be̱ xixre' ca' guláguba' be̱la' dxen chee̱ benne' ca'
zaj naque̱' chiu'.
3 Ca nisa bululálaje̱' dxen chee̱ benne' ca' xúgute̱ lu neza
chee̱ xe̱zre Jerusalén,
ne quebe nu chilá' benne' gucache̱' benne' ca'.
4 Benne' xe̱zr la xu walizre' chee̱ntu' ca'
dxulucháchale̱ne̱' netu'.
Benne' zaj zre̱'e̱ xe̱zre walízr ca' dxulucá'ana dítaje̱' netu',
ne dxelún le̱' chee̱ntu'.
5 ¿Bata cuézaqueze gaca caní chee̱ntu', Xran?
¿Tu chí'izqueze dxezra'u netu'?
¿Tu chí'izqueze gaca xel-la' dxezrá'a chiu' ca tu xi'?
6 Bzra'a benne' xe̱zr la xu ca' quebe zaj núnbe'e̱ Lue',
na' benne' xe̱zr la xu ca' quebe dxululáwizre̱' Lue',
7 lawe' da ba buluzría xi'e̱ zri'ine zre sua Jacob,
ne bulucá'ana dítaje̱' xu'u lizre benne' ca'.
8 Quebe gusebagu' netu' ca naca da zrinnaj da belún
xra xrtauntu' ca'.
Gudázega xexache lazru' netu', lawe' da dxezraga láule̱'e̱ntu'.
9 Gúcale̱ netu', Dios, nacu' Bénnea' dxuselé̱' netu',
chee̱ gaca ba Lau'.
Bselá netu', ne bnite lau dul-la nuntu' chee̱ xegá'ana szren Lau',
10 lawe' da xelenná bénneache: “¿Ga na Dios chee̱ benne' ca'?”
Bebéaj lazre' benne' ca' belútie̱' we̱n zrin chiu' ca'.
11 Caní be̱n chee̱ xelelé'e xúgute̱ benne' chiu' ca' zaj xu'e̱
lu na' benne' ca' dxeledábague̱' netu'.
Dute̱ xel-la' waca zren chiu' bselá benne' ca' ba zaj nachugue̱'
chee̱' xelatie̱'.
12 Bunezruj chee̱ benne' xe̱zr la xu walizre' chee̱ntu'
ca' xegazre cue'
ca da cale̱la da belune̱', bulucá'ana dítaje̱' Lue', Xran.
13 Netu', bénneache chiu', nácantu' ca zrila' chiu' ca',
güe lá'anaquezentu' Lue' chadía chacanna.
Tu cuen tu cuen zri'ine zre suantu' gúl-laquezentu' da
güe lá'anantu' Lue'.